履歷
履歷，又叫履歷表，係個人學歷同工作經驗嘅簡要陳述，通常用喺搵工、升學，希望可以得到見工或升學面試嘅機會。除咗叫履歷，好多時都會用英文 résumé[註 1] 或者拉丁文 curriculum vitæ，或者就咁簡稱 CV[註 2]。
履歷記載一個人嘅教育學歷、專長同埋工作經驗，有時會補充個人特質、興趣或期望等。主要目的通常係搵工或升學嘅人希望得到面試機會嘅工具，亦都係一份公司人事部或教育機構篩選候選人嘅程序之一，所以履歷非常重要。
一般履歷表應有項目
編輯履歷表喺唔同國家地區、唔同行業都會有唔同嘅要求。喺香港，一般嘅履歷表應有項目包括：
- 個人基本資料
履歷表最開頭一定要係自己個名，之後列出其他個人聯絡資料，例如：聯絡電話、地址、E-mail等，呢啲都係必要嘅，唔係嘅話僱主就聯絡唔到你。
- 應徵職位
簡單清晰列出你希望應徵嘅工作職位，唔使寫希望應徵嘅原因，唔係嘅話履歷會太長。
- 學歷
要以倒敍形式列出，先寫最高學歷，整齊嘅寫上年份，僱主睇嗰陣就一目瞭然。
- 工作經驗
可以根據工作嘅種類或工作嘅先後順序分類，寫上工作職位同工作內容，並同學歷一樣喺靠右邊或靠左邊整齊噉寫上工作年份。
- 其他活動
其他你認為重要而且對工作有幫忙嘅活動都可以喺呢部分列出，例如喺學校做過嘅職務、曾經做過義工等。
- 獎項/證書/專業考試
可以列出之前喺學校、工作攞過任何同工作有關嘅獎項、證書、專業考試資格等。
- 技能/語言
列出個人技能，例如電腦應用、打字速度等，同埋列出你可以講同寫嘅語言/語文。
- 可以返工日期
寫出幾可以返工，例如；即時、七日通知、一個月通知。
學術履歷表
編輯學術界用嘅履歷表（英文叫 curriculum vitae 或者 CV，唔叫 résumé）同一般嘅履歷表唔同，工作經驗部分會詳細寫低哂所有做過嘅學術職位，亦即係唔會撮要。其他部分包括發表過嘅學術論文、發表過嘅研究海報、出過嘅書、攞過乜嘢資助、喺乜嘢委員會或者學術研討會服務過等等，不過呢啲部分可以撮要。但係因為要寫咁多嘢，佢唔似普通嘅履歷表，可以幾版紙咁長，甚至幾十版紙。