見工
見工（粵拼：gin3 gung1；英文：job interview）係面試嘅一種，指一位僱主親自同一位想幫佢打工嘅人傾偈，多數都會係前者向後者問一連串嘅問題。僱主噉做係想透過傾偈嚟評估見嗰個人啱唔啱做份工，例如睇吓嗰個人對答係咪流利，跟住就用評估結果決定好唔好請嗰個人做嘢。喺廿一世紀初，見工廣泛噉俾人認為係能夠好準確噉評定嚟見嗰個人係咪適合做份工，所以係啲人揀選員工嘅最常見手法之一[1][2]。
「可唔可以講吓點解你有興趣嚟我哋公司做嘢？」
「哦，我對份工有興趣係因為...」（下略）
見工同搞見工面試都係有技巧嘅嘢。例如面試做法基本上可以分做兩種：見工面試可以係冇結構嘅－即係話位僱主有少少似當咗場面試係傾閒偈噉，會同見工嘅人談天說地，並且一路評估嗰個人嘅性格同能力；另一方面，見工面試又可以係有結構嘅－即係話僱主會預先諗定柞問題嚟問，並且對「點樣先係理想嘅答案」或多或少噉心中有數。見工面試有陣時仲會分幾場[註 1]，甚至係要見工嘅人去驗身或者度身造制服呀噉[3]。搵工嘅人可以用唔同技巧應對唔同嘅面試做法，而做管理嘅人又會想知自己用咩技巧先可以搵到想要嘅人才[4]。
因為見工面試講技巧，從事人力資源管理同相關工作嘅人都有喺度諗「响面試當中，要點樣評估見工嘅人係咪適合份工」等嘅問題，佢哋當中有啲甚至仲會喺期刊同網誌等嘅地方撰文，討論有關「自己點樣喺面試嗰陣挑選人才」等嘅心得同睇法。搵工嘅人好多時又會參考呢啲文，想知點先可以清楚噉俾僱主知自己係值得請嘅[5]。
考核內容 編輯
一般嚟講，僱主响一場見工面試當中會留意見工嘅人喺以下呢啲方面嘅表現[6][7][8]：
- 智能：通常係愈高愈理想。
- 性格：例如係想睇吓嗰個人夠唔夠外向（如果份工係想要做嗰個人成日同人交際嘅話）。
- 工作動機：即係想估評吓嗰個人會唔會俾心機做嘢。
- 專家知識：指考核一個人係咪擁有做嗰份工必要嘅知識同技能（可以睇埋外顯知識同內隱知識）。
- 生理同體能狀況：呢啲考量常見於一啲要求做嘅人負重、長時間企喺度做嘢、或者去野外做嘢等嘅工。
... 呀噉。一般認為，見工嘅人喺對答嗰陣嘅表現會或多或少噉反映以上嘅特性，例如一個人對答嗰時流唔流利會喺一定程度上反映佢嘅智能同性格，一個人講起自己嘅工作嗰時嘅表情會反映佢嘅動機，而且見工好多時仲會涉及問一啲有關專業知識嘅嘢（例如見編程員就好興要見工嘅人即場寫啲簡單嘅程式）或者問有關「同同事相處上遇到問題嗰陣會點處理」相關嘅問題。順帶一提，因為搞見工面試基本上就係想由見嘅人嘅行為嚟判斷佢嘅智能同性格等嘅心理特性，所以做人力資源管理嘅人成日都會參考心理測量學[歐 1]（心理學同統計學嘅結合領域，研究點樣量度心理特性）上嘅知識[6][7]。
常見問題 編輯
响廿一世紀初，見工面試可以分做有結構[歐 2]同冇結構[歐 3]兩大類。冇結構嘅面試係指當咗場面試好似係傾閒偈噉談天說地；不過主流比較常見嘅係有結構嘅面試，即係話僱主會同一套標準化嘅方式嚟評鑑每一個嚟見工嘅人－佢會預先諗定一柞問題，對每個嚟見嘅人都係（大致上）問同一柞問題，而且對於「點樣先算係好嘅答案」或多或少噉心中有數[註 2][4]。
「有結構面試會問啲乜」份份工都會有啲唔同：人力資源管理上有所謂嘅工作分析[歐 4]工序，簡單講即係喺郁手請人之前列出嗮份工有啲咩要做（例如請軟件工程師會要求位工程師做寫程式等嘅工作），然後就分析呢份工需要啲咩技能同第啲特性，再按呢樣資訊嚟決定見工面試嗰陣要考乜（例如如果想請個識寫程式嘅人，可能會喺面試嗰度要求見嘅人即場寫個簡單嘅程式）[9]。不過無論係乜嘢工，見工面試通常都會問到以下呢啲問題[10][11]：
- 自我介紹（想理解見嗰個人嘅性格同能力）：
- 過往經驗（想知見嗰個人點樣處理工作上撞到嘅問題[12]）：
- 「你而家或者之前做嗰份工有冇咩地方係你零舍鍾意嘅？」
- 「你覺得自己事業上最大嘅成就係乜？」
- 「可唔可以講一次你同同事或者客有衝突嘅經歷？」
- 「可唔可以講一次你同同事或者老細意見不合嘅經歷？」
- 「可唔可以講吓你過往做過嘅一啲困難決定？」
- 未來期望：
- 「我哋可以期望你喺上任嘅頭三個月做到啲乜？」
- 「你覺得自己五年之後會變成點嘅樣？」
- 其他：
- 「你有冇咩問題想問？」
- 有關份工需要嘅專業知識嘅問題
... 呀噉。喺問完一輪之後，僱主通常會叫見工嘅人「返去等消息」，而見工嘅人可以問「要等幾耐」、「間公司嘅組織文化係點」或者「攞到呢份工嘅人事業跟住通常會點發展」等（招聘廣告嗰度冇講）嘅嘢[13]，而過咗一段時間（例如係三到四個禮拜）之後[註 3]，僱主就話俾見工嘅人知請唔請佢做嘢。
睇埋 編輯
註釋 編輯
參考 編輯
篇文用咗嘅詞彙或者專有名詞嘅歐洲語言名如下（如果冇講明，預設咗係英文）：
- ↑ Dipboye, Robert L.; Macan, Therese; Shahani-Denning, Comila (2012). "The Selection Interview from the Interviewer and Applicant Perspectives: Can't Have One without the Other". In Schmitt, Neal (ed.). The Oxford Handbook of Personnel Assessment and Selection. Oxford University Press. pp. 323-352.
- ↑ "The Value or Importance of a Job Interview". Houston Chronicle. Retrieved 2014-01-17.
- ↑ Fekom, M., Vayatis, N., & Kalogeratos, A. (2018). The warm-starting sequential selection problem and its multi-round extension. arXiv preprint arXiv:1809.07299.
- ↑ 4.0 4.1 Wiesner, Willi H.; Cronshaw, Steven F. (December 1988). "A meta-analytic investigation of the impact of interview format and degree of structure on the validity of the employment interview". Journal of Occupational Psychology. 61 (4): 275–290.
- ↑ Hollandsworth Jr, J. G., Kazelskis, R., Stevens, J., & Dressel, M. E. (1979). Relative contributions of verbal, articulative, and nonverbal communication to employment decisions in the job interview setting. Personnel Psychology, 32(2), 359-367.
- ↑ 6.0 6.1 Huffcutt, Allen I. (March 2011). "An Empirical Review of the Employment Interview Construct Literature: Employment Interview Constructs". International Journal of Selection and Assessment. 19 (1): 62-81.
- ↑ 7.0 7.1 Salgado, Jesus F.; Moscoso, Silvia (September 2002). "Comprehensive meta-analysis of the construct validity of the employment interview". European Journal of Work and Organizational Psychology. 11 (3): 299-324.
- ↑ Huffcutt, Allen I.; Conway, James M.; Roth, Philip L.; Stone, Nancy J. (2001). "Identification and meta-analytic assessment of psychological constructs measured in employment interviews". Journal of Applied Psychology. 86 (5): 897–913.
- ↑ Campion, Michael A.; Palmer, David K.; Campion, James E. (September 1997). "A review of structure in the selection interview". Personnel Psychology. 50 (3): 655-702.
- ↑ 27 Most Common Job Interview Questions and Answers. Inc.com.
- ↑ How to Nail a Job Interview — Remotely. Harvard Business Review.
- ↑ Janz, Tom (1982). "Initial comparisons of patterned behavior description interviews versus unstructured interviews". Journal of Applied Psychology. 67 (5): 577–580.
- ↑ Hagen, M. B. (2021). Interviewing for an Aesthetic Provider Position? Questions You Should Be Asking!. Plastic Surgical Nursing, 41(3), 156-158.
拎 編輯
- 10大見工面試常見問題要點答？求職新手做好準備增搵工成功率，呢篇文混雜粵文同語體中文。
- （英文） 27 條最常見嘅見工問題同答案. Inc.com
- （英文） 求職面試當中嘅講故事 | 英雄旅程，呢段 YouTube 片講到點樣喺見工嗰陣用英雄旅程呢個概念嚟講故仔。