南頭
想搵第二個意思嘅話，請睇南頭 (搞清楚)。南頭（Nam Tau或者Nantou）家下係中國深圳南山區嘅治所，係歷史古城，又係附近區域市中心。自公元331年設城起，有千幾年歷史，響南方海防同政治都有重要地位。南頭位於南頭半島根部，近前海灣，同后海灣（後海灣）相距唔遠。
歷史
編輯秦國攻入嶺南，南頭一帶就屬於南海郡，到之後南越國、大漢、吳國，南頭都係南海郡。東晉成帝咸和六年（331年），南海郡劃咗東官郡出來，東官郡郡治就係今日南頭一帶。到咗南朝梁國天監六年（507年）嗰陣，東官郡改名東莞郡，郡治搬咗去安懷縣，即係今日東莞境內。而個城就變咗寶安縣城，係寶安縣縣治。到咗隋開皇九年，即係589年，東官郡廢咗，寶安縣歸南海郡，但縣城就無變。到咗大唐開元廿四年（736年），個城變咗屯門鎮，有重兵註守。之後至德二年即係757年，寶安縣改名做東莞縣，縣治搬嘅去今日嘅東莞，個城就變咗係海防要塞。
而現有古城係大明洪武二十七年時（1394年）起，叫南頭城，係東莞守禦千戶所所城。萬曆元年，即係1573年，又響東莞縣劃返新安縣出來，縣治就響南頭城。到咗大清時期，為咗打擊鄭成功嘅勢力，防止沿海居民接濟佢。康熙元年到三年（1662年-1664年），兩次下令海禁遷界，撤走所有人，成個南頭城淨返城牆，屋磚都用來起界牆。到五年（1666年），因為人太少，廢埋新安縣，併入東莞縣。因為臺灣反清勢消減，到咗八年（1669年），廣東巡撫王來仁奏請之下重新置返新安縣，治所就響南頭城。到咗中華民國三年（1914年），新安縣因為同河南新安縣撞名，又改返原名做寶安縣，南頭仍然係寶安縣治。到第二次世界大戰期間，南頭落入日本手中，寶安縣治暫時就搬到東莞縣，直至到大戰結束先至歸返民國。到咗1949年10月，南頭落入中國共產黨手上，響城內成立寶安縣人民政府，變成中華人民共和國一部份。1953年，因為寶安縣深圳墟一帶有九廣鐵路，較為繁榮，就取代南頭嘅地位，成寶安縣治。1979年3月，寶安縣改做深圳市，南頭就歸入深圳市內。1980年深圳市做深圳經濟特區，南頭亦都係特區之內。1990年1月4號，深圳市成立南山區，同年9月24號區政府成立，區治就設響南頭。
南頭城城結構一直保存到近代，但因為成立經濟特區之後，過份睇重經濟發展，又吸引到大量人口遷入，南頭城嘅古建築受到嚴重破壞。