寶安
呢篇文講寶安縣。想搵深圳嘅市轄區嘅話，請睇寶安區。
提示：呢篇文講嘅唔係保安。寶安（粵拼：bou2 on1），喺中國廣東，舊稱新安（Sun On），家下係深圳市嘅市轄區，叫寶安區。佢原本係個縣，大清時叫新安縣，範圍包括而家嘅香港同深圳，民國改叫寶安縣，只淨低深圳部份。舊時香港同深圳原居民嘅籍貫，都會寫成「廣東寶安」。
名
編輯東晉初期，東官郡下置寶安縣。轄境包括今日東莞同深圳，而寶安個名，出自寶山，個山之所叫寶，因爲佢有銀礦，產銀。座山喺今日東莞之內。《輿地紀勝》講，舊以山有寶，置場烹銀，名石甕場，今山中銀滓猶存。《方輿紀要》講，又東十里為寶山，昔嘗置場煎銀於此，名石甕場，久廢。大明拆開東莞縣，開新安縣。民國爲咗唔撞縣名，新安用返古名寶安。
寶安之名，亦反映古代，呢帶係金銀開始採之地[1]。
地理
編輯寶安響省城東南。今日寶安比以前細好多。
山
編輯新安縣時，南有杯渡山（又叫「聖山」，古稱「屯門山」），東南有官富山，南有「老大鵬山」（家下嗌大嶼山）。三座山都喺家下香港境內[2]。
水
編輯新安縣時，東、西、南三面濱海。海中有零丁山，周圍係零丁洋。又南，頭沱濘、佛堂門、急水門、大嶼山、榕樹灣等澳，後四個響香港境內[2]。
史
編輯
寶安縣響大明同大清時，叫新安縣。
新安縣城一帶，係東莞守禦千戶所，大明洪武十四年八月置。1573年，萬曆元年由東莞縣分返出嚟變新安縣。縣管埋大鵬守禦千戶所，同係洪武十四年八月置。縣東南有官富巡檢司、西北有福永巡檢司[3]。
大清康熙六年，又將佢併入東莞，八年又分返出來。大嶼山設東涌所城。縣丞駐大鵬所。有福永、九龍二巡司[2]。
1841年至1898年期間，英國先後分三次將新安縣嘅地攞去做殖民地，即係而家嘅香港。首先南便香港島，道光廿二年割畀英國。咸豐十年，又割九龍寨屬地。光緒廿四年，又拓租九龍司屬地二百方英里，訂九十九年約，置九龍關榷稅[2]。
呢個代新安縣境，東北去歸善縣，西北去東莞縣，西南過海去香山縣，而南就係香港。
一九一二年中華民國成立，兩年後，一九一四年，新安縣改叫寶安縣。
一九四九年中華人民共和國成立，一九七八年搞改革開放，一九七九年將寶安縣改為深圳市，一九八二年分返出寶安縣。一九九二年，寶安縣併入深圳市，並將原本寶安縣西北，改叫寶安區，東北一忽，改叫龍崗區。