誤聽

誤聽m6 teng1（英文：Mondegreen）又叫做聽錯，係指將一首歌嘅詞嘅音用另一種話（譬如中文）嘅字註出字幕。轉指將外文聽成同本地語言類似字句嘅文字遊戲^{[未記出處或冇根據]}。

濕碎嘢

誤聽呢樣嘢嗰個莫名其妙嘅英文名，其實係有段故嘅；話說 1954年，美國作家 Sylvia Wright 寫咗篇短文〈The Death of Lady Mondegreen〉，入邊話：

When I was a child, my mother used to read aloud to me from Percy's Reliques. One of my favorite poems began, as I remember:

中譯：我細個嗰陣，媽媽成日朗讀珀西嘅《Reliques》（古代英語詩集）畀我聽。喺我記憶入面，有首我好鍾意嘅詩，開頭係噉：

Ye Highlands and ye Lowlands,

Oh, where hae ye been?

They hae slain the Earl Amurray,

And Lady Mondegreen.

最後一句嘅原文其實係｢And laid him on the green｣，但係細路仔聽錯咗。

大多係將原本歌詞嘅音樂短片加上字幕之後，以Flash嘅形式散佈，成日引起廣大嘅討論。

最有名嘅係2005年羅馬尼亞組合 O-Zone 嘅名曲《菩提樹下之戀》（Dragostea Din Tei），喺 2ch 上面，原歌詞「Nu mă, nu mă iei」畀人聽錯成「飲ま飲まイエー！」而且大肆流行，最後演變成艾迴唱片直接以誤聽版歌詞發行唱片。

另外德國流行曲兼舞蹈樂隊成吉思汗（Dschinghis Khan）嘅歌曲《Moskau》（めざせモスクワ，即係莫斯科）亦曾被為數甚多嘅 2ch 參與者誤聽成或者改詞成^{[未記出處或冇根據]}「もすかう」。

日本亦有電視節目以誤聽為題材。「Tamori 俱樂部」有一個稱為「空耳時間」（空耳アワー）嘅環節，就收集觀眾提供嘅誤聽歌詞（一般係來自日本以外嘅歌曲），然後將誤聽嘅部份拍成影片。通常，誤聽嘅部份只係佔歌曲嘅一小部份。

臺灣嘅誤聽歌詞，同樣亦來自世界各地嘅歌曲。比較早嘅例子，包括俄羅斯高音男歌手Витас（Vitas）嘅《歌劇2》（俄文：Опера #2），由於誤聽版本中有「打破你玻璃」、「No牙優毛巾」一句，而有「爛玻璃歌」、「優毛巾歌」等嘅別名。

其後，臺灣亦有網友投入製作唔同地方歌曲嘅誤聽。

印度歌手達雷爾·馬哈帝（旁遮普文：ਦਲੇਰ ਮਹਿੰਦੀ）嘅歌曲，亦成為臺灣網友惡搞誤聽嘅題材。最早嘅例子有《Tunak Tunak Tan》（ਤੁਣਕ ਤੁਣਕ ਤੁਣ），俾批踢踢實業坊（PTT）嘅Joke版版友ock64改編誤聽並加上字幕，上傳到 YouTube。因為《Tunak Tunak Tan》音樂錄影帶嘅內容，達雷爾·馬哈帝畀臺灣網友戲稱為印度F4。

呢首誤聽嘅出現，亦帶動咗臺灣網民改編印度歌曲誤聽嘅熱潮。如印度歌手赤拉尼維因佢嘅歌曲《Goli Mar》而被惡搞成“印度米高積遜”。

香港網民改編誤聽，比起臺灣來就遲啲。^{[未記出處或冇根據]}比較為人熟悉嘅，係從「幪面超人X」嘅泰語版改編出來嘅粵語誤聽《泰國幪面超人》。歌詞包括「馬個屁股變菊花」、「帶港幣八蚊」等。

除《泰國幪面超人》外，無綫電視劇集《強劍》主題曲泰文版亦出現粵語誤聽。

前述嘅誤聽歌詞，都係將外國歌曲轉化為本地語言而得出嘅；不過，亦有部份誤聽歌詞，係從同一語言改編過來嘅。