康泰旅行社

康泰旅行社（英文：Hong Thai Travel；香港旅行社牌照號碼：350070）係香港其中一間主要旅行社，1966年創辦，而家有1,100名職員同30幾間分社。除咗香港之外，喺澳門、廣東省、美國、加拿大、新加坡、泰國、台灣都有分公司。

歷史編輯

康泰旅行社由黃明銓喺1966年成立^[1]。主要業務係代訂機票、船票同營辦入境遊。到咗1968年，黃明銓個仔黃士心接手康泰，當時公司只有12名員工。1977年，因為香港立例規定七日有薪勞工假期，所以康泰推出各款東南亞旅行團，以「早機去，晚機返，玩足七天」作為宣傳。

康泰1985年喺新加坡設立分公司；1992年喺深圳開設分社；1999年6月喺廣州開設中國第一間中港合資旅行社；2000年11月，旅行社投資逾400萬元開設全港第一間電話服務中心。

2002年前，康泰旅行社總部設喺荔枝角。

2002年2月，由康泰旅行社黃士心或有關人士以大約9,109萬元購入香港金鐘統一中心5樓全層^[2]，作為新總部。新總部喺同年12月10號開幕，面積達31,410方呎，總部內更有用咗30萬元裝修嘅豪華桑拿浴廁^[3]。

2003年，「沙士」肆虐，香港旅遊業面對前所未有嘅衝擊。康泰嘗試推出停辦咗7年嘅本地遊，結果廣受市民歡迎。同年7月，內地放寬個人遊政策，康泰舉辦「香港非常遊」同埋贊助TVB拍攝13集「香港非常遊」電視特輯^[4]。

2011年5月16號，明報報導康泰董事長黃士心證實海南航空母公司海航集團已經購入康泰51%控股權。市場估計成單交易作價大約7億港元^[5]。

2018年5月14號，總部由統一中心5樓全層搬去荃灣中染大廈26樓。同時傳出賣盤消息，將股份悉數轉讓畀「勝投國際投資有限公司」，同香港航空母公司海航集團有關。康泰發言人無回應事件。^[6]

2019年2月，黃士心父子辭任康泰董事，並將公司剩低嘅49%股權都賣畀海航，正式退出康泰嘅營運。^[7]^[8]

2020年開始受全球肺炎疫情影響，業務受到打擊，卒之到2022年10月因資不抵債開始清盤程序。

前董事長：黃士心
前總經理：
- 劉美詩（1987-2010） [1]^{[失咗效嘅鏈]}，經常就有關香港人外遊事務接受香港媒體訪問。^[9]
- 黃進達（Jason）（2010-2019）
高級副總經理：劉美詩（2016-）獲康泰董事長黃士心同佢個仔總經理黃進達邀請，再度效力康泰。
副總經理：陳建鵬

1997年8月，一個40幾人嘅康泰菲律賓旅行團喺馬尼拉灣坐觀光船遊覽期間，因嚴重超載同埋船隻結構有問題釀成沉船意外，7名港人喪生。
2010年8月23號，一個康泰旅行團喺菲律賓俾槍手挾持，全團連領隊一共21人，其中6人獲釋；其後當晚19:20後情況惡化，事件導致領隊謝廷駿同7名團友死亡，之後槍手都俾警察擊斃，另外有7名團友受傷。（馬尼拉人質事件）
2011年10月6號，一個康泰旅行團巴士停泊喺中國北京嘅一個餐館停車場。當團友準備落車嘅時候，一架旅遊巴士突然溜前。當時全團連領隊有24人，其中3人因走避不及，被撞倒喪生，領隊受輕傷。
2012年2月，康泰不顧香港政府對菲律賓發出黑色旅遊警告下，同一個團購網開辦菲律賓旅行團，而且無喺行程單張寫明菲律賓嘅黑色旅遊警告。