愉園體育會
愉園體育會（Happy Valley Athletic Association；簡稱愉園，別稱快活谷）係香港一間具有半地區性質體育會，屬下有足球隊、籃球隊、游泳部、拯溺、乒乓部、田徑隊同埋興趣班，以其足球隊最知名。
 | |||||
| 全名 | 愉園體育會 | ||||
|---|---|---|---|---|---|
| 外文全名 | Happy Valley | ||||
| 花名 | 快活谷 | ||||
| 創會 | 1950年 | ||||
| 主場 | 深水埗運動場 （容納人數：2,194人 ） | ||||
| 會長 | 貝鈞奇 | ||||
| 主席 | 陳志實 | ||||
| 主教練 | 鮑家耀 | ||||
| 打緊聯賽 | 香港超級聯賽 | ||||
| 2019–20 | 港超，第 6 位 | ||||
| 網 | 球會網站 | ||||
| 波衫供應 | adidas | ||||
| |||||
足球隊 編輯
愉園體育會屬下足球隊喺1950年成立，創辦人包括五位僑光中學舊生：吳啟智、張炳發、張炳雄、謝觀揚同埋葉榮添，1957年加入香港丙組足球聯賽，兩年內連奪丙組同乙組聯賽冠軍，直升甲組，1965年第一次攞甲組聯賽冠軍。六七暴動期間曾一度退出港甲，至1970年先至重返甲組，此後喺七、八十年代，愉園一直都維持喺港甲前列位置。1997年至2007年間更加係愉園嘅黃金時代，四奪港甲冠軍，近年港隊代表例如李偉文、范俊業、蔣世豪都曾經係愉園主力球員。到2008年起步入低潮，成日話唔夠班費，球會六十周年之際，重有國援球員于洋打假波被判監，同年護級失敗跌落乙組作賽。
2013年，愉園獲得2012－13年度香港乙組足球聯賽球季亞軍，闊別三年後重返甲組。
升上甲組後，愉園由甲組聯賽前神射手科士打擔任主教練。科士打喺12月因為唔滿意贊助商干預戰術部署而辭咗主教練職務，總監鄺曉明都喺同一個月以同贊助商出現分歧為由宣佈離隊，球隊陷入群龍無首狀態，成個12月深受負面新聞困擾。其中喺12月21號主場大敗1－5畀傑志嘅聯賽入面，陣中球員內訌，令人揣測會唔會係打假波。
2014年1月5號，愉園以0－5大敗畀日之泉JC晨曦。賽後，廉政公署人員闖入青衣運動場更衣室，將愉園全隊球員同部份職員帶走調查。其後，廉政公署以涉嫌打假波正式拘捕愉園六名球員，包括：巢鵬飛、劉嘉城、賓曹、保素域斯、沙沙麥斯、助教兼球員樊偉軍，行政主任梁倬軒同埋一名贊助商代表。而香港足球總會喺1月8號發表聲明，話會安排之前為調查屯門疑似假波事件而成立嘅專責委員會審查埋愉園喺管治方面同埋財務狀況可唔可以繼續參加嗰季剩返嘅賽事，又決定即時延遲愉園嘅賽事一個月，直至專責委員會發表調查結果為止。經過一個月嘅調查，專責委員會宣佈愉園畀唔出充分證據去證明佢哋喺財政能力上嘅穩健性可以達致一間甲組球會應有嘅水平，所以根據香港足球總會條例，暫停冚嘭唥有關愉園喺2013年－14年度球季剩低嘅賽事，但上述安排唔包括預備組同埋青少年組別賽事。
判決公佈後，愉園主席貝鈞奇隨即表示會就足總未有公佈理據下，就以未能充分證明財政穩健性為由取消參賽資格一事，去信亞洲足球協會投訴足總處事不公，又計劃向國際體育仲裁法庭提出上訴。但其後愉園喺大部份職球員，包括涉案嘅巢鵬飛同樊偉軍都宣佈離隊他投下，嗰個球季就噉不了了之。
2015–16年香港乙組聯賽，愉園護級失敗降至丙組，兩個球季連降兩級。2016年夏天，愉園重組球隊，吸納來自東昇同車路士足球學校（香港）嘅楊立威、何直軒、葛浚浠、朱偉鈞等年青球員，同時重辦U18梯隊。最後喺2016-17年香港丙組聯賽以21勝4和1負[1]攞冠軍升上乙組。2017-18年香港乙組聯賽再以19勝6和1負[2]攞冠軍升上甲組，兩個球季連升兩級。
2018年7月，官方重組官方球迷會，為2019-2020年香港超級聯賽球季準備。2018-19年香港甲組聯賽，愉園開季連贏13場，至2019年2月3號先至頭一次和波[3]。最後以26戰22勝2和2負68分，得失球差84完成球季。
總括愉園嘅戰績，渠哋攞過6次香港頂級聯賽冠軍，最近一次係喺2005/06年度球季囓甲組聯賽，奪冠次數僅次於南華足球隊同埋精工，另外重攞過2次足總盃、5次高級銀牌、1次聯賽盃冠軍。
球會文化 編輯
愉園嘅誕生係因為幾名創辦人對足球嘅熱誠，並且以愛國主義作為足球隊嘅理念。但係佢哋5位創辦人嘅母校係僑光中學，足球隊後尾嘅資金來源又係嚟自中資企業，因此愉園被稱為公認嘅親中派（左派）。「亞洲第一中鋒」鍾楚維曾經講過喺效力愉園嘅12年期間，曾經被派遣去廣州學習毛澤東嘅愛國主義，更曾經喺球會嘅安排下，同左派企業高層食晏，而且當時足球隊嘅擁躉好多都係左派人士。中華人民共和國退出國際足協之後，佢哋重係頭一支訪問北京、上海嘅香港足球隊。
攷 編輯
- 〈老牌球隊愉園曾聯賽六奪冠〉 (繁體中文). 太陽報 (香港). 2014-01-07.
