所羅門嘅審判

《所羅門嘅審判》（粵拼：so2 lo4 mun4 ge3 sam2 pun3 / 希伯來文：משפט שלמה‎）係《舊約聖經》入面一個幾廣為人知嘅故仔，記載於《列王紀上》。個故仔講到有兩個女人喺度爭一個蘇蝦仔，兩個都堅持聲稱自己係個蘇蝦嘅親生阿媽，而不溜出晒名聰明嘅所羅門王就憑住佢嘅智慧，成功搵出邊個先至係真正嘅親生阿媽。

呢幅 19 世紀嘅畫描繪想像中《所羅門王嘅審判》入面嘅情境。

故仔

《所羅門嘅審判》個故仔係噉嘅，出於《列王紀上》嘅第 3 章第 16 至 28 節。

話說有一日，有兩個妓女喺度嗌霎saap3。佢哋嚟到所羅門王面前，想所羅門王幫佢哋主持公道。

其中一個妓女開口，原來佢同另外嗰個妓女住同一間屋，兩人都各自生咗個蘇蝦仔。開口嗰個妓女作出指控，話另外嗰個妓女瞓覺嗰時唔小心，砸zaak6死咗自己個蘇蝦，然後竟然偷偷哋將死咗嘅蘇蝦同生勾勾嗰個對調，諗住瞞天過海。而對於呢個指控，另外嗰個妓女係矢口否認。

「你先係唔小心砸死咗個蘇蝦，然後走嚟想偷我嗰個！」

所羅門王諗咗陣，然後就開聲：

「同我攞把劍嚟。」

僕人照做，攞咗把劍畀所羅門王。所羅門王下令：

「將個蘇蝦一嘢斬開做兩橛，兩個妓女一人得到一橛。」

所羅門王：你哋兩個都想要個蘇蝦呀？噉我將個細路一劍斬做兩份囉lo1。 親生阿媽：唔好呀！佢咁想要個蘇蝦，就交畀佢啦！ 所羅門王：你哋兩個都想要個蘇蝦呀？噉我將個細路一劍斬做兩份囉lo1。 親生阿媽：唔好呀！佢咁想要個蘇蝦，就交畀佢啦！

其中一個妓女一聽到就心慌，哀ai1所羅門王：

「等陣呀，我嘅王！求吓你唔好殺個蘇蝦！佢咁想要個蘇蝦嘅，將個蘇蝦交畀佢啦！」

而另外嗰嗰妓女就冷漠噉講：

「哦，噉都好吖。」

所羅門王望住兩人嘅反應，就作出判決：

「一聽到要殺個蘇蝦就心慌嗰個，就係個蘇蝦嘅親生阿媽。」

冇幾耐，成個以色列上下都得知所羅門王點樣用智慧解難，個個都更加敬重所羅門王。

影響

廿一世紀初影到呢座雕像，描繪想像中嘅所羅門王。

聖經對成個西洋世界都影響深遠，西洋歷史上嘅文藝創作品不溜都成日會描繪聖經故事，包括《所羅門嘅審判》。例如係好出名嘅文藝復興藝術家拉斐爾，就試過畫濕壁畫描繪呢個故事。

除此之外，世界多地嘅創作品都有受過聖經影響，例如港產片《審死官》同埋香港嘅電視劇《回到三國》等，都有講到類似《所羅門嘅審判》嘅情節。

拎

• 維基同享中有關所羅門嘅審判嘅資源類
• 所羅門嘅審判 （英文），電視橋段網講呢個故仔。