手鈴
手鈴（英文：handbell）係一種敲擊樂器。由鈴身、手柄同擊錘三部分構成。鈴身決定手搖鈴發聲，亦決定單個手鈴嘅音高，一般由銅製成。手柄通常由皮製成，目前亦有用塑料製作嘅手柄。擊錘由螺絲固定喺鈴身中，可以透過調整擊錘嚟決定手鈴嘅響度。樂手可以用多種方式演奏，最常用嘅方式係手搖，而手鈴中嘅擊錘會碰撞鈴身而發聲。由於單個手鈴具有特定音高，因此手鈴一般都包含有一定數量音階成套配置。
歷史
編輯手鈴音樂源自英國嘅教堂鐘樓音樂，已經超過一百年的歷史。原本係為咗方便編曲而製造嘅樂器，後來因為佢獨特嘅演奏方式，發展成為一種新興嘅表演藝術。一套手鈴由多個唔同音高嘅手鈴組合而成，好似放大咗嘅鋼琴琴鍵。手鈴嘅聲音清脆動人，容易令人聯想起聖誕節同感受到歡樂嘅氣氛。
演奏
編輯手鈴演奏除咗獨奏之外，亦可以由多人組成嘅手鈴隊或小組合奏。手鈴音樂需要由一班人合作演奏，每位隊員喺當中都有相同嘅重要性，每人負責唔同嘅音階。演奏手鈴嘅時候，觀眾除咗欣賞到美妙嘅音樂之外，更加能夠目睹隊員之間完美嘅配合。台上雖然有多位演奏者，但主體只有一個。
手鈴嘅音域可以達至7個半八度（G1-C9），手鈴音色清澈動人，有多種演奏技巧。唔同嘅演奏技巧可以奏出唔同嘅音色，喺樂曲中營造出唔同嘅層次。演奏方法包括搖打（Ring）、撥奏（Pluck）、捶奏（Martellato）、姆指停頓（Thumb Damp）、顫音（Shake）等。手鈴唔單止可以單獨演奏，亦可以同合唱團或其他樂器一齊合奏，例如：小提琴、長笛、管風琴、銅管樂器、甚至管弦樂團。除咗合奏之外，手鈴亦可以個人獨奏或小組合奏。