聖誕節

聖誕節係基督敎紀念耶穌出世嘅日子，響12月25號。雖然一直有人誤會呢一日係耶穌生日，但係近年查實，係敎會將西方原本冬至之後嘅各地風土宗敎慶祝活動，變為基督敎節日。雖然呢個係宗敎節日，但係因為呢個節日主張去祝福人，送嘢畀人，祥和，開心同家庭團聚，所以就算唔多信徒嘅地方都好重視。有人話其實耶穌係響6月出世嘅，而且唔係響公元1年，而係公元前6年。

聖經嘅東方三博士嚟朝見耶穌。

一樖聖誕樹。

響20世紀後期，個節日配合商業活動同好多非基督徒慶祝，宗敎氣氛已經大為轉淡。

聖誕節前一晚，即係12月24號晚叫平安夜。而之後嗰日，12月26號叫拆禮物日（Boxing Day）。

東正敎嘅聖誕節都係12月25號，不過係用儒畧曆計，目前相等於額我畧曆嘅1月7號。

喺一啲傳統宗派，例如天主教，聖誕節技術上係十二日嘅節慶，叫聖誕期，由聖誕節正日（計埋平安夜）開始，直到主顯節之前嗰日，每日有唔同嘅紀念。

名

聖誕節係基督敎節日，所以喺基督敎，中文名只係加咗一個 ｢聖｣ 字，等個名唔使太短；有啲地方（例如臺灣）就慣用耶誕節，表明係紀念耶穌。西方就有啲地方直接用一個 ｢誕｣ 字，好似西班牙文嘅 Navidad 咁。

英文嘅 Christmas 係 Christ 加後綴 -mas，意思係基督慶日（或者基督彌撒），其實比較接近 ｢耶誕節｣；佢嘅簡寫 Xmas 嘅X其實係希臘字母 Χ（chi），係希臘文 Χριστός（基督）第一個字母，所以X係代表基督。

雜錦

雖然對西人來講，聖誕節係一個陪屋企人嘅節日，但香港人就成日都當佢係拍拖嘅日子，即係同情人節差唔多，所以好多人都會覺得聖誕節冇拖拍係好慘嘅。

聖誕節對流行文化都好大影響，例如好多香港嘅流行曲都同聖誕有關，咁就可以應下節，增加首歌嘅播放率。出名啲嘅「聖誕流行曲」有吳浩康嘅「又到聖誕」（2005年）、古巨基嘅 "Santa Claus"（1997年）、Cookies 嘅 "Merry Christmas"（2002年12月23號）、鄭伊健嘅「夜還未深」（1994年）等。

各地聖誕習俗

• 香港聖誕文化
• 日本聖誕文化

睇埋

• 合桃鉗芭蕾舞劇