打甂爐

打甂爐，俗寫打邊爐，又叫火鍋，係煮食方法一種，用一大煲滾水或湯底，食嗰個人自己將各種切好嘅肉、菜，原隻海鮮或者現成或加咗工嘅肉丸等等食物掟晒落去煠熟，喺啲食物熟咗之後點調味料就食得。

打甂爐

亞洲各地都有唔同特色嘅打甂爐。

種類

鴛鴦鍋

• 麻辣火鍋：既「麻」又「辣」，源自中國重慶。
• 沙嗲湯底：將沙嗲醬放入湯底，香港常見。
• 鴛鴦鍋：主要係為唔食得辣同埋鍾意食辣嘅人而設，煲中間有嚿鐵（隔板），分開沙嗲湯底同清湯底。
• 「涮羊肉」：北京嘅特色，將羊肉（後來加埋肥牛），菜，豆腐…放入滾水煠一煠，點啲醬食得。由於羊肉薄，拖一拖水就食得。
• 酸菜白肉鍋：主要材料係酸白菜同豬五花肉，流行於中國東北。
• 清湯底：只係用清水，啲嘢熟咗搽調味料就食得。其實煲湯好快就將掟落去嘅食物精華吸收，變成一煲集各家大成，唔知乜味嘅。
• 醉雞鍋：用半隻至一隻雞連同花雕酒、杞子呢啲藥材做湯底，香港廣東各地流行。
• 韓式火鍋：以韓國泡菜做湯底。
• 日式火鍋：以麵豉（味噌）做湯底。
• 芝士火鍋：源自瑞士，香港普遍流行。

俚語

皆因成班人圍住一個煙灰缸食煙嘅情景睇落好似打甂爐，所以香港人就將呢種情景比喻做打甂爐。