撇號
用法 編輯
縮寫 編輯
撇號喺西方語言入面最常見嘅用途大概就係用嚟寫縮寫詞。以英文為例，「not」可以縮短為「n't」、「would」可以縮短為「'd」、「have」可以縮短為「've」等。例如：
- 全寫：I would have loved to join you, but I could not; I had work this weekend.
- 縮寫：I would've loved to join you, but I couldn't; I had work this weekend.
值得注意嘅係「have」淨係標明完成式個陣先可以縮寫。如果「have」係主要動詞（含「有」嘅意思）就一定要全寫（例：「I have work this weekend」，而唔係「I've work this weekend」）。
英文亦都有好多非正式口語嘅縮寫用撇號標明，例如「'cause」（because）、「'n'」（and）、「'em」（them）等。
有啲英文口音仲會有雙重縮寫，例如「shouldn't've」、「couldn't've」、「wouldn't've」等，但係書寫通常淨係會寫「shouldn't have」、「couldn't have」同「wouldn't have」。
用撇號嚟縮寫喺法文亦非常之常見。法文通常有兩個元音並排就會縮寫，例如「我有」會縮短成「j'ai」而唔係「je ai」。同英文唔同嘅係，法文嘅縮寫係強制性嘅，所以「j'ai」係唯一一個正確嘅寫法，「je ai」係唔正確嘅。
雖然「你係」喺法文嘅正式寫法係冇縮寫嘅「tu es」，但係「t'es」喺民間亦都非常普遍。
單引號 編輯
撇號喺一啲語言入面亦都有做單引號嘅用途。值得注意嘅係，英式英文會先用單引號（'……'）再用雙引號（"……"），但係美式英文同絕大部分用撇式引號嘅語言都會先用雙引號（"……"）再用單引號（'……'），漢字簡化字亦係其中。
屬格 編輯
撇號喺英文仲有一個標記屬格（英文：genitive case）嘅用途，喺名詞嘅尾端加「's」，例如「the dog's tail」、「John's house」。如果名詞嘅尾端已經有個「s」嘅話，就淨係加個撇號（「Charles' bike」、「Agnes' cat」），讀「es」。
隔音號 編輯
喺好多羅馬化系統入面，撇號有一個隔音嘅用途。譬如喺官話拼音入面，「西安」會寫成「Xi'an」，因為如果寫成「Xian」嘅話會同「先」字混淆。臺北捷運嘅站名並唔用隔音號，所以唭哩岸站（Qīlǐ'àn）如果齋讀英文名嘅話有機會讀成「祁連」（Qílián）。
日文嘅黑本式羅馬字（日文：ヘボン式ローマ字 Hebon-shiki rōmaji）嘅「ん」喺元音同「や」、「ゆ」、「よ」之前會有一個隔音號，例如「Kan'onji-shi」（観音寺市；觀音寺市）。
雖然耶魯粵語拼音冇指定用隔音號，但係可以跟官話拼音嘅規則，避免「將軍澳」（Jēunggwān'ou）同「將『瓜怒』」、「恆安」（Hàhng'ōn）同「痕乾」混淆。不過粵語比官話仲多三個特別例子，咁就係「gw」、「kw」同「ng」字頭，所以「宋王臺」（Sung'wòhngtòih）、「白雲」（Baahk'wàhn）同「沙鵝」（sā'ngòh）都要隔音號。值得注意嘅係，「yu」喺耶魯拼音入面係元音，所以跟輔音嗰陣要隔音號，但係「ya」、「ye」、「yi」就唔使（例：「Jāk'yùhchūng」（鰂魚涌）、「Gūng'yùhnchìhn」（公園前））。
相似符號 編輯
撇號亦有好多相似但係唔同嘅符號。如下：