新和站 (廣州地鐵)

新和站（粵拼：san1 wo4 zaam6；英文：Xinhe Station）係廣州地鐵14號綫嘅主綫同支綫之間嘅轉車站，2017年12月28號開通，喺白雲區新和，廣從公路近九龍大道口（105國道嘅K2516+250標記位）上空。

新和 XINHE
新和站嘅站名
概覽
冧巴	1408
位置	白雲區新和，廣從公路近九龍大道口。 105國道嘅K2516+250標記上空
座標	23°24′48.65″N 113°28′00.33″E
車站色	+玻璃牆面
經過路線	14
啟站	2017年12月28號
月台數	2
站口數	4
營運資訊
車站服務時間	06:05～23:23
列車服務時間	06:10～23:18
廣州地鐵14號綫（主綫快車） 嘉禾望崗　◄白雲東平 （25.9km） （19.4km）從化客運站►　東風
廣州地鐵14號綫（主綫慢車） 嘉禾望崗　◄馬瀝 （2.8km） （5.2km）太平►　東風
廣州地鐵14號綫（知識城支綫） （3.1km）紅衛►　鎮龍

佢既係廣州地鐵系統有史以嚟，第一個兩條綫都喺高架入面轉乘嘅車站；又係14知識城支綫西北邊嘅尾站。曾經喺2017年12月28號到2018年12月28號中午期間，做過廣州地鐵系統最北邊嘅車站同埋早期14號綫脫網營運期間嘅車站。

結構

外觀

從出面睇新和站嘅樣

同其它14號綫嘅高架站一樣，呢個站嘅外觀方面，個樣似高鐵嘅高架站多啲，其中2樓部份睇落似玻璃牆。但佢有個地方同琶洲嘅會展中心唔一樣嘅係，呢個站最頂冇大隻紅字印住個站名響度。

樓層

呢個站有三層樓嘅地上室。其中地面係105國道同九龍大道及其它周邊建築，地上二樓係站廳，地上三樓係14號綫月台。站內既有休息室，又有廁所，更加有母嬰室。其中休息室有4個，喺14號綫月台範圍入面，每個月台各有兩個。而廁所同母嬰室喺站廳收費區入面近東邊牆邊範圍，其中母嬰室喺廁所嘅女廁門口隔籬。

打掂

地上 三樓	2月台	← 14號綫列車去馬瀝站（主慢）／白雲東平站（主快）（行嘉禾望崗嗰邊）
	島式月台，開左（主綫）／右（知識城支綫）邊門
	4月台	14號綫終點月台（支）
	3月台	14號綫列車去紅衛站（支） →
	島式月台，開左（主綫）／右（知識城支綫）邊門
	1月台	14號綫列車去太平站（主慢）／從化客運站（主快）（行東風嗰邊） →
地上 二樓	站廳	售票機、客服中心、商舖、警務室、安檢設施
地面		出入口

打橫

新和站嘅站廳

新和站嘅月台

站廳

新和站嘅站廳收費區喺車站中間，南北兩邊係免費區，兩邊唔相通。收費區有好多部扶手電梯同樓梯、專用𨋢往返月台都得。

月台

呢個站有兩個島式月台，喺廣從公路近九龍大道口嘅上空。

另外，喺呢個站西南邊有條交叉渡綫，同埋車站西南、東北兩邊夾埋有三條波口位響度。其中西南邊嗰橛交叉渡綫用嚟畀知識城支綫啲車到咗呢個站西北邊月台清客之後，跟住入去交叉渡綫兩邊等出車返轉頭到東南邊月台上客。而西南邊嗰兩條道岔分別喺交叉渡綫同月台西南邊之間，專門用嚟畀喺主支綫貫通時，啲車就嚟到站時用。而東北邊條波口位喺突發事件情況下先至會用到。

而快綫車停站方面，喺2018年12月28號14:00開始營運之後一直到2019年12月19號20:45嘅最後一班嘉鎮快車開出之前，凡係從嘉禾望崗去東風嗰邊或從東風到嘉禾望崗嗰邊啲車都喺月台最開嗰兩條軌道停，而從嘉禾望崗去鎮龍嗰邊或從鎮龍到嘉禾望崗嗰邊啲車都喺月台最埋嗰兩條軌道停。從2019年12月20號開始，由於嘉鎮快車正式永久性取消，冚唪唥快車都喺嗮月台最開嗰兩條軌道停，而月台最埋嗰兩條軌道淨畀知識城支綫嘅慢車停。

每次知識城支綫到咗呢個站之後，喺2019年12月19號最後一班快車（20:45）收車之前，若果下一班咁啱係從鎮龍出發開去嘉禾望崗嗰邊嘅快車，乘務員唔單止會以人工廣播嘅方式反復特別提醒冚唪唥乘客必須要離開啱到呢個站停嘅慢車車廂，唔畀上車，而後邊嗰部快車都會有兩次臨時停車，直到知識城支綫部慢車入嗮存車綫後先至有得入站畀人上車。不過從2019年12月20號開始，由於嘉鎮快車正式永久性取消，所以每次知識城支綫到咗呢個站之後都要清客，唔畀再喺4號月台繼續等快車。

商舖同自助服務

呢個站暫時冇任何商舖同自助服務。

出入口

新和站冚唪唥嘅出入口
A出入口 A出入口  B出入口 B出入口  C出入口 C出入口

呢個站有3個出入口，分别係A、B，C。

冧巴	標記	方位	去到邊度
出入口A	廣從九路	南	廣從九路、地鐵新和總站（東北行）
出入口B	廣從九路	東	廣從九路、新和巴士站（西南行）
出入口C	廣從九路	西	廣從九路
出入口D	未開通		（暫時唔好喺呢度出入）
註： 有盲人引導徑 | 有輪椅升降臺 | 有斜道 | 有𨋢

頭尾班車信息同配線圖

配線圖
█ 14號綫 ▲太平站（慢）／從化客運站（快）
	▶　紅衛站（知）
▼馬瀝站（慢）／白雲東平站（快）

行去邊頭	頭班車	尾班車
每日
14號綫
嘉禾望崗站	06:21	22:57
東風站	06:15	23:18
鎮龍站	06:10	22:30
注意： 喺晚黑最後一班車開走之前嗰5分鐘之內， 係唔畀入閘坐車（包括埋買車飛）。

車站歷史

規劃

呢個站最先喺2003年份地鐵規劃方案出現。嗰時嘅新華綫由花都汽車城出發，先經過人和同太和，再跟住廣從公路去到從化街口為止。但嗰時路線經過廣從公路同九龍大道嘅交界。但2005年，新華綫嘅西段（花都汽車城⇆高增）被列入咗9號綫一部分，而廣從路段（太和⇆街口）直到2008年份規劃先至重新提出。

2010年，爲咗落實廣州市嘅「北優」發展戰略同埋支持從化同埋知識城嘅發展，嗰時份規劃話起14號綫，路線要起成「人」字樣。其中分岔位揀咗呢個站做分岔，位置亦揀喺廣從公路近九龍大道口以西南250m地方起。其中路線亦提出咗快綫，中途唔理係快綫定慢綫必定經過呢個站。本嚟計劃喺2011年喐手起，但開工期間一拖再拖，拖到2014年秋先至喐手起。

施工

• 
  2016年2月10號，車站有些少施工跡象。
• 
  2017年5月14號，站廳同緩衝樓樣已經出現。
• 
  2017年11月26號，車站已經起好嗮。
• 
  2017年12月31號，雖然支綫已經開通咗，但主綫重喺度鋪緊軌。
• 
  2018年7月16號，雖然主綫軌道嘅第三軌已經裝咗，但木枕重未裝。
• 
  2018年11月5號，從車站出面望去2號月台附近，發現有14號綫啲車喺度搞主綫調試。

本嚟車站諗住喺2014年秋開始喐手，但係入場施工嗰時咁啱撞正門釘，因為地鐵所經過嘅地方係高架，重涉及拆咗新和地區夾埋47間民宅同廿單村社集體物業。雖然有29戶村民同廿單村社集體物業都同意起地鐵站，但重有18戶村民一直唔肯簽約，直到2015年5月13號，喺凈低嗰18戶村民當中，有3戶成功簽約而搬走咗，凈低嗰15戶因為俾政府查出係違章建築而被強拆。隨後地鐵方喺2015年6月27號開始入場施工，期間重將知識城支綫橫穿過嘅一間廢棄加油站都拆埋。而高架同盾構先後喺2016年10月30號中午同埋2017年1月12號先至挖通同合攏，車站工程直到2017年12月11號先至起好嗮。

開通

2017年12月28號朝頭早，由於14號綫知識城支綫部份正式開通，呢個站亦正式開放，期間凈係開咗3同4月台嚟搭車。直到2018年12月28號14:00（UTC+8），由於14號綫一期主綫全綫通車，原先1同2月台亦正式開始畀人搭車上落都得。

利用狀況

呢個站喺初期開通時，主要客流都係近新和地區啲村民，以及去知識城北、九龍鎮一帶啲居民同村民為主。由於2017年12月28號開通嗰時重未加入地鐵綫網，所以客流都比較少下。嗰時亦有啲乘客貪方便而搭地鐵到呢個站轉搭巴士到廣州或從化地區。自從一期主綫喺2018年12月28號14:00（UTC+8）正式對外營運之後，客流多咗好多，亦成為往返白雲區西南邊、從化、增城之間嘅客流運輸中心。

轉車須知

轉車方面，若果喺知識城支綫同14號綫主綫之間轉車嘅，必須要噉做：

14號綫主綫→14號綫知識城支綫

指定種類	終點到邊度	轉車方法	註
快車	東風	直接行過對面月台上車	如無意外，對面100%機會都有車上。
快車	鎮龍	直接喺原嚟月台等下班車	2019年12月20號頭班車開始正式取消
快車	嘉禾望崗	要落一層樓到站廳，行去對面嘅樓梯或電梯再上返去先至得。
慢車	東風	直接行過對面月台上車
慢車	嘉禾望崗	要落一層樓到站廳，行去對面嘅樓梯或電梯再上返去先至得。

14號綫知識城支綫→14號綫主綫

• 去嘉禾望崗嗰邊：直接行過去對面月台就得。
• 去東風嗰邊：要落一層樓到站廳，跟住行到對面嘅樓梯或電梯行返上去先至轉到。

接駁交通

冧巴	營運範圍	註
650	大羅村↔九佛
714	鐘落潭文化廣場↔花都北興汽車站
725	鐘落潭文化廣場↔登塘村
節假日專綫13	九佛↔廣州火車東站	凈限禮拜五晏晝同晚黑；禮拜六、日全日；節假日及前一日晏晝服務。

附近嘅建築同景區

• 新和學校
• 新和村

註同攷

註

攷

上一站·下一站

上一站⇚⇚　　　　廣州地鐵　　　　⇛⇛下一站
馬瀝站 嘉禾望崗站←	新和站 14號綫（主綫慢車）	太平站 →東風站
白雲東平站 嘉禾望崗站←	新和站 14號綫（主綫快車）	從化客運站 →東風站
終點	新和站 14號綫（知識城支綫）	紅衛站 →鎮龍站