旺角大球場(俗稱旺角場旺丁場英文Mong Kok Stadium)係香港一個主要嘅足球場,喺旺角花墟道37號,由康樂及文化事務署管理

重建後嘅旺角大球場(2015年)
重建後旺角大球場進行嘅甲組足球聯賽比賽。

歷史 編輯

旺角大球場前身為陸軍球場,1961年移交前市政局。旺角大球場早期叫做市政球場[1],市政局喺1973年6月16號開放啟用嗰時叫做旺角大球場[1][2]

改善工程 編輯

1990年9月,第一次改善工程進行,剷除咗田徑跑道,草坪面積擴大,座位增加到7,500個。改善工程期間,香港甲組足球聯賽賽事移師深水埗運動場。第二年底,改善工程完成。

1992年,入場球迷數字上升,加上香港大球場需要重建到1994年,市政局為咗增加座位,年中喺旺角大球場加建咗兩座鋁質嘅臨時看台,令觀眾席增多1,000個位。

重建工程 編輯

由於亞洲足球協會投訴旺角大球場冇藥物檢驗室、記者室同上網設施,難以發佈賽事消息,加上旺角大球場遇上多次滿座。因為呢個情況,香港足球總會喺2008年向香港政府提出將旺角大球場嘅原有座位同臨時看台拆除,同埋重建到一座有10,000個座位同有上蓋嘅看台,以提供一個較舒適嘅環境畀球迷觀賞比賽[3]。不過規劃建議,旺角大球場進行重建後最多只可以設置6,680席,南北兩邊嘅主看台會加建上蓋,同時增設球證休息室、球員休息室、藥物檢驗室,並且會增設閉路電視監察系統及擴充停車場泊位等[4]。重建工程於2009年9月1號開始進行,2011年10月14號竣工,工程費用估價為2.5億港元[4],實際耗資2億7,550萬港元。

根據重建工程規劃,重建後嘅旺角大球場以綠色環保嘅概念做主題,位於服務大樓嘅天台設有太陽能熱水系統,以吸收太陽能為更衣室供應熱水;而且設有雨水循環使用系統,以收集雨水灌溉園景同草地等。一樓天台同南看台上層,另外亦有闢設園景,同鄰近嘅花墟同俗稱「雀仔街」嘅園圃街雀鳥花園一脈相承。香港政府盼望,旺角大球場能夠成為活化嗰區嘅地標之一。重建工程對旺角大球場主要嘅改動係喺南、北看台增設咗輕盈嘅拉篷式上蓋,同埋喺東看台安裝咗大電視熒幕。座位由以往嘅鋼製長椅改成多顏色嘅獨立膠椅,容納人數雖然由原來嘅8,500減少到6,664人,不過增加咗42個輪椅座位同升降電梯等嘅無障礙設施,座位高度亦提升咗1.5米,令球迷嘅觀賞角度更好。除此之外,8個售票亭集中喺花墟道嘅入口,刪減咗界限街嘅售票處,改為停車場[5]。場內設施方面,增設咗藥物檢驗室同育嬰室;更衣室嘅面積大增兩倍,數量亦有兩間增至4間,淋浴間亦增至40間,比以往多22間;此外,更衣室內亦有專門用嚟清潔球靴等先進嘅設備。傳媒室嘅面積亦比以往增大[6][7][8]

重建後 編輯

2011年10月16號黃昏,旺角大球場舉行咗球場重建後嘅第一場賽事──香港甲組足球聯賽晨曦深水埗。晨曦為咗吸引更多球迷欣賞旺角大球場重建後嘅第一場比賽,將原定價值港幣60蚊嘅門票大幅度下調到港幣20蚊,共有4,499名球迷入場,創嗰個球季至2013年3月21號期間嘅最高嘅入場人數。大批球迷喺開始賣飛前嘅兩個鐘,已經聚集喺大球場門外,香港足球總會職員為咗唔想發生意外,特別提早20分鐘,即下晝3點40分開閘畀球迷入場。到傍晚6時鐘倒,依然有球迷不斷進場[9][10]

2013年3月22號,旺角大球場舉行2015年亞洲盃外圍賽香港足球代表隊主場對越南國家足球隊嘅賽事,有6,416人買飛,共有6,639名球迷入場,係旺角大球場重建後第一次爆滿,喺場外高掛起代表滿座嘅紅旗。喺當日下晝5點,得番2,000張飛賣;夜晚7點54分,香港足球總會宣佈嗰日全部飛賣晒,最終有幾百名球迷喺球場外摸門釘。

2015年,香港足球代表隊以旺角大球場做主場,舉行2018年世界盃亞洲區外圍賽第二圈暨2019亞洲盃外圍賽,6月11號、6月18號、9月8號、11月17號連續四場爆滿。6月11號香港以7-0大勝不丹,6月18號香港以2–0擊敗馬爾代夫,9月8號香港以2–3輸畀卡塔爾,11月17號香港以0–0迫和中國。

設施 編輯

相集 編輯

重建前 編輯

重建後 編輯

交通 編輯

港鐵太子站旺角東站
巴士

參考 編輯

  1. 1.0 1.1 《大公報》,1973年5月14號,第2張第8版,「市政球場下月開放 夏令杯賽飲頭啖湯」
  2. 《大公報》,1973年6月16號,第2張第8版,「旺角大球場啟用儀式 夏令杯今揭幕」
  3. 《太陽報》,2008年8月1號,[1],「旺角球場加上蓋減座位」
  4. 4.0 4.1 旺角大球場改善工程 民政事務局呈交立法會民政事務委員會討論文件(文件編號:CB(2)253/08-09(01))。2008年11月
  5. 旺角大球場環保概念登場 《星島日報》 2011年10月15日
  6. [旺角大球場明日重開 首場波甲組賽晨曦對深水埗 《蘋果日報》 2011年10月15日]
  7. [旺角場翻新無加場租 《成報》 2011年10月15號]
  8. [旺角場重開3彈2讚 座位設上蓋明午演首戰 《明報》 2011年10月15號]
  9. [旺角場重開 4,499球迷湧入 鄭少偉首球締歷史 《蘋果日報》 2011年10月17號]
  10. [旺角球場 盛況重現 《成報》 2011年10月17號]

出面網頁 編輯

座標: 22°19′34″N 114°10′23″E / 22.3261°N 114.173°E / 22.3261; 114.173