昂坪360
昂坪360（Ngong Ping 360）係香港大嶼山上一條吊車綫，駁埋東涌同昂坪。佢喺2006年9月18號通車，係世界最大規模嘅吊車系統，亦係繼香港海洋公園之後香港第二個吊車系統。
昂坪360係地鐵有限公司（而家係港鐵公司）所有。呢個系統原本係由地鐵公司同埋澳洲Skyrail-ITM合組嘅香港Skyrail公司管理，但昂坪360喺2007年6月11號出現事故，間公司就喺同年9月18號俾地鐵收購。而昂坪360喺嗰單嘢之後一直停駛，直到2007年12月31號先至重開。
昂坪360嘅現任董事總經理係邵信明。
佢個名
編輯最初香港地鐵將個系統叫做「東涌旅遊吊車」，但係官方名稱依家已經改咗做「昂坪360」。個名入面嘅「360」，係可以畀客坐吊車，望勻一個圈 360 度角，即係一眼睇晒大嶼山嘅風景。後尾官方將吊車改叫纜車。
路線圖
編輯
工程同埋試車
編輯吊車工程喺2004年2月展開。吊車系統原本喺2006年6月24號投入服務，但係因為吊車喺6月17號試車嗰陣時出事唔郁，當局就宣布押後開幕日期。7月29號同埋7月30號，地鐵同九鐵嘅員工試坐吊車，機電工程署講話試車情況大致順利。喺颱風派比安8月吹襲香港嗰段時間，損毀咗部分吊車設施，不過都算輕微，但係開幕又要推遲。之後8月30號，昂坪吊車又開始畀人試坐，一直係咁試到9月5號，情況都算順利。因為咁，昂坪市集嘅商戶之間，重諗住吊車會喺9月11號或者9月13號通車添。
因為吊車工程有唔少阻滯，唔少地鐵公司有份搞呢個工程嘅人都辭職唔撈。而東涌站亦都發現石屎有裂紋，不過最後都有補救到。
最後喺9月18號下晝 1 點鐘，昂坪360正式通車。地鐵工程總監柏立恆，同埋昂坪360常務董事高德偉，一齊主持開幕儀式。
事故
編輯吊車跌落山
編輯昂坪360嘅一架吊車喺2007年6月11號返廠途中，連埋吊臂甩咗鋼纜，跌咗超過五十米，落下面山坡海邊嘅草叢，車廂爛曬。好彩嗰陣已經收車，冇載客。件事起因未知。呢件事發生之前一個星期左右，昂坪360先至啱啱做完週年檢查。當局喺事發三個鐘後，緊急召開記者會，宣佈吊車無限期停駛，直至調查完同運作安全確保到。
昂坪360去到2007年12月31號先至重開。
啤令唔正常損耗
編輯昂坪360喺2012年1月25號下晝因技術問題停駛，八百幾個搭客喺氣溫得幾度嘅環境半天吊，事後昂坪360宣佈停駛十日做檢查。2月3號，昂坪360宣佈單嘢係因為機場島轉向站嘅滑輪組件嘅啤令有唔正常損耗，預計要再停駛兩個月去換晒全線七組啤令。
車站一覽‧接駁路線
編輯| 車站套色同埋名 | 喺邊區 | 車站接駁 | 啟用日期 |
|---|---|---|---|
| 昂坪360 | |||
| 東涌 | 離島區 | 可以行去港鐵東涌站轉東涌綫 | 初次啟用：2006年9月18號 再次啟用：2007年12月31號 |
| 昂坪 | |||
出面網頁
編輯
 |