朝香宮鳩彥王
朝香宮鳩彥王（日文：朝香宮鳩彦王／あさかのみややすひこおうAsaka-no-miya Yasuhiko Ō，1887年10月20號—1981年4月12號），日本舊皇族兼陸軍大將，南京大屠殺具爭議性嘅負責人之一。1906年設立宮家朝香宮，1922年到法國留學，深受法國文化影響。回國後繼續軍人生涯，響佢出任上海派遣軍司令期間主導日軍攻陷南京，而且任內爆發南京大屠殺，唔少人認為大屠殺同佢有關，但因多個因素而響戰後未被起訴。1947年皇籍脫離，改名叫朝香鳩彥（日文：朝香 鳩彦／あさか やすひこ ）。
| 朝香宮鳩彥王 あさかのみややすひこおう | |
|---|---|
 朝香宮鳩彥王 | |
| 朝香宮當主 | |
| 在位 | 1906年ー1947年 |
| 前任 | 宮家設立 |
| 繼任 | 宮家廢除 |
| 私人明細 | |
| 配偶 | 富美宮允子內親王 |
| 仔女 | 鍋島紀久子 朝香孚彥 音羽正彥 大給湛子 |
| 全名 | 朝香宮鳩彥王 > 朝香鳩彥 |
| 皇族 | 日本皇室 > 平民 |
| 父 | 久邇宮朝彥親王 |
| 母 | 角田須賀子 |
| 出世 | 1887年10月20號 日本京都府上京區京都御苑 |
| 過世 | 1981年4月12號（93歲） 日本靜岡縣熱海市 |
| 宗教 | 神道 > 天主教 |
早年 編輯
1887年10月20號凌晨十二點，鳩彥王響京都府京都御苑出世，係久邇宮朝彥親王第八個仔[1]。1894年入讀學習院初等科，1900年升讀學習院中等科，但係一年後轉校至東京地方幼年學校[2]。1904年入讀陸軍中央幼年學校，開始接受軍隊相關教育[2]。1906年，明治天皇批準鳩彥王另起一個宮家，命名為朝香宮，個名嚟自伊勢國嘅朝香山[3]。1907年出任貴族院議員[4]。1908年鳩彥王畢業於陸軍士宮學校（第20期畢業生，所修讀嘅科目分別有兵科同步兵科），同年年尾升上做陸軍少尉，畀人分配到近衛步兵第二連隊[2]；而鳩彥王響呢一年亦搬到港區高輪嘅「西臺町邸」度住[5]。1910年4月29號，鳩彥王同明治天皇第八個女富美宮允子內親王結婚，做咗明治天皇嘅女婿[2]。
1914年，佢畢業於陸軍大學校，同年畀人調去步兵第六十一連隊中隊長[5]。1916年調任參謀本部[5]。1917年，佢獲頒大勳位菊花大綬章[5]。1918年升為陸軍步兵少佐，畀人調到步兵第一聯隊做大隊長[2]。
留學生涯 編輯
.jpg)
1922年，佢以假名「朝伯爵」嘅名義到法國聖西爾軍校留學，同行嘅有表哥北白川宮成久王同埋細佬東久邇宮稔彥王[6]。1923年出任駐法國武官，負責情報工作[7]；同年4月響表哥成久王嘅邀請下一齊到多維爾玩，由成久王揸車，點知響到巴黎近郊個陣架車撞上棵樹到，成久王傷重死亡，而鳩彥王就下巴、背部同腦部受傷，同時右邊大脾、左手嘅手指公同食指骨折，呢次交通意外令鳩彥王至此之後行路就趷下趷下，落下終身殘障。據當初鳩彥王響學習院初等科嘅同學、作家裏見淳回憶，稔彥王仲同佢提過呢次意外令鳩彥王腦部受損：「佢（鳩彥王）自從出咗車禍後，腦袋就周不時都唔太清楚。」跟據鳩彥王嘅日記顯示，當初成久王邀請稔彥王出去玩，但畀稔彥王拒絕因而轉而邀請鳩彥王，本身當日鳩彥王有約在身，但最終耐唔住成久王嘅堅持同熱情，同意咗今次嘅出行。呢次意外響日本引起巨大轟動[6]。
因為鳩彥王身受重傷，所以佢要留響法國接受治療，而佢老婆允子內親王亦拉拉聲到法國照顧佢[6]。響治療期間，鳩彥王學識咗打高爾夫球，自此之後就瘋狂迷戀上呢項運動，據當時照顧佢嘅護士回憶，鳩彥王每日都會花大量時間打高爾夫球，雖然背部、腳部同腦部受傷但打高爾夫球嘅技術卻非常出色，甚至對杆法有住非常獨到嘅見解，佢亦係響呢個時候開始被稱為「高爾夫王子」[8][9]。而長期響法國生活亦令到鳩彥王徹底鍾意咗法國文化，思想變得非常西方化，影響埋佢後嚟嘅人生[6]。
1925年12月11號，鳩彥王響老婆允子內親王嘅陪同下返嚟日本，結束三年留學生涯。
軍人生涯 編輯
返嚟日本之後，佢先後升為陸軍少將同埋陸軍中將，1930年成為陸軍大學校教官。九一八事變同一二八事變爆發期間，鳩彥王都有份參與，因而獲頒昭和六年乃至九年事變從軍記章同埋金杯一組[5][10]。1933年8月晉升為中將，指揮近衛第一師團。1935年12月出任軍事參議官，呢個職位令到鳩彥王對昭和天皇有住非常大嘅影響力[11]。然而響1936年2月26嘅爆發嘅二二六事件當中，鳩彥王向昭和天皇施壓，要求成立一個皇道派可以接受嘅政府，建議任命廣田弘毅取代岡田啟介成為新一任首相[11]。對於鳩彥王嘅行為，昭和天皇咁樣回應︰「朝香宮は大義名分は仰せになるが、尖鋭化して居られて宜しくない。」[5][12]鳩彥王偏向皇道派嘅取態同情緒令到佢同昭和天皇之間嘅關係出現裂痕[13]。
1937年日本發動日華戰爭，由松井石根擔任司令嘅中支那方面軍編成內一路勢如破竹，響攻陷完上海後嘅11月跟手開始攻打南京，參謀本部響12月1號下達第7號命令，命松井身兼中支那方面軍司令同上海派遣軍司令，但由於當時松井人響蘇州加上肺結核發作[14]，於是第二日參謀本部下達第8號命令，宣佈由鳩彥王接任上海派遣軍司令一職[7]。鳩彥王響12月5號坐軍艦「朝汐號」由東京出發，12月7號正式到達上海，開始執行同指揮日軍攻打南京嘅計劃[5][7]。8號，日軍成功攻陷南京外圍[7]。當時正值冬天，得零下10度，鳩彥王為咗可以不斷地實時收到戰況彙報，於是直接響戰場上過夜[15]。10號上晝11點，日軍要求國軍投降，畀國軍拒絕，鳩彥王當時企響一坐小山丘上，由於鳩彥王係步兵出身、最叻就指揮步兵[16]，知道國軍嘅取態後開始指揮住上海派遣軍旗下、屬於步兵團嘅第16師團開始朝住紫金山進擊，班日軍見到身為阿頭嘅鳩彥王卻響前線親自指揮，所以個個都好有鬥志[15][17]。13號攻入中山門同太平門，當晚日軍成功攻陷成個南京[17]。朝日新聞響當日立即以《英姿颯爽嘅朝香宮鳩彥王殿下》為題進行深入嘅報道[18]。響攻陷南京後，跟據返當時嘅情況，司令部曾經向參謀本部同陸軍省三次請示點樣處理呢班俘獲人員，但參謀本部同陸軍省態度曖昧，叫司令部自己搞返點佢[7]。司令部上下人員左右為難[7]。跟據《NNNドキュメント'15 シリーズ戦後70年 南京事件 兵士たちの遺言》顯示鳩彥王落咗一道「殺死全部俘獲人員」嘅命令，甚至加上「機密，閱後銷毀」（睇過就暗底里銷毀咗文件）嘅字眼，因而佢畀人認為係南京大屠殺重要負責人之一[19][20]。但亦有史料指出係陸軍中佐長勇以鳩彥王嘅名義發佈呢道命令[21]。12月17號，鳩彥王同松井石根正式進入南京市，仲搞咗個入城儀式[7]。而司令部班手下為咗確保身為皇族嘅鳩彥王可以安全地入城，於是就要求日軍響鳩彥王入城前只要見到中國男人一律當國軍咁殺[7]。
日軍響南京嘅行為引起國際社會高度關注[22]。1938年2月初，當時人響南京嘅美國大使館三等秘書莊·M·艾利森收到一位中國女人嘅求助，女人聲稱有三位日軍強姦咗佢，艾利森帶住個女人去指認係邊位日軍士兵個陣，女人突然畀日軍強行帶走，艾利森仲畀日軍打咗一把掌，事件引起國際社會注意[22]。由於事件中嘅日軍係屬於由鳩彥王管住嘅上海派遣軍，上海派遣軍好快就成為人民關注嘅焦點，最終鳩彥王響2月7號公開道歉以平息事件[22]。
1938年2月18號，佢同松井石根畀人召回日本，松井畀人調返嚟日本國內，而鳩彥王就繼續留響前線打仗[23]。一個月後，鳩彥王亦畀人調返日本國內，二度出任軍事參議官[5]。同年11月，鳩彥王出任由帝國軍人後援會、大日本軍人援護會、振武育英會所合併而成嘅「恩賜財団軍人援護会」嘅總裁[24]。1939年，鳩彥王升為陸軍大將[5]。因為響日華戰爭中立下過戰功，於是鳩彥王響1942年獲頒功一級金鵄勳章[5]。響之後嘅太平洋戰爭當中，鳩彥王支持「統帥一元化」，為準備「大陸作戰」必須要日本海陸軍統一，同時佢仲要求換咗時任陸軍大臣杉山元[25]。1944年，鳩彥王聯同高松宮宣仁親王、東久邇宮稔彥王、前首相近衛文麿同其他政壇元老，將當時日本首相東條英機趕落台[19]。
戰後 編輯
1945年8月15號，日軍投降，二戰結束。駐日盟軍總司令就住參加過日華戰爭嘅日軍高層進行調查，其中包括曾經出任上海派遣軍司令嘅鳩彥王。SCAP對佢進行咗一系列嘅審問，以調查佢有冇份導致南京大屠殺。鳩彥王本來係會畀人送上審判台，但因為高松宮宣仁親王嘅遊說，令到麥克阿瑟決定豁免皇室成員，最終冇起訴到佢。
1946年5月23號，佢辭任貴族院議員。1947年，響駐日盟軍總司令部指示底下，鳩彥王皇籍脫離，改名叫朝香鳩彥，同時接受公職追放，解除一切公職。佢更加拒絕作為補貼嘅一時金。響皇籍脫離之後，原先佢嘅宮邸東京白金王府畀GHQ沒收，於是佢帶住一家大細搬去靜岡縣熱海市到住，過住休閒嘅生活，期間佢成日打高爾夫球，後嚟仲對高爾夫球場嘅開發產生咗興趣，曾經響1950年代左右成為大箱根鄉村俱樂部高原高爾夫球場嘅建築師。1952年，新抱千賀子過身，鳩彥同大仔孚彥因而一齊做咗天主教徙。鳩彥後嚟仲曾經投資股票同埋木材業，但最後都因為蝕錢而退出。
1981年，鳩彥響屋企過身，終年93歲。
影響 編輯
1927年鳩彥王到訪台灣嘅阿里山，台灣嘅官員為紀念佢嘅到訪，將一棵位於阿里山香林神木附近、雙叉嘅紅檜巨木命名為「萬歲檜」，甚至出埋專屬明信片，棵樹後嚟改名叫「千歲檜」，今時今日都仲響度[26][27]。
同大屠殺嘅關係 編輯
屋企 編輯
老豆：久邇宮朝彥親王
阿媽：妾侍角田須賀子
兄弟：大佬賀陽宮邦憲王---二哥久邇宮邦彥王---三哥梨本宮守正王---四哥多嘉王---五哥暢王---六哥無名（夭折）---老七鳩彥王（佢自己）---細佬東久邇宮稔彥王
老婆：允子內親王
攷 編輯
- ↑ 《帝国現代縱横史︰御即位礼紀念 · 第 1 卷》. 1918.
- ↑ 2.0 2.1 2.2 2.3 2.4 秦郁彦. 《陸海軍総合事典 [第2版]》.
- ↑ 鹿島茂. 《宮家の時代 セピア色の皇族アルバム》.
- ↑ 貴族院事務局. 《貴族院要覧（丙）》. p. 17.
- ↑ 5.0 5.1 5.2 5.3 5.4 5.5 5.6 5.7 5.8 5.9 〈『親王・諸王略傳』 鳩［鳩彦］〉. nss.o.oo7.jp. 喺2023-06-29搵到.
- ↑ 6.0 6.1 6.2 6.3 文春圖書館. 〈「御徴行」とあって皇子ではな〉 (PDF).
{{cite web}}: CS1 maint: url-status (link) - ↑ 7.0 7.1 7.2 7.3 7.4 7.5 7.6 7.7 劉國君. 《中共掩蓋的抗戰真相》.
- ↑ 小田部雄次. 《49人の皇族軍人 戦場に立った近代日本の陰の主役たち》. p. 216.
- ↑ 佐藤朝泰. 《門閥―旧華族階層の復権》. p. 42.
- ↑ 〈老徽章上的日本侵華史--黨史頻道-人民網〉. dangshi.people.com.cn. 喺2023-06-29搵到.
- ↑ 11.0 11.1 Ammenthorp. The Generals of World War II.
- ↑ 〈秩父宮は「反逆の皇子」だったのか - 礫川全次のコラムと名言〉. goo blog (日文). 喺2023-06-29搵到.
- ↑ 東京都庭園美術館. 《旧朝香宮邸物語》.
- ↑ 張石. 《靖國神社與中日生死觀》. p. 178.
- ↑ 15.0 15.1 中時新聞網 (2014-12-15). 〈兩岸史話－日本皇室與南京大屠殺 - 兩岸藝文〉. 《中時新聞網》 (中文). 喺2023-06-30搵到.
- ↑ 斯夫、 王磊、王雨霖 (1998). 《1937-1938 南京政府大撤退》.
- ↑ 17.0 17.1 〈南京守城战：军官宋希濂亲历南京城破〉. web.archive.org. 2021-02-21. 歸檔時間2021-02-21. 喺2023-06-29搵到.
{{cite web}}: CS1 maint: bot: original URL status unknown (link) - ↑ 秋林 (2014-08-18). 《当日南京》 (中文). 南文博雅.
- ↑ 19.0 19.1 World War II Database. Chen.
- ↑ David Bergamini (1971). Japan's imperial Conspiracy.
- ↑ 洞富雄. 《南京大虐殺の証明》. p. 1986.
- ↑ 22.0 22.1 22.2 "WAR IN CHINA: Face". Time (美國英文). 1938-02-07. ISSN 0040-781X. 喺2023-06-29搵到.
- ↑ 〈朝香宫鸠彦王_新浪新闻〉. web.archive.org. 2022-10-28. 歸檔時間2022-10-28. 喺2023-06-29搵到.
{{cite web}}: CS1 maint: bot: original URL status unknown (link) - ↑ 《昭和ニュース事典 第6巻 昭和12年―昭和13年》. p. 128.
- ↑ 〈#9 藤原直哉と昭和天皇実録を読む（昭和20年2月27日～3月8日）｜藤原情報教育研究所｜藤原直哉〉. 《note（ノート）》 (日文). 2017-02-27. 喺2023-06-30搵到.
- ↑ 〈日治時期繪葉書 · 朝香宮鳩彥王殿下御名命樹 萬歲檜 · 國立臺灣大學圖書館數位典藏館〉. dl.lib.ntu.edu.tw. 喺2023-06-29搵到.
- ↑ 陳煒翰 (2014-05-08). 《日本皇族的台灣行旅》 (臺灣中文). 玉山社. ISBN 978-986-294-078-5.
| 上一任 （新起） |
朝香宮當主 1906年 - 1947年 |
下一任 （廢除） |