朱幼麟
朱幼麟，SBS[1]，JP[2]（英文：David Chu Yu-lin，1944年3月5號—）係香港立法會前議員，本來係香港自由民主聯會成員，之後跟住自民聯同香港協進聯盟合併而成為香港協進聯盟成員，後來再因香港協進聯盟同民主建港協進聯盟合併而成為民主建港協進聯盟成員。
| 朱幼麟 David Chu Yu-lin | |
|---|---|
| 香港立法會議員 | |
| 任期 1998年7月1號－2004年9月30號 | |
| 選區 | 選舉委員會功能界別 |
| 臨時立法會議員 | |
| 任期 1996年12月21號－1998年6月30號 | |
| 香港立法局議員 | |
| 任期 1995年10月11號－1997年6月30號 | |
| 選區 | 選舉委員會功能界別 |
| 個人資料 | |
| 出世 | 1944年3月5號 中華民國 上海 |
| 政黨 | 香港自由民主聯會（－1997年） 香港協進聯盟（1997年－2005年） 民主建港協進聯盟（2005年－） |
| 配偶 | 何妙馨 |
簡介
編輯朱幼麟喺上海出世，1958年跟屋企人移民美國，入讀波士頓Cambridge Latin High School。16歲時畀東北大學取錄[3]。
朱幼麟老婆何妙馨係恒生銀行其中一位創辦人何添阿女，有過馬匹「豬小姐」。朱幼麟跟過香港保釣人士去釣魚台列島宣示中國對嗰處嘅主權[4]，2003年當選香港特別行政區全國人民代表大會代表，提交過一份有關保衞中國神聖領土釣魚島嘅文件畀全國人民代表大會。
朱幼麟自1995年一直循選舉委員會功能界別入立法局同立法會，喺做議員期間時有出位言行。佢有好多嗜好，包括跳降落傘，所以有「飛天朱」外號[5]。
要求徹查梁振英阿女行李事件
編輯2016年，朱幼麟反對香港特別行政區行政長官梁振英細女梁頌昕涉嫌用特權喺禁區攞返行李嘅處理手法，期間高調參與同出席親泛民主派嘅工會「香港空勤人員總工會」喺機場發起嘅靜坐，以表達對民航處處理梁頌昕行李事件嘅不滿。朱幼麟參與機場靜坐，佢同航空界嘅密切關係同建制派背景令佢成為傳媒焦點。
朱幼麟表示，懷疑事件涉及濫用特權，認為必須追究到底。朱幼麟指出，參與靜坐係因為佢好討厭濫用特權，破壞人人平等嘅原則。佢又話，據悉當日接聽特首電話嘅前線地勤人員，講電話時「講到流眼淚」，佢相信件事係事實，認為應該追究到底[6]。
朱幼麟指，喺行李事件上，只想引用前政務司司長唐英年當年喺特首選舉論壇指控梁振英嘅一句「你呃人」來回應今次「行李事件」，但係佢話要加多一個字，即「你又呃人」[7]。
攷
編輯- ↑ 〈二〇〇五年授勳名單〉 (新聞稿) (繁體中文)。香港政府新聞公報。2005年7月1號。
- ↑ 〈2001年第14號號外公告〉 (PDF) (新聞稿) (繁體中文)。香港政府憲報。2001年7月1號。
- ↑ 《壹週刊》第750期〈詐醉佯狂 朱幼麟〉訪問，2004年7月22號出版
- ↑ 〈保釣船捱撞 朱幼麟傷腰〉 (繁體中文)。東方日報。2003-10-11。
- ↑ 〈朱幼麟前議員兼人大〉 (繁體中文)。東方日報。2013-05-09。
- ↑ 〈朱幼麟討厭濫用特權 促跟進行李事件〉 (繁體中文)。星島日報。2016-04-18。
- ↑ 〈【我爸係梁特】朱幼麟斥CY呃人兼太低級：佢冇資格要我針對〉 (繁體中文)。蘋果日報 (香港)。2016-05-04。原著喺2017-03-05歸檔。喺2019-06-11搵到。
