杭州史

杭州係有著好耐文明史嘅一個城市，喺大中華史入邊做過七個國朝嘅都城。據考古發現，早喺五萬年前附近就有「建德猿人」喺度繁衍。喺春秋時期，呢度屬於越國嘅國土。秦始皇征服六國後，喺呢度建立咗錢塘縣。呢陣時嘅杭州仲喺海底，西湖喺之後嘅八百年都係海灣。隨著錢塘江潮汐堆砌啲泥沙，形成咗陸地，到咗隋煬帝時代完成咗京杭大運河，帶動咗南北貨運同商貿活動，令到杭州城開始向大都市嘅方向發展。喺11世紀之後歷代，呢度都為朝廷進貢咗唔少貴價品，唔少外域人士到杭州做生意同落腳，喺海內外享有埋盛名。

到咗明代後，杭州嘅手工業崛起，出現咗唔少名品手作。到1894年《馬關條約》後，杭州成為咗通商口岸之一，不過上海開埠後，就拖低咗杭州嘅產業集聚力。中共1950年代建政後，經歷咗大躍進、人民公社化運動同十年文革帶來嘅破壞後，隨著1978年改革開放而重新發展返，成為咗中國大陸嘅15個經濟中心城市之一，仲有全國重點風景旅遊城市同國家歷史文化名城。

隋代創城

隋開皇十一年（591年）始創杭州城，「移州於柳浦西，依山築城」。喺隋煬帝嘅時候，開鑿咗南北大運河接通埋杭州。

唐到五代十國嘅獨立

唐初杭州屢次俾啲軍頭佔據，好似沈法興、李子通、杜伏戚、輔公茹等，而令當地嘅經濟冇發展得咁好。貞觀之治到開元之治嘅時候，就相對發展得唔錯。呢陣時就開始咗園林造景，有唔少嘅文人雅士都嚟呢處遊樂，仲吸引埋好多高僧釋子。據載喺唐代嘅杭州城內外，湖山之間係起咗成360間寺廟。不過錢塘江成日發大水，居民自發起嘅版築土塘，擋唔到啲潮水衝擊，所以城度一路都係冇聚唔多人氣。

吳越獨立

喺唐後多方爭鋒嘅時代度，錢鏐喺887年接掌咗杭州刺史一職，一步步咁升官、獨攬咗杭州地方嘅軍政大權。904年俾封做吳王；907年，後梁封咗錢鏐做吳越王，吳越國就由呢度開始創建咗。到龍德三年（923年），錢鏐俾冊封咗做吳越國王，吳越建立埋咗王國體制。喺吳越錢氏嘅獨立建政時期，杭州係叫做「西府」，實際係吳越國都。呢個係令杭州第一次喺江浙地方有咗地位嘅飛躍，推上咗「東南第一州」嘅寶座。

吳越國尊崇佛教，實行咗「保境安民」嘅政策，大力發展商業推動咗杭州嘅城市化，係中國大陸中世紀「城市革命」嘅先驅，帶動埋江南城市化嘅發展。

南宋定都

南宋定都喺杭州之後，起咗九里皇城、開埋十里天街（呢家嘅中山中路），喺宮城出邊嘅天街兩側，啲王室貴族內侍個個都跟著起埋自己嘅宮廷豪宅。嗰陣時喺中河以東就起咗德壽宮，喺上華光巷度係起咗開元宮，喺後市街就起咗惠王府第，喺惠民街起咗龍翔，而呢一帶亦就有咗「一色樓臺三十里」嘅稱呼。喺建炎三年（1129），謀害過岳飛嘅張俊喺明州（依家嘅寧波）擊退咗金兵，俾宋高宗封咗做「清河郡王」，張就揀咗呢家嘅河坊街太平巷度起咗自己嘅清河郡王府，咁一嚟嗰帶就開始俾人叫做「清河坊」。清河坊後尾慢慢多咗唔少商鋪、酒樓、茶肆，生意由朝到黑都未停過，跟著就有咗河坊街嘅名。後邊經歷咗蒙元、滿清到中華民國大陸時期，河坊街一路都仲係杭州嘅商商業文化中心。

而喺南宋管治嘅時期度，大批嘅手工業者就聚埋咗呢度，出現咗唔少嘅私家作坊，仲有綾錦院等規模較大嘅官營工場，絲綢織染業就咁一路發展。而由宋開始去到滿清，每代嘅朝廷都專登喺杭州設立個織綢府，負責織造綢緞嘅事務，向宮廷提供啲絲綢貢品。

蒙古人管治

南宋被元朝吞併咗後，杭州臨安府改咗名叫杭州路，成為咗江浙行中書省嘅治所。杭州城避免咗破壞，城入邊嘅商業活動，喺社會安定咗同運河復航後，迅速咁恢復埋。

元世祖至元十四年（1277）十一月，命中書省檄文諭中外，「江南既平，宋宜曰亡宋，行在宜曰杭州。」繁荣嘅工商業，仲有西湖嘅美景，再次吸引咗海內外人士陸續去遊覽。關漢卿喺呢一年後，就由大都落咗杭州，寫低咗一枝花（杭州景）盛讚當地嘅繁景。意大利嘅旅行家馬可波羅亦去咗杭州，係稱之為「世界上最美麗華貴」嘅「天城」。據其當時嘅記述，杭州城入邊嘅街道好闊廣，路面都係用磚石鋪砌嘅，下底仲起有排水嘅暗渠。城入邊有十個大「方衢」做市場，「方衢」附近都設有「邸店」，俾外地商人存放啲貨品。每個禮拜有搞三次集市，每次都有成四、五千人。而據記述元朝嘅皇帝對杭州城，係有徵收各種商品嘅巨額稅費。官府係透過當地嘅十二個商家行會，抽繳呢啲商稅。

另據記載，呢陣時嘅杭州城有三萬嘅常駐軍，係愛來鎮壓人民嘅動亂。城入邊每座橋都會派十個兵駐守。而當局仲實施禁止晚黑行街嘅法令，到晚黑各街都會有巡查嘅兵，禁止啲人點燈落街行，因而都禁埋夜市。到元英宗時，意大利嘅鄂多立克來華亦到過杭州，話呢度係「世界上規模最大之城」。而元末到杭州嘅非洲旅行家伊本·拔都他，亦記述話杭州係佢從未見過嘅大城市。

到元末，張士誠舉兵攻佔咗杭州，改造咗杭州嘅城牆，又新開咗運河。收尾朱元璋喺1366年帶兵再攻陷咗呢度。

滿清

滿清後，杭州係清廷最先派咗八旗精兵駐防嘅三個城市之一。部隊係喺1645年（順治二年）進駐嘅，而1650年（順治七年）就喺城池同西湖間起咗個「旗下營」，佔據咗由湖濱直到去官巷口一帶嘅地方，阻隔咗杭州居民成兩百年。

喺光緒33年（1907年），當局同英國借錢開始起杭州嘅鐵路。喺宣統元年（1909年）為咗令滬杭甬鐵路入城方便，拆去咗清泰門同呢一帶嘅城牆。

清光緒二十年（1894年）《馬關條約》簽訂後，杭州成為咗通商口岸之一，喺拱宸橋嘅地頭設立咗通商場同日本租界。

中華民國

杭州滿城嘅駐防清軍喺1911年嘅十一月向革命軍投降。喺辛亥革命後，旗下營被杭縣公署標賣，所有嘅城牆、營門被拆嗮咗。「旗下營」冇咗後個地就開闢咗街市。一大揸商舖跟著尾湧入呢度，彷彿微縮版嘅上海十里洋場。嗰時嘅上海作為中國大陸嘅製造兼貿易中心，吸引埋杭州啲熟手工人同資金過去，導致咗杭州嘅工業後尾冇再發展上去。

1927年嘅浙江省政府，將杭縣城區同西湖全境劃出，正式成立咗杭州市政府。

喺1928～1930年張靜江任職第一代嘅浙江省政府主席時候，主持修築咗唔少基建，好似係杭州電廠、杭江鐵路、杭長公路、杭平公路、杭徽公路等等。而喺1929年，張靜江喺杭州成功舉辦咗西湖博覽會。張嘅設想係將杭州建設成「東方紐約」，而張等國民黨人嘅經濟建設主張，並唔啱嗰時蔣介石嘅政治軍事路線，而令到呢個規劃冇咗後續。而喺1927到1937年嘅期間，杭州市政府亦有意喺唔少外賓奉做「東方勒芒湖」嘅西湖，發展更多嘅旅遊業，將杭州打造成「東方嘅瑞士」。由於後邊中日爆發戰事而中斷咗。

另外嗰時嘅浙江省政府，為咗推動杭州、江浙嘅旅遊業喺經濟方面嘅貢獻，喺1934年專門成立咗浙江省名勝導遊局，部門設喺杭州嘅將軍路建設廳入邊，負責全省嘅旅遊同關聯事務。喺大陸嘅民國時期，係唯一個有設立旅遊局嘅地方省。

中共建政後

喺1998年朱鎔基主政國務院嘅時候，開放咗地產業，杭州就跟著成為咗中國大陸第一個樓價猛咁升嘅城市。喺到咗2000年前後，杭州市中心嘅樓價由每方1200升到咗3500。杭州市中心嘅杭州大廈一度成為咗大陸最賺錢嘅商場。

2000年4月到2010年1月，王國平主掌中共杭州市委書記嘅期間，強勢咁推動咗杭州城嘅開發，主導清拆咗環繞著西湖嘅大量政府機構，仲向東伸延咗杭州嘅開放建設，轉向開發錢塘江嘅一帶地皮。喺十年呢個空前嘅大開發入邊，杭州政府係獲利唔少，據統計到2009年杭州政府嘅土地收入高達1900億，係全大陸城市入邊收得最多嘅。