東張西望》係香港無綫電視一個娛樂同時事資訊節目,由2005年6月6號開始逢禮拜一到五香港時間19:30-20:00響翡翠台播,由2019年3月3號開始改做逢禮拜一到日都播。

東張西望
Scoop
類型娛樂資訊
唔受通訊事務管理局監管嘅時事節目
主持廠景主持:
區永權朱凱婷陳貝兒林溥來
陳庭欣
廠景兼外景主持:
黃耀英吳幸美利穎怡
李旻芳梁麗翹阮嘉敏
外景主持:
游莨維林映輝黎寬怡林希靈
黃穎君黃愷怡容羨媛何沛珈
梁敏巧
國家/地區Flag of Hong Kong.svg 香港
語言粵語
每集長度30分鐘
製作
製作人電視廣播有限公司東張西望製作組
監製張嘉玲[1]
播映
首播頻道翡翠台
圖像制式HDTV 1080i
聲音制式立體聲
播出國家/地區Flag of Hong Kong.svg 香港
播出日期2005年6月6號
出面網頁
官方網站

每集節目都會有兩位主持響錄影廠,另外每條娛樂同時事資訊片段都會有唔同嘅外景主持。比較出名嘅外景主持包括林泳淘李旻芳利穎怡等。另外,呢個節目亦不時會加入一啲植入式廣告

現時節目內容

一般情況下,節目第一節會係一啲時事新聞或者娛樂新聞,而去到第二節就會係探討一啲近期社會問題,當中唔少會係觀眾報料。另外,佢哋偶然亦會對出一啲同喺無綫重頭節目(例如:香港小姐)或者重大社會事件(例如:四川大地震馬尼拉人質事件)有關嘅特輯。

有別於一般專業時事新聞節目,《東張西望》主持人往往會加入自己個人意見或者立場,甚至會有一啲情緒化嘅表現。另外,佢哋討論一啲議題嘅時候,有時亦會帶有相關嘅商業宣傳。

大事紀

節目喺2005年6月6號起啟播,以替代先前嘅同類型娛樂新聞節目《娛樂大搜查》,2005年9月19號起因播映《百法百眾》第二輯而暫停,之後喺2005年10月31號起恢復播放。當時節目內容以娛樂新聞同埋藝人貼身追訪為主,亦會穿插無綫電視劇集宣傳同埋旗下藝人嘅最新動向。而部份娛樂新聞內容片段會喺第二日嘅《娛樂直播》重播。

2007年12月31號起,節目改用16:9技術製作,並且翡翠台同埋高清翡翠台同步播出。

2009年3月30號起,節目同主持班底都全面改革,並大幅增加時事新聞內容,本來嘅娛樂新聞比例降到兩至三成,有時甚至全集唔播娛樂新聞,縮減嘅娛樂新聞內容就轉至深夜嘅《娛樂頭條》節目中播映。

2012年11月29號起,節目安排喺翡翠台同埋高清翡翠台深夜逢星期二至星期六01:20-01:45(連廣告)重播,但去到2013年3月19號,翡翠台深夜重播時段就改到去01:55-02:25。

主題音樂

節目喺2005年10月31號至2009年3月27號期間嘅主題音樂叫做《Symmetry Of Spirit》,2009年3月30號至2019年3月1號改用新版主題音樂《Gearing Up》。而節目內容預告背景音樂叫做《Laserline》。現今就用咗為徐洛鏘編曲嘅純音樂。

前任主持

節目調動同暫停播映嘅紀錄

自開播以嚟,《東張西望》偶然會因為香港有突發新聞事件,或者無線宣傳重點節目等原因,會安排特備節目而令《東張西望》暫停一日或者更改播放時間。

新聞相關

號期 原因 安排
2005年9月19號至10月28號 播映《百法百眾》第二輯 暫停播映
2006年2月22號 直播《財政預算案論壇 暫停播映
2007年2月28號 直播《財政預算案論壇 暫停播映
2007年3月1號 直播《行政長官候選人答問大會 暫停播映
2007年8月8號 直播《京港心連心倒數迎奧運》 改喺19:30-19:45播出
2007年10月1號 直播《回歸十載迎奧運 國慶煙花匯演》 改喺19:30-19:45播出
2008年8月8號 直播《北京奧運2008開幕禮 暫停播映
2008年8月11號至22號 直播特備節目《北京奧運 黃金直擊》 暫停播映
2008年10月1號 20:55直播《國慶煙花匯演》 劇集《搜神傳》、《少年四大名捕》分別提早喺19:30同埋20:00播映,《東張西望》暫停播映
2008年10月15號 直播《施政論壇 暫停播映
2009年2月25號 直播《財政預算案論壇 暫停播映
2009年8月17號 直播《8.8水災關愛行動 暫停播映
2009年9月11號 直播特備新聞節目《世紀弊案》 暫停播映
2009年10月1號同埋2號 直播《首都國慶聯歡晚會》同埋《香港同胞慶祝中華人民共和國成立六十週年文藝晚會》 暫停播映
2009年10月14號 直播《施政論壇 暫停播映
2009年10月19號 直播《TVB 42周年台慶亮燈 暫停播映
2010年2月24號 直播《財政預算案論壇 暫停播映
2010年4月26號 直播特備節目《演藝界情繫玉樹關愛行動大滙演 暫停播映
2010年4月30號 直播特備節目《上海世界博覽會開幕典禮》 暫停播映
2010年6月17號 六點半新聞報道》直播行政長官曾蔭權同埋公民黨黨魁余若薇政改電視辯論 暫停播映
2010年8月23號 直播有關馬尼拉人質事件嘅《特別新聞報道》 暫停播映
2010年8月25號 當號晚上7時53分去到9時15分直播馬尼拉人質事件嘅《特別新聞報道》 當晚改喺19:30-19:53同埋21:15-21:20播出
2010年9月22號 播映《沙田節開幕典禮 沙田月滿樂安居》 暫停播映
2010年10月13號 直播《施政論壇 暫停播映
2011年2月23號 直播《財政預算案論壇 暫停播映
2011年4月1號 直播特備節目《愛心無國界311燭光晚會 當晚改喺22:05-23:00播出
2011年10月12號 直播《施政論壇 暫停播映
2011年11月11號 播映贊助節目《消防安全進萬家 暫停播映
2012年3月19號 直播《2012行政長官候選人答問大會 暫停播映
2012年7月30號至8月10號 直播特備節目《倫敦奧運一齊睇》 暫停播映
2012年8月17號 播映《2012立法會選舉論壇 區議會(第二) 暫停播映
2012年11月7號 直播特備新聞節目《美國總統大選 暫停播映
2012年11月15號 直播特備新聞節目《中共第五代領導人》 暫停播映
2013年1月16號 直播《施政論壇2013 暫停播映
2014年1月15號 直播《2014施政論壇 暫停播映
2014年2月26號 直播《財政預算案論壇 暫停播映
2014年10月21號 翡翠台直播特備節目《政府、學聯對話 當晚《東張西望》只係喺高清翡翠台首播,而兩台如常喺深夜重播
2015年1月14號 直播《施政論壇 2015 暫停播映
2015年2月25號 直播《財政預算案論壇 暫停播映
2015年3月23號 播映特備新聞節目《李光耀逝世》 暫停播映
2015年12月31號 播映《2015香港大事回顧》 暫停播映
2016年1月13號 直播《施政論壇2016 暫停播映
2016年2月24號 直播《財政預算案論壇 暫停播映
2017年1月18號 直播《施政論壇2017 暫停播映
2017年2月22號 直播《財政預算案論壇 暫停播映
2017年10月11號 直播《施政論壇 暫停播映
2018年2月28號 直播《財政預算案論壇 暫停播映
2019年12月29號 19:00-20:00播映《2019香港大事回顧》 暫停播映
2021年7月23號 直播《2020東京奧運開幕典禮 當晚改喺22:45-23:15播出並且因為開幕典禮直播超時,呢集實際播映時間係23:00-23:15
2021年7月24、26號、8月3、5、6號 直播《2020東京奧運 黃金戰報 暫停播映
2021年7月25號、27號、8月2、4號、7號 直播《2020東京奧運 黃金戰報 當晚改喺19:05-19:30播出
2021年8月8號 直播《2020東京奧運閉幕典禮 暫停播映

就無綫節目同藝人宣傳安排嘅特備版本

日期 事件 變動
2008年2月19號 無綫藝人沈殿霞逝世 播出《東張西望 永恆的開心果 肥姐》特備節目
2008年5月19號 汶川地震 播出《東張西望之四川大地震全民哀悼》特備節目
2009年5月12號 直播《TVB 512再展關懷》 暫停播映
2009年5月29號 劇集《巾幗梟雄》宣傳 19:30-20:15同22:15-22:30播出《東張西望巾幗梟雄會》特備節目
2010年10月18號 播放台慶節目《TVB43年 快樂力量迎台慶》 暫停播映
2011年4月29號 劍橋公爵威廉王子同埋凱特·米德爾頓的婚禮 當晚19:30-20:30播出《東張西望 威廉‧凱特情定今生》特備節目
2011年10月3號 直播台慶特備節目《非凡夢想 邁向45周年》 暫停播映
2011年12月5號 當晚為《萬千星輝頒獎典禮2011》 19:30-20:30播出《東張西望 萬千星輝頒獎典禮2011最強列陣》
2012年10月8號 直播台慶特備節目《凝聚力量 TVB 45周年》 暫停播映
2012年12月17號 當晚為《萬千星輝頒獎典禮2012》 當晚喺19:30-20:00及22:35-23:00分別播出《東張西望 萬千星輝頒獎典禮2012最強列陣》及《東張西望 萬千星輝頒獎典禮王者駕到》,而深夜重播時段為重播後者,前者不作重播。
2013年10月4號 直播台慶節目《時刻裝備 TVB 創造46年傳奇》 暫停播映
2013年12月16號 當晚為《萬千星輝頒獎典禮2013》 當晚喺19:30-20:00及22:30-23:00分別播出《東張西望 萬千星輝頒獎典禮2013 最強列陣》及《東張西望 萬千星輝頒獎典禮 王者誕生》,而深夜重播時段為重播後者,前者不作重播。
2014年1月31號 播映新年特備節目《吾淑吾食 盆滿缽滿過肥年》 暫停播映
2014年10月20號 直播台慶節目《創新經典 TVB邁向48年》 暫停播映
2014年12月15號 當晚為《萬千星輝頒獎典禮2014》 當晚喺19:30-20:00同22:30-23:00分別播出《東張西望 萬千星輝頒獎典禮2014 最強列陣》同埋《東張西望 萬千星輝頒獎典禮 王者誕生》,並不作重播。
2021年4月17號 播映《邁向零碳生活 暫停播映
2021年9月11號 播映《把關者們》製作特輯《把關者們 關.繫全民生》 暫停播映
2021年10月17號 播映《星空下的仁醫》製作特輯《星空下的仁醫 童理之心》 暫停播映

網上迴響

節目部分內容之後被放上無綫各個YouTube官方頻道,有啲得到唔錯嘅點擊率(例如:藝人結婚[2][3]、電話補習班騙案[4]等),甚至一度登上Youtube熱門榜行榜。而2021年10月一次跟進醫療事故嘅環節,李旻芳因為訪問期間哽咽落淚,亦得到一啲網民關注[5]

爭議

節目混合廣告材料被罰

2010年9月10號,廣管局審議兩宗投訴《東張西望》喺2010年1月2月將節目混合廣告材料,節目過分突出商業產品同服務;決定向無綫電視施加罰款港幣4萬港元。[6]

被指盜用他人短片

喺2021年10月,前無綫、商台主持人陳慧儀喺社交媒體開直播節目,同趙汝威討論「浸稀釋漂白水改善濕疹」嘅問題[7]。同年11月,陳慧儀就喺社交媒體入面,指控《東張西望》未經同意同諮詢,就剪咗佢嘅直播節目片段入自己嘅節目入面,仲要串連埋其他植入式廣告。陳慧儀批評,無線嘅做法令人感到混亂同埋有所誤會。佢又強調,無綫喺節目入面宣傳嘅產品(卡倫萬用膏),同佢哋無關係[8]

硬銷政府政策同決定

有部份人抨擊《東張西望》不時猶如政府上身,為政府政策推銷[9][10]。例如:

  • 喺2013年碼頭罷工風潮,《東張西望》嘅「記者」極度偏頗嘅選擇性報導,引起廣泛不滿[9]
  • 喺電視牌照發牌風波入面,香港電視網絡攞唔到牌照,而政府亦冇解釋原因。但《東張西望》就大花章節為政府解釋保駕護航[9]
  • 喺2017年,喺高鐵實施一地兩檢嘅問題上,《東張西望》有兩名主持就喺度一面倒唱好一地兩檢同高鐵嘅好處,完全忽略網絡世界對一地兩檢嘅批評同埋涉及嘅法律問題[9]

不過,佢哋掛住「資訊娛樂節目」嘅牌頭,結果廣管局無例可依,並唔可以好似監管新聞節目咁處理對《東張西望》嘅投訴[9]

對社會問題抱有偏頗預設立場嘅爭議

除咗為政府進行政策硬銷之外,《東張西望》不時喺討論一啲社會問題嘅時候都有偏頗預設立場,甚至用上帶有批評攻擊性嘅字眼形容部分喺呢啲議題入面牽涉嘅人。例如:

  • 喺2015年3月,佢哋曾經有一個關於露宿者嘅專題節目預告,但預告入面形容露宿者為「香港橋霸」,結果被部分網民指責,話佢哋冇諗過呢啲露宿者都唔想,而係走投無路,而節目預告聲稱露宿者霸佔嘅天橋,本來使用率本身已經低,幾個月前更被鐵絲網封閉,形同棄用[11]
  • 喺2017年3月8號,佢哋播出以探討餵哺母乳為主題,但內容被香港母乳育嬰協會同一啲媽媽批評。例如,香港母乳育嬰協會批評《東張西望》抹黑母乳餵哺,話佢哋係「追潮流」,只聚焦餵哺母乳嘅困難,又斷章取義話奶粉嘅營養價值同母乳相若,又只係訪問由香港奶粉生產商所成立嘅香港嬰幼兒營養聯會,甚至喺選擇母乳定係奶粉嘅問題上,將唔同媽媽分為對立兩派。當香港母乳育嬰協會要求接受訪問,無綫更加以希望「避免跟奶粉商對立」而拒絕,明顯係有商業考慮。香港母乳育嬰協會之後表明,會去信通訊事務管理局投訴[12]。截至3月10號,通訊局已接獲141宗相關投訴[13]

對於《東張西望》入面討論社會問題嘅做法,香港中文大學專業進修學院媒體研究客席講師陳龍超喺2014年接受明光社刊物《燭光網絡》嘅時候就話,《東張西望》呢類型資訊娛樂節目內容嘅真確性同公眾利益息息相關,就算做嘅唔係新聞報導,採訪嘅唔係專業記者,亦應該要有專業態度[14]

發佈假新聞

《東張西望》亦曾經唔止一次喺節目入面,發布未經證實嘅假新聞:

  • 喺2016年9月26號,《東張西望》有兩名主持引述網上虛假消息發佈蛇夫座謠言,話美國太空總署已經新增星座「蛇夫座」,並將十二星座重新劃分為十三星座。但有關消息已經被其他媒體廣泛報道係假[9]
  • 喺2020年4月12號,《東張西望》播出咗一段由觀眾提供,內容主要係街頭歌手表演同市民圍觀嘅情況。喺未經求證嘅情況下,主持人聲稱有市民喺「上星期六」喺中環碼頭唔理政府因應武漢肺炎疫情持續而喺3月29號起實施嘅限聚令,四人以上喺公眾地方聚集。[15]街頭歌手龍婷喺當晚11點喺Facebook發表聲明,批評《東張西望內容失實》,澄清片段拍攝嘅係佢喺3月14號嘅演出,並無違令聚眾街演。[16]亦有網民指出,影片片段可能係源自YouTube頻道「mk 61」喺3月14號上載嘅一條影片嘅片段。2020年4月13號,《東張西望》喺節目尾段作出道歉同澄清,但又讚揚提供片段嘅人係熱心觀眾。[17]

採訪熊本地震被指欠缺準備

2016年4月16號,因應日本熊本縣發生7.3級地震,《東張西望》派出攝製隊前往災區拍攝,並且喺4月18號以「熊本連環大地震」為題作報道。李旻芳話本來打算去超級市場買嘢食,但因為地震關係,食物早已被當地災民搶購,附近嘅商戶亦無外賣;一名日本女士得知佢哋想食嘢嗰陣,就為佢哋送上飯團。有網民紛紛批評,話攝製隊出發前準備不足,並加重當地災民嘅負擔,令香港蒙羞。李旻芳就回應話,之後己經歸還食物[18]

同類節目

參考

  1. 《東張西望》跨越三千集慶祝晚宴
  2. https://www.youtube.com/watch?v=CAjp5FgtZZk
  3. https://www.youtube.com/watch?v=KjttBNYsUA8
  4. https://www.youtube.com/watch?v=DAAIOYcSz1c
  5. 張嘉敏 (2021-10-09). "東張西望|6歲天瑜患癌因醫療事故變植物人 李旻芳訪問哽咽落淚". 香港01 (中文). 喺2021-10-10搵到.
  6. [1][失咗效嘅鏈]
  7. 問問Dr. Chiu: 嚴重濕疹有咩天然療法? (英文), 喺2021-11-16搵到
  8. "澄清消息,真係好無奈". Facebook (英文). 喺2021-11-16搵到.
  9. 9.0 9.1 9.2 9.3 9.4 9.5 葉天佑 (2017-07-27). "【TVB】硬銷一地兩檢《東張西望》無王管,猶如政府上身|葉天佑|01博評". 香港01 (中文). 喺2021-11-16搵到.
  10. "當 Spin 變成屎片 | 輔仁文誌". www.vjmedia.com.hk. 喺2021-11-16搵到.
  11. 露宿者是香港橋霸?大婆台與政府齊齊打壓弱勢 T-rexx 2015-03-09
  12. "蘋果日報:餵人奶只為追潮流?真●奶媽鬧爆《東張西望》 2017-03-11". 原著喺2017-09-07歸檔. 喺2021-11-16搵到.
  13. "《東張西望》疑幫奶粉廣告商貶低母乳 逾百港媽投訴TVB". 蘋果日報. 2017-03-13. 原著喺2017-03-13歸檔. 喺2017-03-13搵到.
  14. "娛樂資訊節目 專業持平不可少". 明光社 (中文). 2014-07-14. 喺2021-11-16搵到.
  15. 4月12日 東張西望 之 失實報導、、、無奈 (中文), 喺2020-04-15搵到
  16. "香港旺角小龙女龙婷". www.facebook.com (中文). 喺2020-04-15搵到.
  17. 4月13日 東張西望...終於發聲明澄清 及 道歉🙏 (還一個清白~香港旺角小龍女龍婷) (中文), 喺2020-04-15搵到
  18. 回應收地震災民飯團事件 東張西望李旻芳澄清即時歸還食物,熱血時報,2016-4-19