楊屋道

楊屋道（英文：Yeung Uk Road）係香港一條馬路，喺荃灣中部，條路以楊屋村命名，村已經搬走咗。佢係區內要道，全長約莫九百米，土地填海得返來。1970年代之前，楊屋道係荃灣嘅海邊。楊屋道比較開闊，不過佢喺舊市邊，熱鬧就唔及沙咀道。

楊屋道近楊屋道街市

史

條路以楊屋村命名，不過村已搬到大窩口國瑞路嗰邊。

楊屋道舊時有楊屋道運動場，舊時係個市主要運動場，不過後尾荒廢咗，用唻起樓。家下留返個茶水亭。而另一邊有楊屋道街市，未重建之前，係單層搭建嘅街市，裏面檔口林立。楊屋道同大河道，舊時有荃灣碼頭同荃灣碼頭巴士站，兩者因填海而搬遠。

未擴闊嘅楊屋道，時爲二零零八年九月

2008年10月，香港政府擴闊大河道同馬頭壩道之間一段楊屋道，重整楊屋道同德士古道之間一段馬頭壩道嘅走線、相關嘅渠務工程、環境保護同美化工程。工程喺2011年9月完成。

地理

楊屋道呈東至西向，東面斜北，西面斜南，全道係平路。東面起自德士古道，路口直通葵福道。而西面起自大河道，路口直通海盛路。東面係大窩口工業區，工廠林立，不過。近來有啲轉爲住宅、寫字樓。

沿途商用有如心廣場、荃新天地。住宅有萬景峰、御凱（楊屋道球場原址）、爵悅庭、立坊（H Cube）同埋樂悠居等等。另有唔少唐樓。公共設施有楊屋道街市及楊屋道體育館、荃灣公園、聯仁街熟食小販市場。