荃灣碼頭

荃灣碼頭，係香港新界荃灣沿海嘅一個碼頭，近港鐵屯馬綫荃灣西站嘅南面，而家有珀麗灣客運嘅服務，來回馬灣嘅珀麗灣。

以前，荃灣碼頭係有渡輪來回中環統一碼頭等等，但係因為西區海底隧道通車，令到來往荃灣區同港島區之間嘅車程縮短好多，所以港九小輪有限公司喺2000年 7月1號將呢條渡輪取消^[1] ^[2] ^[3]。

荃灣碼頭原本係一個好大嘅建築物，裏面有入境事務處等政府部門辦公，去連接隔籬嘅荃灣運輸大樓，但因為九廣西鐵（而家叫屯馬綫）嘅工程，碼頭部份清拆同埋進行填海，政府部門亦都搬走。而家嘅躉船碼頭係工程完成之後起嘅。

另外，喺青衣大橋通車之前，荃灣碼頭來往青衣碼頭嘅航線係青衣島嘅主要對外交通工具。

歷史

而家嘅荃灣碼頭已經係第四代，先前經歷咗三次搬遷。

第一代碼頭喺1935年啟用，但喺1942年日本侵佔香港期間俾人炸咗。

第二代喺1958年啟用，位置大概喺而家楊屋道如心廣場附近，1983年因為填海起荃灣路同祈德尊新邨而清拆。

第三代接住喺1983年啟用，喺荃灣路對出嘅填海區，並且設有荃灣運輸大樓，作為荃灣碼頭嘅巴士總站，當時有「荃灣至青衣」、「荃灣至中環」、「荃灣至中環經青衣」、「荃灣至大澳」航線，2000年因為填海起九廣西鐵荃灣西站而清拆，航線亦都停辦。

而家的第四代喺2002年啟用，喺荃灣西站對出嘅填海區。