檸樂煲薑

  「薑檸樂」跳轉到呢度。想搵香港YouTuber，請睇「薑檸樂 (YouTuber)」。

檸樂煲薑係香港一種民間食療，意思即係檸檬可樂煲薑，有時會叫做煲檸樂、煲檸樂加薑或薑檸樂，一啲香港人喺感冒初起時，會煲滾可樂、加入檸檬同老薑，相信噉做可以消除感冒，雖然佢藥效唔清楚，不過暖水、薑本身的確可以紓緩發冷同喉部不適，檸樂煲薑所以成為廣受歡迎嘅藥療。

檸樂煲薑即係將可樂煲滾，然後加入檸檬同老薑以消除感冒。

檸樂煲薑嘅起源已經冇人知，不過傳統上，港人會煲薑茶加紅糖，飲完匿入棉被裏面，焗一身大汗瞓覺，認為噉樣可以紓緩早期感冒。因為薑茶度放咗黑糖，佢嘅色澤偏黑黃，外表同煲滾後嘅檸樂相似。

雖然檸樂煲薑嘅材料冇詳細規定，薑要用味道偏辣嘅老薑，而唔係生薑。而可樂本身已有糖份，所以唔使額外加糖。