毛蟲

毛蟲mou4 cung4（caterpillar）係指鱗翅目（包括咗蝴蝶同飛蛾）嘅幼蟲。毛蟲係呢啲昆蟲生命嘅早期階段，形態係條長條形嘅蟲，多數都有毛，不過亦都有啲物種嘅毛蟲係無毛嘅。

金鳳蝶嘅毛蟲

柑橘鳳蝶嘅毛蟲

食嘢

毛蟲最重要嘅工作就係要猛咁食嘢：絕大多數物種嘅毛蟲都係食齋嘅，食某啲植物維生，例如帝皇斑蝶嘅毛蟲就出嗮名鍾意食乳草嘅葉；啲蝴蝶乸同飛蛾乸生蛋嗰陣，通常會特登將啲蛋生喺毛蟲要食嘅植物身上，噉啲毛蟲一出世就有嘢食；啲毛蟲生咗出嚟就會係噉食嘢，儲起啲養份；佢哋一路食一路脫皮（增齡），去到咁上下就會結蛹－喺蛹嘅階段隻蟲完全唔郁得咁滯，無辦法覓食，所以喺呢段期間，隻蟲正正就係靠毛蟲階段儲起咗嘅養份嚟維生嘅；蛹過一段時間最後就會變成成蟲。

毛蟲好多時都畀人類視為農業上嘅害蟲－有多個物種嘅毛蟲都會食啲重要農作物，會對呢啲農作物造成破壞。

用字

响嚴格嘅昆蟲學上，「毛蟲」淨係指鱗翅目（包括咗蝴蝶同飛蛾）嘅幼蟲：

• 有好多昆蟲都係行完全變態嘅－呢啲昆蟲一出世嗰陣係條幼蟲，幼蟲個樣同成蟲好唔同，幼蟲生到咁上下會結蛹（完全變態嘅最大特徵），結蛹一段時間之後就變成成蟲；包括蜜蜂同螞蟻等嘅膜翅目、甲蟲同埋鱗翅目，都係行完全變態嘅；呢種做法相對於不完全變態－不完全變態嘅昆蟲一出世嗰陣係隻若蟲，若蟲個樣同成蟲相似，會唔經蛹嘅階段就慢慢變成成蟲，例如蟬、螳螂同蜻蜓都係行不完全變態嘅。
• 甲蟲同蜜蜂等嘅幼體雖然都係一條條噉形，但嚴格科學用語會叫佢哋嘅幼體做「幼蟲」（larva），淨係得鱗翅目嘅幼蟲先可以嗌做「毛蟲」。

相集

• 

  呢樖乳草上面有條帝皇斑蝶毛蟲。
  （Danaus plexippus）

• 

  一條帝王斑蝶毛蟲倒吊，準備結蛹。

• 

  骷髏天蛾嘅毛蟲
  （Acherontia lachesis）

• 

  藍老虎飛蛾嘅毛蟲
  （Dysphania percota）

睇埋

• 蝴蝶同飛蛾；呢兩類物種嘅幼體就係毛蟲。
• 蠶蟲同養蠶；蠶蟲係對人嚟講好有用嘅一種毛蟲。
• 寄生蜂；寄生蜂成日會侵襲毛蟲。
• 完全變態同唔完全變態