甲蟲

甲蟲gaap3 cung4（英文：beetlebi1 tou4），學名叫鞘翅目saau1 ci3 muk6（Coleoptera），係一個目嘅昆蟲。同第啲昆蟲一樣，甲蟲嘅身體分做頭、胸同埋腹三橛，身體俾一浸外骨骼包住，佢哋亦都同多數昆蟲一樣有兩對翼。喺外形上，甲蟲最大嘅特徵係「有裝甲」－同第啲昆蟲比起嚟，甲蟲最大嘅特徵係前翼俾零舍硬淨嘅翼鞘包住，當佢哋唔飛嗰陣，對翼鞘就會摺埋𢫏住隻蟲嘅胸同腹，幫手起到保護性嘅作用。

各種嘅甲蟲

甲蟲有極高嘅內部多樣性：甲蟲包含咗成超過 350,000 個物種，係截至 2020 年為止動物界入面物種數量最多嘅一個目－動物物種當中有成 25% 咁多嘅都係甲蟲；成個目包含咗瓢蟲、螢火蟲、兜蟲、鍬甲蟲同象鼻蟲等多種唔同款（而且好多時都顏色鮮艷）嘅昆蟲。因為噉，有好多人都以搜集甲蟲嘅標本為樂。

生命週期

甲蟲冚唪唥都係完全變態嘅，即係話一隻甲蟲一世蟲會經過膥、幼蟲、蛹同埋成蟲四個階段：

• 一隻大咗肚嘅甲蟲乸會喺某啲地方產卵（產卵地點視乎物種而定）；
• 跟手啲幼蟲孵咗出嚟之後就會自己搵嘢食維生，
• 啲幼蟲生到咁上下就會結蛹；
• 當變態（metamorphosis）嘅過程完成咗之後，個蛹會爆開，隻成蟲（甲蟲）就會由個蛹嗰度捐出嚟；等兩對翼乾咗之後，隻甲蟲就會飛去搵嘢食同伴侶；

有好多種物種嘅甲蟲－例子可以睇吓兜蟲同鍬甲蟲－都會靠啲公打交嚟決定邊個有得交配；交配完咗之後，啲甲蟲乸就會搵地方產卵，而「啲成蟲交配完做乜」就視物種而定，有好多物種嘅甲蟲係交配完冬天一到就死嘅，不過都有物種嘅甲蟲可以一路生存到成超過 40 歲咁長命。

重要嘅科

瓢蟲

一隻典型嘅七星瓢蟲

瓢蟲（英式英文：ladybird，讀音似粵音 lei¹ di¹ boek¹；學名：Coccinellidae）係一科好常見嘅細隻甲蟲，分佈廣泛，喺所有熱帶至溫帶種得到農作物嘅地區－包括嶺南地區同英格蘭等地在內－都會見到佢哋嘅蹤影。

瓢蟲有獨特易認嘅外形：佢哋通常係 0.8 到 18 毫米（0.03 到 0.71 吋）長，喺外觀上最樣眼嘅特徵係身體圓碌碌噉形，喺背脊嗰度有色水好鮮艷嘅翼鞘－瓢蟲嘅背脊通常係黃、橙或者紅色做底兼且帶有黑色斑點或者條紋嘅，而頭、腳同埋觸角就多數係黑鼆鼆噉嘅色，亦都有一部份瓢蟲物種係色水冇咁樣眼嘅，例如十二斑褐菌瓢蟲（Vibidia duodecimguttata）就係背脊啡色底帶有白色斑點嘅。

多數物種嘅瓢蟲都屬益蟲：對農夫嚟講，瓢蟲通常都係佢哋樂於見到嘅生物；噉係因為瓢蟲係食肉嘅，會食一啲細隻嘅食草昆蟲（例如係蚜蟲），而瓢蟲食嗰啲食草昆蟲當中好多都係會食同破壞農作物嘅－所以瓢蟲間接幫手保護咗好多農作物，對農夫有利；

螢火蟲

呢隻東方螢火蟲（Photinus pyralis）一路飛一路條尾喺度發光。

螢火蟲（日文：ホタル，hotaru；學名：Lampyridae），喺廣東話裏面又有被人嗌做「放光蟲」，係甲蟲多食亞目下嘅一個科，包含超過 2,000 種物種咁多，主要分佈喺溫帶同熱帶嘅地區。佢哋蟲如其名，最出名嘅特徵係好多物種嘅成蟲都識發光。

螢火蟲對人類嘅文化有一定嘅影響：有唔少人都覺得螢火蟲細細隻識發光噉好得意，會作創作品講螢火蟲，例如知步里工作室嘅《再見螢火蟲》就好出名；除此之外，螢火蟲亦都會被人攞嚟做旗艦物種－因為唔少人都鍾意螢火蟲，所以會想保育佢哋，而生態學家就會運用呢點，用「呢笪土地有螢火蟲」嚟做賣點做生態保育上嘅宣傳。

金甲蟲

1908 年一幅插圖；幅圖描繪昆蟲學家喺當時嘅中歐搵到嘅多種金甲蟲。

一隻公嘅彩虹聖甲蟲（Phanaeus vindex）

金甲蟲（{scarab beetle；學名：Scarabaeidae），粵文正式可以叫金龜子科gam1 gwai1 zi2 fo1，係甲蟲下嘅一個科，包含咗超過 30,000 個物種。

金甲蟲傾向會有

• 硬淨嘅外骨骼，外骨骼好多時都有金屬噉嘅色澤；
• 大細好多變，由 1.5 mm 至 160 mm（16 cm）咁大嘅都有；
• 有觸角，可以攞嚟感知氣味；
• 好多物種都曉喺泥土上面掘窿；
• 行完全變態；
• 多個科嘅金甲蟲啲公嘅頭度都會有大嘅角，啲公會用啲角打交，打贏嘅就有得同啲乸交配，尤其可以睇吓兜蟲同鍬甲蟲。

屎甲蟲都屬於金甲蟲。

睇埋

• 膜翅目
• 鱗翅目

拎

• 維基同享中有關甲蟲嘅資源類
• Coleoptera from the Tree of Life Web Project.
• Coleoptera Atlas
• Beetles – Coleoptera.