民主思路

香港智庫

民主思路Path of Democracy)係一個香港政治組織,初時係智庫組織,立場定位係中間派,2015年6月創辦,召集人係公民黨前成員兼立法會前議員湯家驊。但喺湯家驊加入行政會議之後,湯嘅立場同意見完全同民主派時期嘅佢相違背,所以大部分民主派支持者將湯家驊睇成係親中共派[1][2]

民主思路成立典禮

民主思路喺2015年6月成立,當時嘅香港經歷完雨遮革命,民主派同香港,以及北京政府關係完全破裂,甚至催生出本土派,主張同北京全面對抗。當時啱啱退出公民黨嘅湯家驊牽頭成立,定位係智庫同論政平台,並且打出「修補裂痕 重新上路」嘅口號[3],修補民主派同北京嘅關係。

創會成員入面由溫和民主派到建制派都有,例如陳祖為葉健民、張楚勇、宋恩榮王于漸[4](前三個通常畀人歸類係民主派,後面兩人就屬於建制派)。

不過,成立之後嘅一兩年時間,好多人因為唔同理由退出。

2016年立法會選舉,作為智庫嘅民主思路決定派人出嚟選,分別由黃梓謙出選香港島,麥嘉晉出選新界東。兩人分別攞到10,028票同8,084票,無緣晉身立法會。而學者葉健民同張楚勇就因為民主思路開始政黨化,所以退出[5]

2017年香港特首選舉,湯家驊參選法律界選委,不過落選。之後湯氏好多次喺公開場合同寫文支持林鄭月娥,而成員李律仁同劉培榮亦喺林鄭嘅競選團隊入面。另一方面,總幹事袁彌昌就喺曾俊華嘅團隊入面。特首選舉最後由林鄭月娥贏咗,湯家驊入咗行政會議,成員馮海容就做咗商務及經濟發展局政治助理,陳祖為不滿湯家驊為港府同北京護航,偏離創會原則而退出[6]。去到當時期,民主思路好多核心人物已經走咗。

喺2018年左右,民主思路開始部署嚟緊嘅區議會選舉,佢哋計劃派6個人落區小試牛刀。最後佢哋得4個人真係參選,唔單只全軍覆沒,全部人重因為得票唔夠5%,連保證金都攞唔返。

2019年嗰時,政府提出要修訂逃犯條例,湯家驊作為行會一員,負責同政府向大眾推銷條例。結果社會大眾發生好大嘅反彈,繼而衍生反修例運動。由於湯家驊嘅法律專業,普遍認為湯家驊係有份一手一腳設計逃犯條例修訂嘅人。

參考

  1. "湯家驊倡引例打港獨". 蘋果日報. 2020-03-27.
  2. "湯家驊籲李慧琼主持內會「破局」". 星島日報. 2020-04-16.
  3. "「民主思路」成立 阿湯任召集人 - 香港文匯報". paper.wenweipo.com. 喺2020-02-19搵到.
  4. "湯家驊成立智庫「民主思路」 翟紹唐任榮譽顧問 | 立場報道 | 立場新聞". 立場新聞 Stand News (英文). 喺2020-02-19搵到.
  5. 葉健民:分手時候 "眾新聞 | 民主思路政黨化 葉健民:分手時候". 眾新聞 (中文). 喺2020-02-19搵到.
  6. "眾新聞 | 不滿湯家驊撐政府 陳祖為退民主思路 骨幹幾乎全退". 眾新聞 (中文). 喺2020-02-19搵到.

睇埋

出面網頁