海擎天

海擎天響澳門半島聖安多尼堂區林茂海邊大馬路、船澳街同海灣南街嘅PS1地段。

海擎天
所屬堂區						聖安多尼堂區
承批人						廖澤雲
發展商						新天康投資股份有限公司
房屋類型						私人房屋
房屋用途						住宅
總塔樓座數						4
			第1座
			入伙日子			2010年5月28號
			樓齡			14年
			第2座
			入伙日子			2010年5月28號
			樓齡			14年
			第3座
			入伙日子			2010年5月28號
			樓齡			14年
			第4座
			入伙日子			2010年5月28號
			樓齡			14年
停車場
			海擎天停車場
			詳細資訊一覽 出入口位置：林茂海邊大馬路

背景

改善巴士服務嘅地產收益被私有化爭議

1997年10月2號，澳葡政府為咗畀澳門新福利公共汽車（簡稱新福利）有更好嘅資源，可以唔使加價都可以提供更好嘅巴士服務，所以澳葡政府響第四十期《澳門政府公報》第二組嘅第118/SATOP/97號批示，將一幅位於澳門半島筷子基南灣，以租賃制度同免公開競投方式批畀新福利同廖澤雲（當時係新福利高層），面積一萬零七百五十六平方米，叫PS1地段，響批示公佈嗰日開始計六十個月之內根據批示規範起一幢住宅、商業、停車場、公共巴士總站同巴士維修工場嘅建築物，攞嚟幫補巴士營運，改善設施同改善員工福利待遇，但之後新福利攞到幅地之後一直閒置無發展。

1999年10月25號、2000年3月24號同2002年5月15號遞交申請書，廖澤雲以都市化同環境規定做理由，話尤其係原先附近做船廠嘅地已經轉做遊艇停泊同埋有較大經濟能力嘅中產階級住宅同商業場所地區整公共巴士總站同維修工場會造成負面影響做理據，請求將公共汽車總站搬到另一幅將由政府批出嘅土地。

2002年5月15號，透過申請書請求將土地利用期延長多三年，理由係因為經濟唔好，所以冇發展條件。

2002年9月2號，土地工務運輸局分析有關申請之後，根據7月5號第6/80/M號法律第一百零五條第五款嘅規定，運輸工務司司長歐文龍批示，批准延長利用期限同埋唔科處罰款，同埋批准更改土地的部分用途同之後修改有關合同。即係批準可以唔起維修工場，保留公共巴士總站，但係縮水縮到九百平方米。

2003年11月20號，廖澤雲交咗一份土地利用嘅新初步研究。

2004年3月19號，土地工務運輸局局長批示，呢嗰初步研究被視為可以批准，但係要遵守有關技術條件。

2004年5月24號，由於土地工務運輸局批准新初步研究，廖澤雲根據7月5號第6/80/M號法律第一百零七條嘅規定，正式申請更改土地利用同批給用途。

2004年6月28號，申請將呢幅以租賃制度批出嘅土地所衍生嘅權利轉畀新天康投資股份有限公司，而廖澤雲係呢間公司嘅大股東同董事會主席，而崔世昌亦係呢間公司合伙人，原嚟上邊起咗住宅單位賺咗嘅錢都係屬於新福利，可以用嚟改善服務唔洗加價，改善設施同改善員工福利待遇。但係轉咗嗰名就噉左手交右手，之後呢幅地賺到嘅錢再同新福利冇關係，唯一同新福利有關係嘅就只有地面九百平方米嘅公共巴士總站，就噉澳葡政府原意批嚟幫補巴士營運計劃就變咗地產公司發達嘅計劃。

2005年，特區政府以專營公司唔可以做其他業務做理由，直接將地皮轉畀新福利嘅負責人廖澤雲旗下嘅私人公司，被外界狠批用嚟改善巴士服務嘅土地資源同地產收益被「私有化」。

2006年，土地工務運輸局批出街線圖，寫明PS1地段要有九百平方米嘅公共巴士總站，得新福利巴士公司專用。

2010年，PS1地段起出嚟嘅樓命名做海擎天，加埋四座、高五十六層、一千二百八十八個住宅單位，補地價八千幾萬，新天康公佈賣咗三分之一嘅單位，套現十億。

2010年5月7號，特區公報刊登運輸工務司長批示同批給合同，同意發展商再修改批給，增加土地面積，將樓宇由五十層增高到五十六層，土地溢價金就加到四千三百五十三萬葡幣左右。由於海擎天早響2009年落成同公開發售，當局直到而家先刊憲批准增加土地面積同樓宇高度，懷疑偷步先落成再批示放高，引來外界嘩然。土地工務運輸局局長賈利安為事件解畫，話樓宇增加高度之前，建築圖則已經得到當局批准，屬於合法起樓，可能係修改土地發展合同部分比較慢，所以先有起好之後政府先出公報嘅情況，當局會檢討響之後加快修改土地合同。

2011年7月12號，PS1地段原本用嚟起商住混合巴士車廠同總站嘅用地，變咗五十六層高嘅超級豪宅，原定嘅公共巴士總站計劃交通事務局話一切都有難度，搞到立法會議員反駁話，發展商響要求增加樓宇時候，早就有規定預留空間起公共巴士總站，政府有要求發展商兌現承諾。呢幅地由原來嘅商住混合巴士車廠同總站地皮，早年暗中被做豪宅用地，受到居民批評。公產變私產，原來嘅巴士維修工廠冇咗，估唔到政府連響呢個發展項目入面起一個公共巴士總站都咁難，議員都話噉太冇理由。響人口稠密嘅筷子基、林茂塘，巴士站好少，居民都呻話，出街唔方便，好多市民都記得，其實響筷子基、林茂塘區入面，原來有一個規劃做巴士維修車廠嘅地皮，後來呢塊地，就被轉到新福利巴士公司股東嘅私人名下，就噉樣左手交右手，搖身一變做咗區內最高最貴嘅天價豪宅，居民重話巴士維修車廠冇咗，唔通連公共巴士總站都消失？其實早響2010年，政府公報已經訂明，發展商要預留九百平方米嘅空間用嚟做公共巴士總站。立法會議員（直選）關翠杏質疑，政府畀原來用嚟起巴士維修車廠嘅公家地，變成五十六層高嘅豪宅，而家連呢個只係佔十分一唔夠嘅公共巴士總站都要冇埋？真係太唔應該。而立法會議員（直選）區錦新話，停泊巴士嘅土地要點處理，有冇方法追返來，點樣重新分配，到新巴士服務務式三間公司經營嗰陣，總好過打龍環葡韻填湖做巴士停車場嘅主意。對於坊間有傳海擎天呢個地方，將會用來做公共巴士總站，交通事務局回覆，話有關地段嘅使用，涉及「地權」問題，加埋八月新巴士服務務式開始，改變咗原來巴士公司係專營嘅身份，要點解決呢啲問題，要再研究。

2016年3月7號，海擎天已經落成六年幾，大廈亦跟據2006年發出街線圖留咗九百平方米嘅半室內公共巴士總站，但係就用鐵鍊封住，用嚟泊私家車，後來有居民爆料，先變返冇車泊響到。居民關注呢嗰總站會唔會連埋嗰巴士維修工廠一樣冇埋，之後交通事務局先話巴士公司目前重同財政局處理緊有關手續，要完成嗮先可以同巴士公司磋商地段使用事宜，暗示問題響財政局。但係財政局嘅公關唔明話「究竟係咩財政手續未做？」，之後兩個部門直接對話之後，原來財政局一早已經搞掂嗮啲手續，重通知埋巴士公司，但係交通事務局就咩都唔知，亦冇跟進，搞到居民一直冇得用呢個巴士總站長達六年嘅情況。交通事務局最終回覆傳媒話，已經敦促巴士公司盡快落實有關場地嘅使用安排。據了解巴士公司響到跟進場地使用手續，完成之後，會同交通事務局傾吓之後總站嘅運作，會適時公佈計劃。又話明白呢區居民對巴士服務嘅需求不斷增加，除咗致力優化有關巴士服務，亦積極搵各種方法嚟提升巴士運能同覆蓋面。

超高樓爭議

2014年9月19號，海擎天被傳媒踢爆唔遵守街影高度五十到六十米，豁免街影高度起到一百八十五米，放高三倍，搞到響沿海形成超級屏風，產生「峽谷效應」，嚴重影響周圍社區嘅通風、採光。形成高一百八十五米、闊一百三十米嘅連續巨型屏風樓，座樓冇任何退縮，嚴重遮擋自然風同日照向隔離屋苑同街邊嘅陽光。

空中走廊

内文：林茂海邊大馬路空中走廊

1995年，澳葡政府提出林茂海邊大馬路都市規劃，透過起大廈嗰陣預留嘅閣樓公共行人走廊、大廈之間嘅行人天橋連接，而貫穿成個區嘅空中步行系統（由運順新邨到金灣豪庭），全長九百五十米。其中一條天橋接駁位就響海擎天連接信愉花園嘅行人天橋，街道準線圖列明係要信愉花園負責起呢條天橋，但係呢條行人天橋嘅結構設置位，就要同海擎天地段承批人達成共識先起得。即係話要兩個大廈承批人自己傾，如果兩邊傾唔掂或者冇去傾，噉天橋就起唔到，形成漏洞；再加埋政府冇介入協調同監管，所以到而家呢條天橋都係未起好，每日居民都要行地面嘅斑馬線，尤其係斑馬線隔離嘅勞校幼稚園返放學嗰陣會好塞車。

意外

2012年8月13號晏晝十二點左右，海擎天第一座發生企圖跳樓事件。一個三十二歲姓吳女住戶懷疑情緒激動，企圖跳樓自殺，治安警同消防員到場嗰陣已經返翻入屋，期間吳女媽媽聲稱嗰女有產後抑鬱症。事件擾攘咗一個鐘之後，救護員將吳女送院檢查，冇咩受傷。司警話懷疑跳樓女人冇嘢做，澳門居民。

2013年3月6號朝早九點四十三分，海擎天第二座六樓平台有人跳樓。救護員到場見到一個男人瞓響平台泳池邊到，半身浸響水到，奄奄一息，情況嚴重，救護員立即將佢送去山頂醫院搶救，經過醫護人員證實已經死咗。司警之後到場，話跳樓自殺男人姓陳，二十九歲，澳門居民，賭廳職員。經過調查得知死者住響海擎天第二座高層一個單位，響單位入面發現相信係死者留底嘅遺書。司警話遺書初步顯示涉及債務。相信係一單跳樓自殺案，冇咩可疑。

2017年2月18號晚黑九點左右，海擎天第一座一個高層單位有人跳樓自殺，治安警同消防接報到場發現一個男人瞓咗響六樓平台，立即將佢送院搶救，但傷重不治。司警接手調查，事發嗰陣嘅工人響間房聽到死者響客廳突然大叫「拜拜」，之後走出廳又唔見死者，當時唔知佢已經跳樓，於是打電話通知佢老婆，但係對方響香港。半個幾鐘頭之後，死者外父外母返到案發單位，發現客廳有一個窗開咗，於是伸個頭望吓，發現死者瞓咗響六樓平台。據死者屋企人話，死者生前係做娛樂場沓碼，近排從死者朋友口到得知佢因為工作上問題，心情一直唔好。司警話死者姓蔡、四十幾歲、澳門居民，響死者身上同大廈六樓平台都冇發現任何遺書。經過對屍體初步檢查，冇發現其他懷疑涉及刑事犯罪嘅損傷，案件暫時列做有人墮樓死亡案處理。死因等法醫檢驗之後確定，案件交畀調查科跟進。

2017年3月8號晏晝十二點左右，海擎天二座管理員接獲住客通知平台天井傳出巨響，之後發現一個男人瞓響天井到，救護員到場証實死亡，通知司警跟進。司警話死者姓譚，二十七歲，澳門居民。調查得知死者同老豆老母一齊住響大廈高層，響單位入面發現廁所嗰窗開咗，懷疑就響呢到跳落去。另外死者老豆話，死者響今年農曆新年前從外國返翻嚟，而且一年幾前已經患有抑鬱症，曾經去醫院醫過。而司警響死者間房張枱到發現一張寫咗「無法供養父母」之類字句嘅紙仔，懷疑係遺書。初步調查暫時列做懷疑自殺死亡案處理。死因等法醫檢驗確定。

交通

巴士

巴士站

• 海擎天總站

2016年8月29號，隨著51A開線而正式啓用。

靠站巴士有：51A

睇埋

• 林茂塘PS4地段（當時澳葡政府批畀另一間專營巴士公司澳巴用嚟改善巴士服務嘅商住混合、公共巴士總站同巴士維修工廠嘅地皮）