劉協

 漢獻帝劉協（粵拼：hon3 hin3 dai3 lau4 hip6） （181年—234年4月21號），字伯和baak3 wo4，係東漢最後一個皇帝，在位189年到220年。死後謚號獻帝，所以亦稱漢獻帝。

生平

劉協係漢靈帝劉宏個仔，漢少帝劉辯嘅同父異母細佬，佢阿媽係美人王榮（五官中郎將個孫女）。獻帝重係蘇蝦嗰陣，佢阿媽就俾何皇后殺咗，佢係由伯婆董太后湊大嘅。初時受封為陳留王can4 lau4 wong4。

袁紹誅殺宦官嘅時候，劉協同漢少帝一齊俾宦官張讓、段珪標參，咁啱遇到董卓。董卓試過問少帝，少帝就九唔搭八，再問劉協，劉協就將成件事由頭到尾交代一次。董卓覺得劉協都幾賢能，又係由董太后湊大，自己同董太后又同族，再加埋佢要顯示自己嘅權力，所以就想廢少帝，再立劉協做皇帝。

189年，董卓為咗立威，廢咗少帝，喺九月甲戌日擁立當時只得九歲嘅劉協做皇帝，咁佢就可以挾天子以令諸侯。之後，關東諸侯起兵討伐董卓，董卓火燒都城洛陽，帶埋劉協遷都去長安。董卓死咗之後，佢嘅餘黨李傕、郭汜執政，後來李、郭兩人內訌互片，獻帝就同楊奉一齊着草。196年，曹操恭迎劉協去許昌，叫做許都，改年號做建安，但係劉協都重係一個冇實權嘅皇帝。曹操雖然試圖利用劉協嚟實現佢統一中國嘅目的，但係就唔敢直接取代佢做皇帝。劉協試過諗計殺曹操，但係都唔成功：先有大臣董承聯同劉備等人，後有伏皇后，但係單嘢穿咗，董承被殺而伏皇后就俾人幽閉致死。220年，曹操死咗，佢個仔魏文帝曹丕覺得自己喺北方嘅地位已經夠穩陣，於是乎就喺11月25日逼劉協禪讓個帝位畀佢，創立魏國。劉協之後受封為「山陽公」。

由於當時盛傳劉協已經死咗，所以劉備就順水推舟，追尊劉協做「孝愍皇帝」，自己就以漢室宗親嘅身分登基，建立咗蜀漢。

魏明帝青龍二年（234年）三月庚寅（4月21日），劉協瓜老襯，曹叡着素服為佢發喪。八月壬申，劉協葬咗喺禪陵。

家庭

長輩

• 伯婆 董太后
• 父皇 漢靈帝劉宏
• 大媽 靈思皇后何氏
• 親生阿媽 美人王榮
• 外父
  • 伏完，伏壽個阿爸
  • 曹操，曹節個啊爸
• 妻舅
  • 伏典
  • 董承

后妃

• 伏壽，皇后。
• 曹節，繼后，諡號獻穆曹皇后，曹操個女。
• 曹憲，貴人，曹操個女，曹節個家姐，追諡為孝獻曹皇后。
• 曹華，貴人，曹操個女，曹憲、曹節個妹。
• 董貴人，車騎將軍董承個女
• 宋都，貴人，係常山太守宋泓個女

仔女

仔

• 劉馮，封南阳王，早死。
• 劉熙，封濟陰王。
• 劉懿，封山陽王。
• 劉邈，封濟北王。
• 劉敦，封東海王。
• 另有兩個仔，係伏壽生嘅，唔知乜名，都俾曹操殺咗。

女

• 劉曼，魏文帝黃初四年12月12日（西元224年1月20日）封長樂郡公主，有食邑五百戶。
• 另外有兩個女，都係魏文帝曹丕嘅嬪

孫

• 劉康，劉馮個仔，繼承爵位做咗山陽公51年，喺太康六年（285年）去咗。

曾孫

• 劉瑾，劉康個仔，繼承爵位做咗山陽公4年，喺太康十年（289年）去咗。

玄孫

• 劉秋，繼承爵位做咗山陽公20年，喺永嘉三年（309年）嘅五胡亂華中俾人殺咗。
• 劉阿知，着草去日本，做咗原田氏嘅祖先。

家譜

• 劉阿知，寬政重修諸家譜18

電視劇

以下係以劉協為主題忌電視劇。

• 《三國機密之潛龍在淵》，由馬天宇扮演劉協同孖生細佬劉平。（2018年）

參考

前任： 漢少帝 劉辯	漢朝皇帝 189年－220年	繼任： 漢朝滅亡
	中國君主 189年－220年	繼任： 魏文帝曹丕（北方） 漢昭烈帝劉備（蜀地） 吳大帝孫權（東南部）