漫遊詞

漫遊詞（德文：Wanderwort、德文讀音： [ˈvandɐˌvɔʁt]，眾數：Wanderwörter）係一個語言學概念，指一個常用字詞嘅使用地域好闊，闊到喺好多冇同源關係嘅語文度一齊出現。漫遊詞嘅出現通常係因為通商、文化交流，令互相接觸但唔係同源嘅語文用同一個詞語嚟講同一個概念。最早期嘅漫遊詞喺人類文明出現文字之前，已經喺唔同語文之間借嚟借去，所以根本追溯唔到個詞嘅來源。近期啲嘅漫遊詞，可以透過古籍嚟追溯沿革，並且可以幫歷史學家理解呢啲漫遊詞所指嘅生活小節點樣傳播。

「茶」係一個經典漫遊詞示例。呢張圖影嘅係港式奶茶。

例子

有好多飲食相關嘅日常用字，由中東至西歐都係由漫遊詞包辦，例如（以現代英文做例子）：sugar（糖）、ginger（薑）、copper（銅）、 silver（銀）、 cumin（孜然）、mint（薄荷）、wine（葡萄酒）。呢啲詞語唔少都係透過青銅時代嘅商貿而傳到周圍都係。嗰陣仲未有文字，所以亦好難咬定呢啲詞語究竟係邊個發明、邊個借詞。

「茶」係一個漫遊詞，而且廣東話係呢個漫遊詞嘅傳播史嘅一部分。「茶」字嘅傳播只係幾百年歷史，所以可以透過個字點傳播嚟追遡人類飲茶嘅歷史。世界大部分語文嘅「茶」字一係類似 tê（例如英文 tea）、一係類似 cha（例如英文 chai）。透過海上貿易輸入茶葉嘅文化通常會用出自閩語系嘅 tê 發音；透過陸路輸入茶葉嘅文化通常會用出自官話或者粵語嘅 cha 發音。有啲語文，例如英文，就借晒兩個發音嚟解唔同嘅茶葉種類，tea 解清茶、中國茶、或者冇加香料嘅奶茶；chai 解加咗香料嘅印度茶。