澳門3號巴士

澳門3號巴士係一條由澳門公共汽車有限公司做緊，由外港碼頭總站來回關閘馬路嘅巴士線。

澳門3號巴士
澳門巴士路線系統
管理資訊
監管者				交通事務局
經營者				File:澳巴.png澳巴
所屬車廠				旅遊塔車場
路線用車				宇通ZK6118HGE 宇通ZK6128HGE 宇通ZK6115HG1
路線資訊
路線圖				一覽 關閘總站 關閘馬路 三角花園 提督馬路／雅廉訪 昌明花園 沙梨頭／華寶工業大廈 海邊新街 栢港停車場 新馬路／大豐 殷皇子馬路 亞馬喇前地 葡京酒店 十月一號前地 北京街／假日酒店 高美士／何賢公園 理工學院 高美士／馬六甲街停車場 外港碼頭 友誼馬路／行車天橋 旅遊活動中心 廈門街 (澳門)／理工 東方拱門 治安警察局 約翰四世大馬路 新馬路／永亨 十六浦 水上街市 沙梨頭海邊街 提督／紅街市 蓮峰游泳池 關閘總站
服務資訊
服務時間				關閘：06:00-01:15 外港碼頭：05:45-00:45
班次間隔				繁忙時間4-8分鐘 平時5-10分鐘
全程收費				六蚊葡幣
主要競爭交通				關閘總站→外港碼頭：3A、10、10B、10X、AP1 十六浦、葡京酒店同關閘、港澳碼頭之間嘅發財巴。

呢條線原本係由澳門新福利公共汽車有限公司嚟做，係一條客流非常多嘅巴士線，主要由於呢條線兩邊總站都係出入境口岸，又經旅遊區，好似係新馬路、葡京酒店、金沙之類，所以遊客就非常多；另外，又經台山、筷子基、提督馬路之類住宅區，搭呢條線居民都好多，所以成為澳門市區「線王」。

呢條線由外港碼頭開出嘅尾班車時間係凌晨零時四十五分，曾經係澳門所有日間巴士線到，最遲開出嘅尾班車巴士線（唔包括夜間巴士線）。

背景

1948年4月1號，澳門公共汽車公司成立第一代3號巴士，每8分鐘一班，由媽閣來回關閘，經關閘馬路、提督馬路、沙梨頭、內港嚟行。響1952年1月1號，因為澳門公共汽車公司突然以蝕錢做理由而執咗條線。而響啱啱成立嗰陣亦曾經搞過兩日免費特別車，由議事亭前地來回蓮峰球場。

1952年2月23號，福利接手之後，第二代嘅3路線成立，條線走法係第二代4號嘅逆時針版本；由內港總站開出，經新馬路、南灣大馬路、水坑尾、荷蘭園、亞豐素街、鏡湖馬路、永樂戲院、沙梨頭返總站（18號碼頭），每6分鐘一班，之後響1954年2月3號同4號合併做小環市線。

1965年1月9號，第三代姐係而家走線成立，當時由內港總站來回新口岸，用嚟取代由港澳碼頭來回內港皇宮嘅免費穿梭巴士（由信德船務嚟做，只係響每日晚黑提供服務），另外當時3號亦會響泳季嗰陣延伸到泳棚（水塘北角），取代泳場專線。

1974年6月，呢條線開始加密班次到15分鐘一班，加班車初期，總站按時段設響泳棚、港澳碼頭又或者回力。由於時間安排混亂，乘客搞到一頭霧水，之後統一改做晚黑七點半之前嘅班次以泳棚做總站，晚黑七點半之後嘅班次就以港澳碼頭做總站。

1975年9月22號，呢條線開始響澳門首條試行「前門上車，中門落車」嘅營運模式。

1980年2月29號，呢條線響朝早七點到晏晝四點半延長到台山，由原來嘅兩部車加到三部，班次重係保持十五分鐘一班。晏晝四點半之後嘅班次繼續以內港總站做總站。

1982年1月，呢條線尾班車時間延長到凌晨兩點，曾經係澳門最遲收車嘅巴士線，後嚟改做凌晨十二點四十分，但係人係澳門最遲收車嘅巴士線，一直到2014年12月18號。

1983年，成立3A輔助3號，由司打口來回港澳碼頭，全部用冷氣巴嚟行，係港澳首條巴士全部用冷氣巴嚟行。隨著3A成立，呢條線全部班次改由台山開出。

1985年12月，呢條線去港澳碼頭方向，改行羅理基博士大馬路同新起好嘅綜藝館，唔再經友誼大馬路嚟行。

1989年1月，呢條線實行冇人賣飛嘅上車制度，係首條實行呢種制度嘅大巴巴士線。

1990年9月1號，因應台山嘉翠麗大廈居民投訴噪音問題，而將呢條線延伸到關閘。

1993年11月，新港澳碼頭啟用之後，呢條線總站就延伸到新港澳碼頭。

1995年10月23號，為咗加強票務服務，新福利試行巴士自動收費系統，響呢條線試行智能卡。係澳門地區首個使用呢種新科技嘅巴士公司同巴士線。

1995年12月，首條使用低地台大巴嘅巴士線。

1997年，首條使用超低地台大巴嘅巴士線。

2009年4月26號，交通事務局實施第二階段巴士線調整，響呢條巴士線嘅基礎上，加多條3X快線，由呢條線嘅關閘總站開單頭到亞馬喇前地，分流呢條線嘅人流。之前新福利亦曾經搞過3號短線由關閘來回葡京。

2010年5月12號，交通事務局試用「公共巴士報站系統」，揀咗呢條線做其中一條安GPS全球衛星定位系統做實時報站。

2011年8月1號，新巴士營運模式正式實行，呢條線判咗畀維澳蓮運嚟做，重加強平時去外港碼頭總站班次到最高4分鐘一班。

2011年8月2號，因應呢條線客量極大，加埋新公司司機唔夠，令維澳蓮運出唔夠車，由政府協調新福利臨時派支援車幫手。

2011年8月28號，新福利唔再支援呢條線。

2013年3月16號，延長平時響關閘開出嘅末班車時間係凌晨零時廿分，禮拜同公眾假期就號延長到凌晨零時十九分。

2013年10月2號，維澳蓮運申請破產，呢條線由交通事務局暫時接管九個月。

2013年4月4號到7號清明節期間，為咗配合關閘口岸延長通關，3、18、25同AP1臨時延伸頭班車時間到清晨五點半同尾班車時間延長到凌晨一點半，班次係十五分鐘一班。

2013年11月，首條用全低地台嘅巴士線。

2014年7月1號，呢條線由澳門新時代公共汽車股份有限公司接手嚟做。

2014年12月18號，為咗配合關閘口岸延長通關，將關閘開出嘅頭班車時間提早到朝早六點同延長尾班車時間到凌晨一點十五分，同埋將港澳碼頭開出嘅頭班車時間提早到清晨五點四十五分開出。

2016年3月19號，因為調整白朗古將軍大馬路周圍馬路嘅行車安排，呢條線唔再停「提督馬路/白朗古」、「白朗古將軍馬路」、「台山街市」，改為原線到提督馬路，加停「蓮峰游泳池」之後，經巴波沙行車天橋去關閘總站。

2016年4月23號，去外港碼頭總站方向，停靠「昌明花園」之後，取消停靠「土地廟前地」，加停「沙梨頭/華寶工業大廈」。

2017年2月13號，響每日朝早九點到九點半加開由關閘開出嘅一班車。

2018年4月16號，交通事務局召開記者會，公佈巴士加價同回應4月15號嘅氹仔嘉樂庇總督馬路巴士奪命交通意外，會上交通事務局局長林衍新局先公佈會響4月21號澳門所有公共巴士統一收六蚊葡幣，用澳門通拍卡畀錢就分普通線同快線收費，普通線收三蚊葡幣而快線就收四蚊，餘額由政府補貼，學生卡就響澳門通嘅價錢上再半價，老人同殘疾人士免費，將原本傾好嘅分澳門居民澳門通同普通澳門通收費（普通澳門通重有補助不過補少啲）、學生寒暑假期間取消優惠、老人同殘疾人士卡朝早同晏晝繁忙時間取消優惠（唔想老人同殘疾人士同返工啲人逼車）嘅全部內容唔實行，又將六十分鐘入面補差價由澳門線轉氹仔線嘅轉乘安排取消，澳門線轉氹仔線受澳門線轉澳門線轉乘時間一樣四十五分鐘，轉路環線就保留六十分鐘轉乘時間，林衍新話加價係基於澳門巴士好多年都冇加價（同樣理由已經響早排交通事務局服務費、鎖轆費、分階段調整咪錶收費用過），同埋佢嘅局預算冇加，但係補貼巴士公司嘅錢就不停噉加，所以點都要加，重話加幅比2008年巴士加價幅度細，調整幅度相對溫和，被人批評交通事務局冇經過大多數民意支持就霸王硬上弓話加就加夾硬嚟，2008年巴士雖然加價，但係當年第一任交通事務局局長汪雲為咗吸引多啲人搭巴士支持綠色出行，第一次推出澳門通拍卡有補貼，變相減咗價，但係由於冇區分澳門居民同遊客，所以交通事務局補貼費用年年上升，惹嚟澳門市民反感，要求區分收費，但今次方案諮詢嗰陣有提到，但冇實行。

2018年4月21號，澳門巴士票價調整，呢條線嘅收費亦跟住調整：全程收費係六蚊葡幣，唔再分區收費。

2018年8月1號，呢條線改由澳巴營運。

2018年8月17號起，由於新馬路8月16號下晝恢復雙向行車，呢條線恢復原線行駛。

2018年10月27號起，為明確巴士站位置同埋令巴士服務更符合市民旅行需要，「高美士/何賢公園」站改名為「高美士/利澳」站。

2018年12月15號，關閘廣場地下公共客運總站恢復運作。回復為雙向線，維持停靠現有站點並按原路線行駛。

2019年4月6號，為改善內港北一帶因暴雨造成嘅水浸問題及遇上天文潮時出現嘅輕微海水倒灌，市政署開展「內港北雨水泵站箱涵渠建造工程」，包括喺內港北建造雨水泵站、箱涵渠、鋪設排水渠道等工作。隨住工程推進，當日朝早十點鐘開始，將安排唔同管線公司係巴素打爾古街進行遷移管線工程，而渠道嘅過街工程同埋部份路面枱升工作亦會喺呢個階段進行。屆時，介乎新馬路同水雞巷之間嘅一段巴素打爾古街實施有限度通車，而巴素打爾古街由沙利頭往新馬路方向維持兩線行車；往關閘方向「十六浦」站會臨時唔停靠。

2019年7月27號起，多個巴士站開始改名:：

• 「水上街市」站改為「沙梨頭街市」站
• 「旅遊活動中心」站改為「金蓮花廣場」站
• 「十月一日前地」站改為「十月一號前地」站

2019年8月31嘅起，因「內港北雨水泵站箱涵渠建造工程」完工，呢條線開始恢復番原線停靠。

2020年4月18嘅，亞馬喇前地整治土建工程完工，呢條線正式取消停靠「亞馬喇前地」站。

用車

因為人流多，一直以來都係用大巴嚟行。

福利年代

響福利年代，主要用從英國買入嘅二手Bristol L5G（1939-1950年出廠）同Bristol LS5G（1950年代出廠）嚟行。

響1975年，福利委托九巴首次訂購全新利蘭亞比安巴士（VK1、VK2）嚟行呢條線。

二手Bristol L5G同Bristol LS5G服務直到1980年代初期全新利蘭亞比安巴士同全新五十鈴JCR460冇冷氣巴士（兩款都配新亞車身）投入服務之後為止。

新福利年代

1988年，福利改組成現時的新福利公司。1989年，載客量高而且重有冷氣嘅三菱FUSO大巴（F車）投入服務之後就立即行嚟條線（呢款巴士亦同時行5號），用嚟疏導客流，間唔中亦有五十鈴巴士（S車）行嚟條線。隨著FUSO巴士投入服務同利蘭逐步退役，呢條線響1989年8月份正式用嗮冷氣巴服務。1995年尾開始，新福利將買到嘅新巴士都擺響呢條線度行，例如1995年丹尼士飛鏢（D01-D10）同1997年猛獅13.230（M01-M10）巴士，後來呢批車都被調走。2004年引入丹尼士飛鏢SLF超低地台10米巴士行呢條線，2005年重引入載客量更多嘅丹尼士飛鏢SLF超低地台11米巴士嚟行，呢批車載客量超過FUSO大巴之外，由於呢批車成十一米長，成為當時澳門最長同載客量最多嘅巴士，有「超長大巴」嘅美譽，疏導呢條線嘅客量有極大作用，響2009年FUSO大巴退役之後重更加成為呢條線嘅主力。2005年，新福利引入首批大陸廈門金龍XMQ6103G巴士亦率先擺響呢條線。2008年開始，引入蘇州金龍十米巴士亦將幾部擺響呢條線。2008到2009年，新福利買咗十五部十二米長蘇州金龍巴士（K101-K115）擺到呢條線，呢批巴士載客量係九十人以上，係最適合用響呢條線度，而FUSO大巴則響2009年開始抽離呢條線，由丹尼士飛鏢SLF 11米巴士、蘇州金龍十二米巴士取代。

雖然呢條線以大巴為主，但係亦曾經用過小巴，例如單門版本三菱Rosa，也曾經出現過呢條線（呢種情況多數出現響凌晨收車前嘅班次）。

響農曆新年、五一、十一黃金週之類嘅假期，新福利重會派出超過四十部以上巴士來行呢條線。

響2011年8月1號之前，呢條線成日出現車款：

• 2005年Dennis Dart SLF 11米大巴
• 2008、2009年蘇州金龍十二米大巴
• 2008年蘇州金龍十米中巴（歐盟三型）
• 曾經出現呢氣線車款
  • 三菱Rosa單門/雙門（多數響凌晨）
  • 廈門金龍XMQ6103G 10.3米中巴
  • 蘇州金龍9.26米中巴（歐盟二型又或者歐盟三型）
  • 蘇州金龍9.6米中巴
  • 蘇州金龍10米中巴（歐盟二型）
  • 蘇州金龍（海格）KLQ6108GQ30 10.8米大巴（響2011年7月30同號投入服務）
  • 黃海10.5米大巴
  • 丹尼士飛鏢9.8米中巴
  • Dennis Dart SLF 10米大巴
  • 平治 O814中巴
  • 猛獅13.230大巴
  • 五十鈴JCR460ZZ大巴

響2011年8月2到28號期間，新福利支援維澳蓮運巴士公司，初期就用蘇州金龍十二米大巴、Dennis Dart SLF 十一米（有時派出十米）同埋海格10.8米（輪椅版KLQ6108GQ30同唔係輪椅版KLQ6108GQ28）巴士，後期全部改用新投入服務嘅海格KLQ6108GQ30 10.8米巴士。

維澳蓮運年代

由2011年8月1號開始，改用宇通ZK6118HGE巴士嚟行呢條線。

維澳蓮運接手初期，曾經用過宇通中巴行過一段時間。

2011年9月份開學日期間，維澳蓮運總共派出廿五部巴士行呢條線，係維澳蓮運接手之後擺最多巴士嚟行嘅巴士線。

2013年11月，維澳蓮運引入一部原本係香港九龍巴士訂單嘅宇通ZK6128HQ1歐五十二米大巴做測試，最後呢部測試車到月尾30號就退返畀代理商。

新時代年代

2014年7月1號，仍然用緊2011年宇通ZK6118HGE大巴。

2014年11月到12月期間，第一個禮拜有一部全新宇通歐四ZK6118HGE 10.8米嚟行呢條線，其餘九部全新巴士就派去行其他巴士線，第二個禮拜全數十部宇通歐四ZK6118HGE 10.8米全新大巴就行嗮呢條線。

2015年1月，開始大部分改用宇通ZK6128HGE 十二米大巴（5001-5025），只係派出幾部2011年宇通ZK6118HGE大巴嚟行呢條線。

2015年12月28號，再有全新一批宇通ZK6128HGE 十二米大巴（5025-5045）行呢條線。

2016年4月，新時代向宇通租借ZK6140HGA 13.7米同ZK6180HGAA 十八米接駁巴士測試車響1、3、3X、10號到做唔車客測試，試車試下呢批車響澳門實用性，結果比預期理想。

2016年11月14號，再有新一批宇通ZK6115HG1 3098-3137行呢條線，不過就只有一兩部。

2016年11月14號之後，呢條線成日睇到車款：

• 2014-2015年宇通ZK6128HGE（新時代、澳巴新買宇通大巴）5001-5045做主力。
• 2016年宇通ZK6115HG1 3098-3137做輔助。
• 宇通ZK6118HGE（包括原維澳蓮運2011年3001-3087同2014年3088-3097）做輔助。

澳巴年代

• 宇通ZK6128HGE（5001-5050)爲主車。
• 宇通ZK6115HG1（3124-3137）為次車。
• 宇通ZK6118HGE（3001-3087、3088-3097，3170-3190）爲次車。
• 宇通ZK6105HG（3138-3161）為次車
• 2019年春節同埋國慶黃金週，曾派出宇通ZK6902HG中巴、金旅 XML6105J15大巴同埋12米宇通ZK6128HNGE天然氣大巴行駛。

走線

車費

• 全程車費：澳門幣六蚊。
• 用澳門通普通卡，只係扣三蚊，其餘由政府畀。
• 用澳門通學生卡，只係扣蚊半，其餘由政府畀。
• 用澳門通長者卡，免費，其餘由政府畀。
• 用澳門通殘疾卡，免費，其餘由政府畀。
• 澳門通IC卡月票適用。

服務

服務時間	每日
關閘	06:00-01:15
外港碼頭	05:45-00:45
班次	繁忙時間4-7分鐘，平時5-10分鐘

停站

3號走線圖

去外港碼頭方向
關閘總站 關閘馬路 三角花園 提督馬路／雅廉訪 昌明花園 沙梨頭／華寶工業大廈 海邊新街 栢港停車場 新馬路／大豐 殷皇子馬路 亞馬喇前地 葡京酒店 十月一號前地 北京街／假號酒店 高美士／何賢公園 理工學院 高美士／馬六甲街停車場 外港碼頭
去關閘方向
外港碼頭 友誼馬路／行車天橋 旅遊活動中心 廈門街／理工 東方拱門 治安警察局 約翰四世大馬路 新馬路／永亨 十六浦 水上街市 沙梨頭海邊街 提督／紅街市 蓮峰游泳池 巴坡沙大馬路 關閘總站

客量

呢條線係澳門市區主要巴士線之一，途經多個旺區（葡京、新馬路、提督馬路之類嘅地方），沿途都係住宅區、商業區、旅客區，加埋有人會利用呢條線到關閘同埋港澳碼頭，雖然沿路都有其他巴士線競爭（10、10B、32之類），但係呢條線班次非常密，服務範圍大，幾乎冇其他巴士線可以同呢條線做競爭，所以呢條線成為「主線」同「流水線」。唔理邊個方向、邊個巴士站，都有大量人流嚟搭，響繁忙時間出嘅車都可以打爆嗮（響維澳蓮運時期就重明顯）。而家呢條線主要客量都係旅客同住響附近嘅市民為主，從平時嘅時段，到接近凌晨收車都可以爆客。

因為呢條線客量極大，交通事務局之後開嘅3X疏導呢條線嘅巨大人流。響長假期同禮拜嗰時，呢條線就成日爆棚，響新馬路上唔到車嘅情況就日日都見到。自從3X、4號回程改經林茂塘之後，呢條線客量就進一步上升。

2016年9月，交通事務局局長林衍新話，3號同33號載客量而經接近三萬人次，係澳門最多人搭嘅巴士線，未來有需要對有關巴士線加開特班車又或者改用更大型巴士嚟行。

呢條線嘅競爭包括5號同10號之類，同埋去十六浦、葡京酒店同關閘、港澳碼頭之間嘅發財車。

爭議

3號有澳門市區「線王」嘅花名，原先係新福利做，響維澳蓮運接手嘅第一日，班次嚴重甩班，因為司機唔夠，同埋以前新福利係用長十一米同十二米嘅大巴來行，而維澳蓮運嘅「大巴」車長只有10.5米，冇辦法疏導人流。

2011年8月29號曾經有消息話呢條線交返畀新福利嚟做，但係一場挖角潮，令新福利人手緊張，響8月28號宣佈終止呢嗰計劃，所以呢條線繼續由維澳蓮運嚟做。8月26號維澳蓮運收到3號重新交畀新福利嚟做之後，響當日即刻賣廣告以一萬八千「超高人工」同十萬蚊「加盟獎金」請司機，引嚟澳門交通行業挖角潮。

2013年維澳蓮運引入一部原來香港九龍巴士訂單嘅宇通ZK6128HQ1歐五十二米全低地台大巴做測試，做咗兩年幾第一次買十二米大巴，同年十一月開始響3號度做測試，疏導呢條線客流明顯，但係呢部車測試到月尾30號之後就退返畀代理商。

不過重有唔少市民同網友希望呢條線立即畀返新福利嚟做。

重大意外

新巴士營運模式之前

2007年4月6號，一架3號Fuso大巴行到沙梨頭嗰陣，司機位近引擎嘅地方突然着火冒煙，司機立即疏散響車到三十幾個乘客，響報警同時用滅火器將火救熄，消防員到場之前，司機已經將火救熄。事件入面冇人受傷。

新巴士營運模式之後

由於維澳蓮運意外太多，只係出比較大嘅意外：

2012年3月5號中午十二點左右，一架3號維澳蓮運「宇通」大巴（車隊編號：3048）正響北京街／假號酒店巴士站埋站，一個八十二歲阿婆響落車嗰陣畀巴士後轆車過雙腳。治安警察局話，事發嗰陣呢個阿婆響新口岸北京街巴士站落車，懷疑阿婆未落完車，司機就開車，搞到阿婆差錯腳仆咗響地到，之後被巴士後轆車過，身受重傷，之後要截肢。事件引嚟澳門社會極大迴響，唔少市民打畀電台，要求政府處罰維澳蓮運，改善司機工作態度，又建議加車務員同埋改善車款設計，方便乘客上落；交通事務局亦公開要求維澳蓮運改善車款設計。

2012年4月12號晚黑十點左右，一架3號「宇通」維澳蓮運大巴（車隊編號：3040）響約翰四世大馬路近葡文學校巴士站出站嗰陣急煞，搞到一個四歲女童頭部受傷，個頭要縫針。

相

• 
  福利做嘅3號
• 
  2011年8月1號新巴士專營權模式運作之前，新福利做嘅3號
• 
  2011年8月1號-2014年6月30號，維澳蓮運做嘅3號
• 
  而家新時代做嘅3號
• 
  而家新時代做嘅3號
• 
  而家新時代做嘅3號

睇埋

• 澳門巴士線一覽
• 澳門巴士轉乘服務
• 澳門巴士車費優惠計劃

拎

• （繁體中文）澳門新時代公共汽車股份有限公司