激進民主派
激進民主派，又叫激進泛民陣營、進步民主派，係香港泛民主派入面比較激進嘅一個派別。
佢哋有啲會自稱「進步民主派」或「真正民主派」，甚至「非泛民」，指責溫和民主派向中共「乞求民主」。親中媒體就叫佢哋做「激進反對派」或者「極端反對派」。
激進民主派同溫和民主派出現政治分歧（例如社會主義）。佢哋同抗爭派喺其他政治、社會或經濟立場上（例如本土主義）都有唔同。
因為香港本土意識抬頭，2010年代中期逐漸再分裂出抗爭派（香港本土派同自決派），再後嚟分裂出修憲派。
2012至2016年，第5屆香港立法會激進民主派議員之中有3個人，包括陳偉業（大嚿）、梁國雄（長毛）同陳志全（慢必），佢哋合稱「大長慢」。
