獵鹿博弈

獵鹿博弈（粵音：Lip6 luk2 bok3 jik6），又叫保證博弈，係博弈論上會分析嘅經典博弈。呢種博弈講到，兩個獵人可以選擇合作獵大隻嘅鹿（高收益但需要合作）或者各自獵兔（低收益但穩陣）。假如兩個人都齊齊去獵鹿，雙方都會有高回報；但如果是但一個轉向去獵兔，另外嗰個人就咩都得唔到。

獵鹿博弈其中一個特徵，就係佢有多過一個拿殊均衡點：雙方都選擇合作同雙方都選擇自己獵兔；兩者都係穩定嘅形勢，喺呢兩種情況下雙方都冇誘因單方面改變策略。

獵鹿博弈呢個模型喺經濟學、政治學同動物學都有用。例如好多動物物種都會成群打獵，而獵鹿博弈嘅概念就可以解釋到點解佢哋有誘因做呢樣嘢。此外，獵鹿博弈噉嘅形勢，亦都會喺人類社會當中出現，被指係合約等社會現象嘅成因。

基本個款

睇埋：博弈論

想像依家有兩位獵人，佢哋需要做選擇，揀合作捉一隻鹿（高收益但需要合作）定係合作捉一隻兔仔（低收益但一個人上都搞得掂）。喺最基本嗰款獵鹿博弈當中，兩位獵人冇得事先夾定去獵鹿定去獵兔，只可以各自做決定：

• 假如佢哋咁啱一齊決定去獵鹿（Stag，S），佢哋就齊齊得到大回報。
• 假如佢哋一個去獵鹿另一個去獵兔（Hare，H），獵鹿嗰個咩都冇，獵兔嗰個得到中回報。
• 假如佢哋咁啱一齊決定去獵兔，佢哋得到小回報（平分件中回報）。

呢場博弈其中一個可能嘅報償矩陣如下：

	合作捕鹿	單獨捕兔
合作捕鹿	(3, 3)	(0, 2)
單獨捕兔	(2, 0)	(1, 1)

廣義化嘅話，個報償矩陣係噉嘅：

	合作捕鹿	單獨捕兔
合作捕鹿	(a, a)	(c, b)
單獨捕兔	(b, c)	(d, d)

當中 a > d 而且 a > b > c 。圖像化嘅話：

呢場遊戲有兩個純策略拿殊均衡點：

• 雙方合作捕鹿（高風險高收益）。
• 雙方各自單獨捕兔（低風險低收益）。

喺呢兩個狀態下，雙方都冇誘因單方面改變策略。

現實應用

内文：合作

喺社會科學上，獵鹿博弈成日攞嚟分析合作同相關嘅行為。無論係人定係第啲動物，合作行為都可以用獵鹿博弈嚟剖析。噉係因為好多現實情境都係齊齊合作就最著數，各自為政著數少咗，自己合作對方唔合作就最唔著數。

假設一群灰狼需要合作捉大型獵物（獵鹿）但每隻狼都可以單獨捕捉細隻嘅獵物（獵兔）。佢哋嘅選項有合作捕鹿或者單獨捕兔，收益如下：

• 如果狼群合作，捉到鹿會得到大量嘅肉，夠晒成群狼分享。
• 如果得一部分狼合作，有狼選擇去捕兔，合作方可能會失敗咩都捉唔到，而捕兔方就會得到少量嘅肉。
• 如果所有狼都自己走去捉兔仔，雖然避免大失敗，但係每隻狼只能夠獲得少量嘅肉。

狼群合作就可以獲得最高收益，但需要所有狼都信任對方並且加入合作行動。如果某些狼唔信任群體選擇自己走去捕兔，就可能導致成場捕鹿行動失敗。

容許溝通

睇埋：溝通同信任

喺獵鹿博弈裡便，事前溝通可以顯著影響結果。最基本嗰款獵鹿博弈唔容許參與者事先溝通，佢哋一定要做咗選擇之後先會知對方做咗咩選擇。對於博弈者嚟講，佢哋唔知對方會唔會合作，如果自己揀合作而對方唔合作，自己就會損失慘重。但係假如參與者能夠行動前溝通，佢哋就可以事先講定要合作，而假如佢哋信任對方（信對方嘅承諾）就會更容易協調到合作捕鹿，更願意選擇高收益高風險嘅選項。

事實係，經濟學同政治學等領域嘅研究者成日都會思考容許溝通嘅獵鹿博弈，用呢個模型嚟解釋點解人類會互相協調做出合作嘅行為。例如（商業同政治上嘅）合同以至人際關係當中嘅合作，都可以用獵鹿博弈嘅方式嚟諗。

睇埋

• 監犯困境
• 多數無知
• 社會契約
• 聖誕節休戰

外拎

• （英文） 博弈論 101：獵鹿同埋純策略拿殊均衡點，YouTube 呢段短短哋嘅影片，講獵鹿博弈嘅拿殊均衡點。