社會科學

社會科學se5 wui2 fo1 hok6（英文：social science），粵文簡稱社科se5 fo1，係指有系統咁用科學方法研究人類、團體同埋社會嘅學問。

基礎

首先，社會科學建基於「科學」嘅諗頭，會好似物理學同化學等嘅自然科學噉跟足科學方法做研究；不過同呢啲自然科學唔同嘅係，社科研究嘅係社會同人類行為。社科界會：

1. 根據手上已知係真嘅事實，諗一啲理論出嚟（「基於我哋經已觀察到嘅呢啲現象，我推測啲現象背後嘅法則係噉噉噉，令社會有噉嘅特性」），呢啲理論好多時係用數學模型嘅方式嚟表達嘅；
2. 跟手就靠邏輯性嘅思考，去諗吓呢柞理論會做點樣嘅預測（「如果我提倡嘅呢個理論係真確嘅，理應會...」）；
3. 然後就做實驗同觀察嚟攞數據，驗證吓個理論嘅預測係咪真確（「如果我呢個理論係真確，呢個實驗理應會得出某個某個結果，而個實際嘅實驗結果係...」）；
4. 如果數據顯示，個理論係做唔到準確嘅預測嘅話，就要一係根據攞到嘅數據睇吓個理論要點改先可以令佢做到準確啲嘅預測，一係就要諗新理論取代舊理論。

上述嘅過程會係噉不斷重複，直至手上嘅理論做得到完全準確嘅預測為止－於是乎社會科學就有持續嘅發展，做到愈嚟愈準嘅預測。

一個人玩河內塔嗰陣個腦入面發生咩事呢？ 領域：心理學，尤其係認知心理學 一個人玩河內塔嗰陣個腦入面發生咩事呢？ 領域：心理學，尤其係認知心理學  股價嘅變化會跟從啲咩規律呢？ 領域：經濟學同金融學 股價嘅變化會跟從啲咩規律呢？ 領域：經濟學同金融學  巨石陣嘅特性反映當時啲人嘅文化係點呢？ 領域：考古學 巨石陣嘅特性反映當時啲人嘅文化係點呢？ 領域：考古學

學科

社會科學包括：

• 心理學（psychology）：研究人類嘅行為、認知同情緒，簡單嘅例子包括研究人類嘅記憶力（可以靠「喺記憶測試上嘅表現」嚟量度）或者智能（可以用智商測驗嚟量度）同各腦區嘅活動有咩關係。廿一世紀初嘅心理學同神經科學以及動物行為學有相當嘅重疊。
• 社會學（sociology）：研究社會嘅秩序同一般法則，簡單嘅例子有研究文化（可以靠問卷調查等嘅方式嚟大致噉量度）嘅隨時間變化會唔會跟從乜嘢規律。社會學有陣時會俾人覺得係人文嘅一環，不過可以用到一啲幾數學性嘅研究方法（例子可以睇個體為本模型呢種電腦模擬做法）。
• 經濟學（economics）：研究人點樣生產、分配同消費有限嘅資源，簡單嘅例子有研究一個經濟體嘅普羅大眾使錢嘅方式（錢係一種資源；量度：每個月攞幾多錢嚟做投資？啲錢使落乜嘢嗰度？）。經濟學出嗮名鍾意用大量嘅數學模型嚟分析自己研究嘅現象，當中博弈論就好出名。
• 語言學（linguistics）：研究人類嘅語言，包括研究語言之間嘅關係（例如粵語同官話都屬漢語、英文同德文都屬日耳曼語族）或者人腦點樣處理語言呀噉；語言學時不時都會涉及研究人腦或者人類嘅行為，所以有時會俾人分類做心靈科學（睇下面）嘅一門。
• 考古學（archaeology）：通過發掘同調查古人嘅遺跡遺物同文獻（物質文化）嚟研究古代社會－考古學研究者會嘗試搵出古人留落嚟嘅文物（例如係古代嘅工藝品或者建築物），用放射性定年法等嘅方法嚟判定每件文物有幾耐歷史，並且用呢啲文物做基礎判斷古人嘅生活方式。考古學好多時會俾人當係人文學科。
• 資訊科學（information science）：泛指研究分析、儲藏同操控資訊嘅領域；資訊科學其中最出名嘅一環係圖書館學，會研究圖書館（可以包括數碼圖書館）等儲起資訊嘅社會產物點樣影響人同人之間嘅資訊傳播，以及呢啲資訊傳播會對社會造成咩影響。要留意嘅係，啲人講資訊科學有時會包埋一啲唔係社會科學、但同資訊好有啦掕嘅領域，例如電腦科學。
• 政治學
• 軍事學
• 法學
• 犯罪學
• 教育學
• 新聞學
• 公共關係學
• 公共行政學
• 傳播學
• 民族學
• 民俗學
• 宗教學
• 人類學
• 組織心理學
• 組織行為學
• 文藝學
• 史學

睇埋

• 商學
• 人文
• 社會現象
• 腦神經學，社科同生物學之間嗰條連繫。
• 統計分析，社科成日要用嘅技術。
• 複雜系統，社科成日要面對嘅一種問題。