理財計劃

理財計劃lei5 coi4 gai3 waat6（英文：financial planning）係一種專業，負責向啲客提供有關個人理財同投資等事務嘅建議。理財計劃師就係專業做呢樣嘢嘅人。

2020 年美國佛羅里達州一角嘅一座雕像描繪牛同熊喺度坐搖搖板。

步驟

睇埋：個人理財

做理財計劃大致上有以下呢啲步驟：

1. 評估狀況：要睇勻嗮反映個客嘅財務狀況嘅資訊－包括係佢嘅資產負債表同損益表呀噉；資產負債表會列出嗮嗰個人嘅資產（包括咗股票、儲蓄戶口入面嘅錢、不動產同汽車... 等等）同埋佢有啲咩負債（包括咗信用咭爭幾多錢同供樓... 等等），而損益表會講明個人喺一段時間內賺到幾多錢同有乜使費；有齊呢啲資訊喺手，就可以清楚噉評估個客嘅財務狀況。
2. 設立目標：個人要諗定一啲明確嘅目標，例如「賺多啲錢」唔係一個明確嘅目標，而「喺 65 歲退休，到時自己資產值 5,000,000 文美金」就係一個明確嘅目標；喺現實應用上，做理財嘅人好多時會有短期同長期嘅目標，短期嘅目標可能係想「到咗今年 6 月就儲夠錢買部新嘅手提電腦」，而長期嘅目標可能係講想退休嗰陣有幾多幾多資產。
3. 制定計劃：個人要諗好跟住落嚟啲使費或者投資要點安排，包括諗好嗮用咩方法嚟做投資同埋每種方法投資幾多資產，例如講明每個月嘅入息有幾多 % 嘅要攞去投資，當中嗰啲投資用嘅錢有幾多 % 嘅攞嚟買股票同要買邊隻股票，又有幾多 % 嘅要攞嚟買外匯同要買邊隻外匯... 呀噉（預算）。
4. 實行計劃：按第 4 步入面度好咗嘅計劃嚟行事。
5. 重新評估：評估個計劃有冇實行好同埋係咪一如意料噉達到目標。

上述嘅步驟就噉睇好似好簡單噉，但查實可以涉及好撈絞嘅程序，例如諗投資就實要計啲風險相關嘅嘢，所以有唔少人喺做理財計劃嗰時都會請理財計劃師或者律師等嘅專業人士幫手。

睇埋

• 實際價值
• 財務管理
• 金融學