異質字悖論

異質字悖論（粵音：ji6 zat1 zi6 bui3 leon6）係有關語義同自指嘅一個悖論。講到字詞係咪具有自己所指嘅性質，以及係呢種特性所引起嘅悖論。

上圖有兩隻 Blue（英文藍色噉解）噉嘅文字，上面嘅 Blue 本身係藍色所以係自質字，而下面嘅 Blue 本身係紅色所以係異質字。

嗌法

第啲語言嘅嗌法：

• 英文：heterological paradox / Grelling-Nelson paradox

背景

内文：自質字同異質字

睇埋：自指同定義

首先，思考語言學上講到嘅自質字同異質字概念。

• 自質字：如果話一隻形容詞係自質字，即係話佢描述緊自己具有嘅特性，例如
  • 英文字 English（可以係英文嘅或者英格蘭嘅噉解）就係自質字，因為隻字描述緊嗰樣特性－英文嘅－係描述緊佢自己有嘅特性；
  • 又或者英文字 Hellenic（嚟自希臘嘅噉解）噉－隻字詞源上係由古希臘文 Ἑλληνικός（羅馬字：ellhnikos）嗰度嚟嘅，所以隻字都算係描述緊佢自己有嘅特性。
• 異質字：如果話一隻形容詞係異質字，即係話佢唔係描述緊自己，例如英文字 misspelled（串錯咗噉解）就係異質字，因為隻字並冇串錯，唔具有隻字描述緊嗰樣特性（串錯咗呢樣特性）。

定義上，一隻字應該冇可能同時係自質字又係異質字。呢點係邏輯上講嘅排中律－排中律係古典邏輯最出名嘅法則之一，主張是但攞句陳述嚟睇，一係句陳述真確，一係句嘢嘅 negation 真確。

悖論

噉問題嚟喇：

「

英文『heterological』呢隻字，本身係自質字定異質字呢？

」

呢條問題就噉望落似答唔到：

• 答「係自質字」嘅話，
  1. 「『Heterological』呢隻字係自質字」→
  2. 噉「heterological」理應係描述緊佢自己 →
  3. 「Heterological」呢隻字理應具有「heterological」呢樣特性 →
  4. 有「heterological」呢樣特性，就理應係異質字（同點 1 出現矛盾）。

• 答「係異質字」嘅話，
  1. 「『Heterological』呢隻字係異質字」→
  2. 噉「heterological」理應唔係描述緊佢自己 →
  3. 「Heterological」呢隻字理應唔具有「heterological」嘅特性 →
  4. 冇「heterological」呢樣特性，就理應唔係異質字（同點 1 出現矛盾）。

－無論答乜，都會引致矛盾。

異質字悖論呢個諗頭最早响 1908 年有人提及。到咗廿一世紀初，邏輯學同語言學等領域對於呢條問題要點解答，仲未有乜共識。

睇埋

• 羅素悖論
• 大話精悖論
• 停機問題，好似停機問題噉嘅問題顯示，有一啲問題係運算機械永遠冇可能解決到嘅，反映咗運算機械本質上嘅局限。