秀茂坪天主教小學

秀茂坪天主教小學（英文：Sau Mau Ping Cathotic Primary School ）係香港一間津貼小學，係天主教香港教區屬下小學，隸屬觀塘耶穌復活堂堂區。呢間學校喺1971年成立，2001年由舊秀茂坪邨搬去寶達邨依家嘅地址。

歷史

呢間學校喺1971年創立，一開始剩係得上午校，去到1973年先有下午校^[3] 。

1996年嗰陣，同邨嘅天主教潔心學校及浸信宣道會明基小學因為要重建而結束，另外宣基學校亦都要暫停辦學兩年，呢間學校於是接收嗰啲學校所有未畢業嘅學生^[4] 。

呢間學校原本嘅校舍受到秀茂坪邨整體重建計劃嘅影響，要喺2003年拆卸。所以呢間學校喺2000年申請搬校舍，最後批准咗搬去同區寶達邨嘅新校舍^[5] 。喺2001年9月，呢間學校正式搬入去新嘅校舍，仲將上、下午校合併做全日制。

依家呢間學校由小學一年級至小學六年級，每級開5班，總共有30班^[6] 。

舊校址喺前秀茂坪邨第25座隔籬，係邨入面11座標準的「火柴盒」小學其中一間。嗰個校舍計埋地下總共有6層，總共有24間課室同埋特別室。

隨住秀茂坪邨重建同埋新校舍起好，舊校舍已經喺2001年騰空，2003年拆咗。舊址喺2009年完成重建，依家係秀茂坪南邨秀好樓。

新嘅校舍喺寶達邨嘅達康樓及達富樓附近，係一座早期型設計嘅小學千禧校舍，佔地大約6,200平方米。校舍係綑綁喺寶達邨一期工程合約入面，由金門建築^[7]承建，最後喺2001年5月完工。

新嘅校舍總共有30個課室、1個禮堂同埋3個操場。另外仲有圖書館、創科學習中心、生態學習中心、英語室、視覺藝術室、音樂室等等。^[8]

呢間學校係區議會選舉中寶達選區嘅指定投票站^[9]。

2010年5月27號，一個姓陸嘅婦人因為佢讀呢間學校嘅女，喺嗰個學期嘅操行被人下調到C級，喺要求見校長但係被拒絕之後，衝上呢間學校7樓天台嗰度企圖跳樓自殺，最後喺教師制止下返番安全位置同埋送院檢查^[11] 。
2012年11月30號，呢間學校一個女教師喺帶學生參觀香港科學館期間，被館外濕滑嘅渠蓋跣親，整親背脊，事後復唔到工。差唔多五年之後，呢間學校入稟控告康樂及文化事務署，就呢件事索償209萬元^[12] 。

巴士
- 九巴：13D、13M、13P（繁忙時間路線）、13X、93A、93K、93M（繁忙時間路線）、95、95M、98A、98C、213D、213M、213X、214、290、290A、N293（通宵路線）
- 過海隧道巴士：601、601P（繁忙時間路線）、613、N691（通宵路線）
- 機場巴士：A26、A29P
小巴
- 綠色專線小巴
  - 來往九龍區：71A、71B、76A
  - 來往新界區（將軍澳）：12、12A、13、17、19S（通宵路線）、106、111
- 紅色公共小巴
  - 來往觀塘、旺角、佐敦