科學方法

科學方法（粵拼：fo1 hok6 fong1 faat3）係一套靠實證嚟了解宇宙嘅技巧，亦係現代科學嘅其中一個根基：搞親科學嘅人一定會用科學方法嚟研究自己在意嘅現象嘅－由物理學同生物學等嘅自然科學至經濟學等嘅社會科學都係噉。

科學方法嘅流程圖解

定義

睇埋：科學

原則上，「科學方法」呢個詞可以噉樣嚟定義：

「

原版英文："... principles and procedures for the systematic pursuit of knowledge involving the recognition and formulation of a problem, the collection of data through observation and experiment, and the formulation and testing of hypotheses." 粵文翻譯：（科學方法係）一套原則同程序，用嚟俾人有系統噉追求知識，涉及搵出問題、通過觀察同實驗嚟搜集數據以及陳述同驗證假說。

」

步驟

睇埋：觀察同實驗

科學方法有以下幾個步驟：

• 喺日常生活嗰度觀察吓研究緊嘅現象，對現象嘅運作原理等提出問題，即係要諗吓呢啲現象係咪而家有嘅理論（嚴格上係指會做可否證嘅預測嘅知識體）解唔解釋得到，而如果唔得，就要諗吓有冇啲乜嘢新嘅定律有可能解釋到呢柞現象；
• 基於諗出嚟嘅新定律或者理論，諗一啲有得驗證嘅假說（指由理論嗰度衍生出嚟，有得直接觀察但係未經證實嘅講法）出嚟；
• 做實驗或者系統化嘅觀察嚟睇吓嗰柞假說係咪啱（驗證個假說）；
• 分析手上嘅數據；
• 做總結－
  • 如果數據撐條新定律嘅話，噉就將呢個新發現夾入去現有嘅理論入面，形成一個解釋能力更勁嘅新理論；
  • 如果數據唔撐條新定律嘅話，就重新諗過；
• 重複。

理論

内文：科學理論

喺科學方法當中，科學理論係一個重要嘅概念：喺嚴格嘅科學上嚟講，「理論」係指一啲解釋現象嘅模型，而且呢啲模型實要有可否證度先可以算係科學理論；「有可否證度」意思係指會個理論會做一啲可以用實證嚟驗證（睇吓佢係真定假）嘅預測。不可否證嘅理論唔可以算係科學理論，而係假科學，例子有風水等嘅嘢，例－

阿松：大師，今年阿明嘅運程點呀？

大師：阿明佢今年恐怕有生命危險。

一年後...

阿松：大師，阿明佢全年都好安全喎。

大師：冇呀，我話佢今年恐怕有生命危險之嘛。（無論結果阿明有冇生命危險，大師都有籍口兜到－無論結果係點，佢講嘅嘢都唔會受到否證。）

基於驗證嘅結果，理論可能會畀人發現佢哋需要改善甚至畀人發現佢哋係錯嘅。呢個循環，由預測、檢試、到改善，可能會重複好多次，甚至會無限期噉重複，直到個理論勁到能夠完美噉預測大自然嘅現象為止。

睇埋

• 科學（科學哲學）
• 學術寫作
• 工程設計
• 統計學
• 企咗喺巨人嘅膊頭上面

拎

• （英文） An Introduction to Science: Scientific Thinking and a scientific method.
• （英文） Introduction to the scientific method.
• （英文） Theory-ladenness.