小調

  想搵第二個意思嘅話，請睇小調 (搞清楚)。

小調（英文：minor scale）係一類音階，基本上同大調類似，都係由七個音或者七個音程組成，但係特徵係音階嘅第三個音會低同名大調一個半音（flat third），例如 C 大調第三個音符係 E 音，而 C 小調嘅第三個音就係 E♭（讀「E-flat」）。

喺傳統嘅西樂樂理，小調會再分三種，分別係自然小調（natural minor）、和聲小調（harmonic minor）同旋律小調（melodic minor）；不過其實有第啲小調，例如西樂嘅五聲音階亦有佢嘅五聲小調音階。

自然小調

C 自然小調 / C 伊奧利安調式。

構成自然小調嘅音程係全音、半音、全音、全音、半音、全音、全音。

自然小調有第個名，叫伊奧利安調式（Aeolian mode）。所謂伊奧利安調式，係指如果由某大調嘅第六級音開始，彈一個八度，就會得出對應嘅自然小調，調號同原本嘅大調一樣；呢兩個調嘅關係叫關係調，關係小調嘅主音（音階嘅第一個音）低過關係大調嘅主音三個半音。

有啲音樂人認為，如果話一件作品係用咗伊奧利安調式（而唔係話佢用咗自然小調），就應該寫到佢唔似調性音樂。

順階和弦

構成自然小調嘅七個音，對應七個順階和弦：

名		構成音	性質	例（C 自然小調）
羅馬數字	數字和弦
i	1-	1-3-5	小和弦
ii°	2°	2-4-6	減和弦
III	3	3-5-7	大和弦
iv	4-	4-6-1	小和弦
v	5-	5-7-2	小和弦
VI	6	6-1-3	大和弦
VII	7	7-2-4	大和弦

和聲小調

C 和聲小調。

和聲小調基於自然小調，但係第七個音亦升半音；構成和聲小調嘅音程係全音、半音、全音、全音、半音、半音三度、半音。

佢之所以叫和聲小調，係因為寫和聲嗰陣用嘅小和弦通常係用呢種小調（不過如果唔牽涉到第七個音，整出嚟嘅和弦同用自然小調唔會有分別）。和聲小調嘅調號同自然小調一樣，第七個音升半音要用臨時記號。

順階和弦

構成和聲小調嘅七個音，對應七個順階和弦：

名		構成音	音程		性質	例（C 和聲小調）
羅馬數字	數字和弦		下半	上半
i	1-	1-3-5	小三度	大三度	小和弦
ii°	2°	2-4-6	小三度	小三度	減和弦
III⁺	3⁺	3-5-7♯	大三度	大三度	增和弦
iv	4-	4-6-1	小三度	大三度	小和弦
V	5	5-7♯-2	大三度	小三度	大和弦
VI	6	6-1-3	大三度	小三度	大和弦
vii°	7°	7♯-2-4	小三度	小三度	減和弦

旋律小調

C 旋律小調。

旋律小調亦係基於自然小調，但係升上去嘅上行形同落返嚟嘅下行形唔同；上行形第六、七個音都升半音，下行形同自然小調一樣。構成旋律小調嘅音程，上行係全音、半音、全音、全音、全音、全音、半音，下行係全音、全音、半音、全音、全音、半音、全音。

佢叫旋律小調，係因為寫旋律嗰陣通常係用佢。佢嘅調號同自然小調一樣，第六同七個音有需要嘅時候要用臨時記號。

順階和弦

構成旋律小調上行形七個音，下行形都係七個音，但係因為上落唔同嘅第六級同第七級會影響和弦結構，旋律小調同上面嗰兩種唔同，唔係七個順階和弦，而係有成 13 個。

除咗第一個順階和弦唔涉及第六同第七級音所以上落一樣之外，其餘六個都係上落唔同。上行形係呢七個：

名		構成音	音程		性質	例（C 旋律小調）
羅馬數字	數字和弦		下半	上半
i	1-	1-3-5	小三度	大三度	小和弦
ii°	2°	2-4-6♯	小三度	大三度	小和弦
III⁺	3⁺	3-5-7♯	大三度	大三度	增和弦
IV	4	4-6♯-1	大三度	小三度	大和弦
V	5	5-7♯-2	大三度	小三度	大和弦
vi°	6°	6♯-1-3	小三度	小三度	減和弦
vii°	7°	7♯-2-4	小三度	小三度	減和弦

下行形同自然小調一樣。

例

好似降 E 小調（E♭ minor）就係一段出名嘅小調（除咗第二個音 F 音之外，啲音符冚唪唥要降號）：

但係用降 E 小調寫旋律，除非係想用伊奧利安調式，其實通常唔會用上面嗰隻，而係會用旋律小調，上去同落返嚟唔同：

書目

• 課程發展處藝術教育組 (2023年9月)。〈音樂科學與教常用英漢辭彙〉 (PDF) (英文、香港中文)。教育局。喺2024年7月22號搵到。
• Bray, Trevor (n.d.). "Relative minor and relative major". An introduction to music theory (美國英文). The Open University. 喺2024年10月28號搵到.
• Chi, Kennedy (2017年10月15號)。〈日本五聲音階〉。喺2024年10月28號搵到。

自然音階同埋調
Circle of fifths	調號嘅升/降號數量 升號 降號 大調 小調 大調 小調 常用七大/小調 0 C大調 - A小調 1 G大調 E小調 F大調 D小調 2 D大調 B小調 B♭大調 G小調 3 A大調 F♯小調 E♭大調 C小調 4 E大調 C♯小調 A♭大調 F小調 5 B大調 G♯小調 D♭大調 B♭小調 6 F♯大調 D♯小調 G♭大調 E♭小調 7 C♯大調 A♯小調 C♭大調 A♭小調 理論調 8 G♯大調 E♯小調 F♭大調 D♭小調