維度

  想搵向量空間嘅維度嘅話，請睇維度 (向量空間)。

維度（粵拼：wai4 dou6；英文：dimension），又叫做維數（粵拼：wai4 sou3），喺數學同物理學可以理解做獨立參數嘅數目。舉例說明，一條線嘅空間係一維，得個長度，因為分析者淨係需要用一個數（$x$）就可以講明某一點喺呢個空間入面嘅邊個位；一塊平面係二維，由（互相獨立嘅）長度同闊度形成，分析者要用兩個數（$x,y$）先可以講清楚某一點喺呢個空間入面嘅邊個位... 如此類推。

由左上到右下：零維係一點，一維係線，二維係一個長同闊（或者曲線）嘅面積，三維係二維加上高度形成體積。

物理學入便講親「維度」通常係指獨立嘅時空座標嘅數量，即係三維嘅空間，再加埋時間做第四維度。喺古典力學裏面，空間同時間係冇直接啦掕、而且絕對永恆不變嘅兩樣嘢嚟嘅，即係所謂嘅絕對時空（absolute space and time）概念；不過自從廿世紀起相對論（theory of relativity）改革咗人對時空嘅睇法，令人知道時空唔係絕對嘅，而一件事件位於時空當中嘅邊一點係取決於（相對於）觀察者嘅郁動。

非整數

雖然一般人都習慣咗維度數量係整數，但係喺碎形入面維度唔一定係整數，而可能會係一個唔係整數嘅有理數，甚至係無理數。

睇埋

• 幾何
• 碎形
• 降維