羅國洲Eddie Lo1958年2007年5月17號),花名「洲官」,香港出世,曾經係香港騎師練馬師,係香港史上最年輕嘅練馬師[1]

簡歷 編輯

羅國洲喺1972年9月1號,成為第一屆香港賽馬會騎師訓練班學生,當時14歲。1974年拜英國練馬師莊布朗做師父。從騎成績不錯,騎咗一共7年,一共贏咗68場頭馬,但因為體重嘅問題,喺1981年掛靴,做羅拔臣馬房嘅副練馬師,曾經跟隨過業餘時代嘅前騎師同練馬師鄭棣池學嘢。1986年2月,廉政公署取締上海幫造馬集團,鄭棣池因為咁而停牌,佢嘅馬房管理就改由羅國洲負責,管理一共50幾匹馬。佢當時以28歲嘅年齡做練馬師,係當時香港最年輕嘅練馬師[2]

1993年10月佢被發現喺屋企藏有大麻可卡因,之後被法庭判罪名唔成立。1997年佢患上心絞痛,並且做咗心臟冠狀動脈擴張手術。2004年5月因為健康問題向馬會交還練馬師牌,並轉做馬會客戶主任,喺賽馬日為馬場嘅馬迷提供現場賽事形勢分析,並曾經喺電視賽馬節目中做客席主持。

2007年5月15號,佢喺屋企冲完凉踏出冲凉房時冼倒,後腦撞向啞鈴,被送往灣仔律敦治醫院,縫咗8針,因為後腦有血塊被轉送去瑪麗醫院,第日朝早做腦部手術,但手術失敗,喺同日下晝兩點死亡[3]

練馬事業 編輯

羅國洲做咗練馬師18年,直到2004年5月為止,贏過共317場頭馬。佢旗下馬匹嘅「鑽中寶」[4],喺1987至1988年度嘅馬季成為香港馬王。1989至1990年度馬季喺羅國洲有史以來最好成績嘅一季,贏咗43場頭馬,喺排行榜第三名,僅喺簡炳墀約翰摩亞之後。

家庭 編輯

羅國洲嘅老竇做過健身教練,哥哥係評馬人羅國輝,曾經係電視藝員。1997年,羅國洲曾經同鄧芷君結婚,但喺1998年離婚。

參考 編輯