羅湖 (香港)

羅湖

羅湖邊境禁區告示牌

沙嶺

1898年《展拓香港界址專條》附圖，羅湖（Lo-u）喺幅圖中間

羅湖（粵拼：lo4 wu4，英文：Lo Wu），係香港新界一笪地方，喺上水北面，貼住深圳邊界。自從1898年6月9號，大清同英國喺北京簽訂《展拓香港界址專條》後，羅湖就一分為二。深圳河北面嘅羅湖依家屬中國大陸管轄（今廣東深圳羅湖區），而深圳河南面嘅就屬於香港，依家由北區管理。

羅湖設有港鐵東鐵綫羅湖站。去中國大陸嘅旅客，可以喺車站落車後，通過香港嗰面嘅口岸，做完出境手續，先過深圳河上面嘅羅湖橋，去到深圳嘅聯檢大樓，再入境深圳。此外，1985到87年期間，政府為咗減輕紅磡同羅湖站嘅壓力，計劃喺新界西區建設落馬洲過境通道，通道喺1990年元旦假前已經完成。羅湖站出面嘅禁區雖然已經解封，不過嚮度出站嘅人一定要拎住禁區紙先過得。

羅湖附近有一個沙嶺墳場，嗰度以前係禁區，不過宜家已經解咗封。每逢清明節同重陽節，區外人士去拜山可以唔使申請禁區紙由羅湖站行過去。平時嘅話就要嚮上水站搭九巴73K線或者小巴59K去。

區議會議席分佈

由於羅湖人口唔夠成為一個區議會選區，所以成日同隔離嘅河上鄉、古洞同雙魚河沿線等鄉村範圍劃為同一個選區。

年度/範圍	2000-2003	2004-2007	2008-2011	2012-2015	2016-2019
整個羅湖	N08 上水鄉郊選區				N11 上水鄉郊選區