肇州
45°42′6.1″N 125°16′2.4″E / 45.701694°N 125.267333°E
| 肇州縣 | |
|---|---|
| 地圖 | |
 | |
| 肇州縣喺大慶市內嘅地理位置 | |
| 明細 | |
| 粵拼 | siu6 zau1 jyun6*2 |
| 普通話拼音 | Zhàozhōu xiàn |
| 所屬省級政區 | 黑龍江省 |
| 所屬地級政區 | 大慶市 |
| 政區類別 | 縣 |
| 成立 | 1906年（建置）[1] 1913年（設縣）[1] |
| 政府駐地 | 肇州鎮[2] |
| 首長 | 馮小平（縣長）[3] 王恩龍（縣委書記）[3] |
| 面積 | |
| - 全部 | 2,445 km2（944 sq mi）[4] |
| 鎮數目 | 6[5] |
| 鄉數目 | 6[5] |
| 人口（2018） | 42萬9815人[6] |
| 人口密度 | 175.79 人/km² |
| 本地生產總值（2018） | 115.6億元[6]人民幣 |
| 郵政編碼 | 166400[2] |
| 電話區號 | 0459[2] |
| 車牌 | 黑E |
| 時區 | 本地時區：UTC+9 |
| 網站： 肇州縣政府 | |
肇州（粵拼：siu6 zau1）係中國黑龍江大慶嘅縣，位於黑龍江省西南部[2]。面積2445 km²[4]，人口42萬幾（2018年）[6]。縣府駐肇州鎮。
肇州位於松嫩平原腹地，全境都係沖積平原，地勢平，平均海拔150米，境域內未有洪水記錄[7]。肇州處於長春、哈爾濱、大慶、齊齊哈爾經濟地帶，境內有大廣高速、203國道同埋其他高級公路穿過。肇州係大慶油田緊要嘅外圍開發區，年產原油100萬噸，其中慶深氣田探明天然氣儲量一千億立方米以上，係中國五大氣田之一[4]。
史
編輯| 中國地名變遷 | |
| 建置 | 1906年2月1號[8] |
| 現名 | 肇州縣 |
| 清 | 肇州廳（1906年以後） |
|---|---|
| 中華民國 | 肇州廳（1912年~1913年） 肇州縣（1913年以後） |
| 中華人民共和國 | 肇州縣（1949年以後） |
「肇州」個名源於金太祖完顏阿骨打喺呢帶打咗場出河店之戰，大敗遼軍，奠定咗金國基礎，所以喺金國立國後話呢度係「祖宗肇興」「肇基王績」，所以設個州起名爲「肇州」，「肇」嘅意思係「開始、興起」，州治喺今日肇源茂興鎮東南12公里處嘅勒勒營子[9][10]。
肇州地處中國東北，三千年前嘅白金堡文化遺址表明嗰陣時已經入青銅時代，之後歷代呢度係東北遊牧漁獵民族嘅領地[1]。遼代時屬上京道泰州府；金代時呢度設肇州，下轄始興縣（而家肇源民意鄉莽海古城），隸屬於上京會寧府。當時肇州好大，有五萬平方公里，仲大過而家嘅大慶市，大約喺松花江南、呼蘭河到林甸一帶[10][8][11]。元代時呢度屬遼陽行省開元路，係斡赤斤嘅分封地，至元三十年（1293年）又設肇州，元貞元年（1295年）設肇州屯田萬戶府，不過州府治所改喺而家肇東四站嘅八里古城遺址度。明代屬奴兒干都司嘅朵顏衛，作爲海西西陸道第一個驛站，設肇州站；洪熙元年（1425年），呢度變成蒙古郭爾羅斯部嘅牧地。清順治五年（1648年），郭爾羅斯部分成前後兩旗，今日肇州、肇源、肇東、大同都係屬哲里木盟嘅郭爾羅斯後旗[10][11][8]。
金、清兩代，都因爲南下中原，帶走咗大批滿洲人口，清代時重封禁滿洲，唔畀關內人入，所以當時滿洲有大片無人區，肇州當時亦好荒蕪。光緒年間終於開禁，開荒招墾，呢度係蒙古人牧地，係蒙荒，之後闖關東嘅移民潮令呢度嘅主體民族變成咗山東來嘅漢人，經濟由遊牧變成農耕[1]。光緒三十一年（1905年）設立郭爾羅斯後旗巡防局，正式放荒。當時嘅理刑主事慶山勘定安字十二井子中心做設署基地，呢個地方即係而家嘅肇州縣城肇州鎮，又叫老城基、老街基。不過遞年（1906年）正式設署時，當時嘅同知認爲駱駝脖子喺松花江邊，交通便利過老城基，結果將衙門搬來呢度，駱駝脖子即係而家嘅肇源縣城肇源鎮[10][8][11]。1906年設署時叫肇州廳，性質係直隸廳（二級政區），廳係清代嘅政區，設喺新開發地帶。
1903年穿過呢度嘅中東鐵路通車，肇州東面發展起身，於是民國成立後，1912年11月將東部劃出做肇東設治局，1914年將鐵路沿線1700平方公里嘅肇州地方劃出做肇東縣，至此肇州分出咗肇東。期間嘅1913年因爲省都督令，廳改爲縣做肇州縣，一直延續到家下。滿洲國時期，1934年因為松花江水災搬縣府去老城基，1935年劃嫩江、松花江沿岸同舊縣城歸郭爾羅斯後旗，後來呢部分成立咗肇源。於是舊有嘅肇州劃成「三肇」：肇州、肇東、肇源[1][8]。
隸屬方面，設廳時作爲直隸廳屬黑龍江將軍，1907年設省改屬黑龍江省。1914年6月屬新設嘅龍江道，1929年2月廢道再由省直轄，爲二等縣。滿洲國時初屬黑龍江省，1934年12月改屬濱江省。1945年滿洲國崩潰後，初屬哈西專區，1946年3月改屬吉江行政區，當年6月改爲嫩江省。1947年2月到9月間屬黑嫩聯合省第四專區，黑嫩分開後繼續屬嫩江。1949年5月，嫩江併入到黑龍江，肇州由黑龍江省直轄。1958年8月27號，由省直轄改屬松花江專區。1959年11月，肇州轄下嘅大同、群眾、新生、聯合、中心5個鄉鎮同肇源嘅大官、興隆兩個鄉合併做大慶區，1960年5月26號大慶區同安達縣合併成安達市，日後安達市演變成而家嘅大慶市。1965年6月14號，舊松花江專區改名做綏化專區/地區。1992年8月21號，肇州由綏化改屬大慶[8]。
氣候
編輯肇州地處黑龍江省第一積温帶，屬於中温帶大陸性季風氣候，年均活動積温2800℃，無霜期約143日[7]。肇州由於位於中高緯內陸，所以四季分明，物候變化顯著，年均温3.6℃，錄得極端低温-36.8℃，錄得極端高温38.1℃，年均日照量2899.4小時，年均降水量53.1毫米。
政區
編輯攷
編輯- ↑ 1.0 1.1 1.2 1.3 1.4 〈歷史沿革〉。肇州縣政府。2015年6月30號。原著喺2015-09-12歸檔。喺2015年10月3號搵到。
- ↑ 2.0 2.1 2.2 2.3 〈肇州縣概況地圖〉。行政區劃網。2012年11月15號。原著喺2016年3月10號歸檔。喺2015年10月3號搵到。
- ↑ 3.0 3.1 〈領導之窗〉。肇州縣政府。喺2019年3月7號搵到。
{{cite web}}: CS1 maint: url-status (link) - ↑ 4.0 4.1 4.2 4.3 〈概況〉。肇州縣政府。2015年5月30號。原著喺2015-09-23歸檔。喺2015年10月3號搵到。
- ↑ 5.0 5.1 5.2 〈2013年統計用區劃代碼：肇州縣〉。中華人民共和國國家統計局。喺2015年10月3號搵到。
- ↑ 6.0 6.1 6.2 〈2018年肇州縣國民經濟和社會發展統計公報〉。《肇州縣政府》。2019年6月28號。喺2020年6月4號搵到。
{{cite web}}: CS1 maint: url-status (link) - ↑ 7.0 7.1 〈大慶市肇州縣地圖〉。圖吧。喺2015年10月5號搵到。
{{cite web}}: CS1 maint: url-status (link) - ↑ 8.0 8.1 8.2 8.3 8.4 8.5 〈肇州縣歷史沿革〉。行政區劃網。2012年11月15號。喺2015年10月4號搵到。
- ↑ 《金史》：「天會八年以太祖兵勝遼，肇基王績於此，遂建爲州，下轄一縣曰始興。」金太祖係1114年喺出河店（家下茂興鎮南邊嘅昂喇勒古城）打贏遼軍嘅，1130年設肇州。
- ↑ 10.0 10.1 10.2 10.3 楊滿良、楊慧姝。〈大金國的建立及「三肇」和大同的歷史由來〉. 《人·鬼和神——中國民俗作品集（1）》。ACADEMIC PRESS (CORP)。頁 35~40頁。ISBN 978-1-936040-05-6。
- ↑ 11.0 11.1 11.2 〈肇州縣〉。行政區域網。喺2015年10月4號搵到。