韋莊

韋莊（粵拼：wai4*5 zong1；836年—910年），字端己（dyun1 gei2），諡文靖（man4 zing6），係大唐末到五代初前蜀嘅官員同有名嘅詩人、詞人，京兆杜陵人（而家陝西西安嘅南郊）。韋莊係花間派代表詞人，同溫庭筠並稱爲溫韋。

韋莊
字	端己
出世	836年
死	910年 成都
國籍	大唐、前蜀
別名	韋文靖
籍貫	京兆杜陵（陝西西安）
職業	詩人、詞人、官員
知名作品	《菩薩蠻》、《女冠子》、《臺城》、《秦婦吟》

生平

韋莊係京兆杜陵人；韋莊係唐代宰相韋見素嘅子孫。

佢考咗好多次科舉都落第。其中唐僖宗嘅880年，黃巢引軍入長安，嗰陣時佢喺嗰度應試。睇到兵荒馬亂嘅景象，佢好心赤，之後寫出出名長詩《秦婦吟》。

883年，佢到洛陽（而家屬中國河南），然後落江南漂泊。

之後直到昭宗嘅乾寧元年（894年），佢58歲先及第到進士，做咗校書郎。當時，喺四川王建起叛亂，佢係雄踞一方嘅大軍閥，朝廷派李詢做正使、韋莊做補佐赴四川宣撫，韋莊就噉入仕王建，爲王建建立前蜀王朝出咗唔少力，先係做判官，之後擔任過吏部侍郎、同平章事。

907年，知道咗唐哀帝畀權臣朱全忠廢黜，王建於是登基做皇帝，建立前蜀（五代十國之一），任用韋莊做宰相。

喺前蜀國都成都（而家四川省城），韋莊喺佢嘅郊外嘅浣花溪搵到杜甫住過嘅浣花草堂，佢修復咗佢，作爲自己間屋來住。

910年，韋莊喺蜀地過身。

現今有《浣花集》10卷、以及同書增補嘅《韋莊集》。

作品

韋莊嘅作品有《浣花集》同《浣花詞》。

喺詩，佢經常寫佢流落各地、身爲異鄉客嘅悲傷，亦即亂離詩，諸如流離漂泊嘅景象、眼睇耳聞到嘅感慨。佢嘅詩有好大一部分係律詩，情感深沈，意味清新。

喺佢嘅詞，佢唔輸得過温庭筠嘅詞，周濟讚佢「清豔絕倫」。

另外，佢畀人睇做「傑作」嘅係敘事詩《秦婦吟》，長達1700字。詩中，作者講咗一個喺黃巢軍隊中生存咗三年嘅婦女，反映呢支軍隊攻入長安後嘅情形，以及同唐朝官軍多次嘅交戰。因此，佢回顧咗統治階級面對變動時腐敗、無力、迷惘、驚駭嘅情狀；同時佢亦描摹叛亂軍嘅殘暴、野蠻。喺藝術上，首詩佈局同結構緊密，敘述巧妙，描寫生動，形象鮮明。

作品舉例

韋莊嘅作品有七言絕句、詞等。

古別離 晴煙漠漠柳毿毿， 不那離情酒半酣。 更把玉鞭雲外指， 斷腸春色在江南。

菩薩蠻 人人盡說江南好，遊人只合江南老。 春水碧於天，畫船聽雨眠。 壚邊人似月，皓腕凝霜雪。 未老莫還鄉，還鄉須斷腸。

女冠子 四月十七，正是去年今日，別君時。 忍淚佯低面，含羞半斂眉。 不知魂已斷，空有夢相隨。 除卻天邊月，沒人知。

臺城 江雨霏霏江草齊， 六朝如夢鳥空啼。 無情最是臺城柳， 依舊煙籠十里堤。

秦婦吟（節選） 昔時繁盛皆埋沒， 舉目淒涼無故物。 內庫燒爲錦繡灰， 天街踏盡公卿骨！

東陽酒家贈別 天涯方歎異身客， 又向天涯別故人。 明日五更孤店月， 醉醒何處淚沾巾。

女冠子其二 昨夜夜半，枕上分明夢見，語多時。 依舊桃花面，頻低柳葉眉。 半羞還半喜，欲去又依依。 覺來知是夢，不勝悲。

參攷資料

• 辛文房。〈卷十 — 韋莊傳〉. 《《唐才子傳》》。
• 吳任臣。〈卷四十：前蜀六 列傳 — 韋莊傳〉. 《《十國春秋》》。
• 余冠英、錢鍾書、范寧。〈第二冊〉. 《《中國文學史》》。中國社會科學院文學研究所。
• 前野直彬（註解）。《《唐詩選》》 (日文)。岩波書店。
• Trần Trọng San（字未定，僅參攷：陳重姍） (1990年)。《《Thơ Đường》（漢喃：詩唐；中譯：唐詩）》 (越南文)。胡志明市總合大學出版社。 {{cite book}}: templatestyles stripmarker in |title= at position 73 (help)
• Nguyễn Hiến Lê（阮獻黎） (1997年)。《《Đại cương văn học sử Trung Quốc》（漢喃：大綱文學史中國；中譯：中國文學史大綱）》 (越南文)。少兒出版社（家出版𥘷；Nhà xuất bản Trẻ）。 {{cite book}}: templatestyles stripmarker in |publisher= at position 7 (help); templatestyles stripmarker in |title= at position 95 (help)
• 易君左 (1973年)。《《中國文學史》》。華聯出版社。