茅湖山觀測台
22°18′39″N 114°15′09″E / 22.31084°N 114.25262°E
茅湖山觀測台喺香港西貢將軍澳茅湖山上面，行山人士同街坊都叫茅湖廢堡，確實起嘅年份已無從稽考，但從而家嘅歷史文獻中估計，建築物早喺1898年英國租借新界前已經起咗，推測係清朝佛堂洲海關嘅觀測台，用嚟觀測佛堂門航道之用。基於佢嘅獨特性，古物古蹟辦事處喺2009年12月18號將觀測台評為香港一級歷史建築[1]。
保育 編輯
香港審計署喺2013年3月28號發表嘅第六十號報告書「古蹟及歷史建築物的保育」[2]中指出，截至2013年2月，該項一級歷史建築長期缺乏打理。由於缺乏妥善嘅維修保養，引致破舊失修，加上四周並無圍封，可能會對遊人安全帶來風險。2013年3月，地政總署告知審計署，地政總署會聯絡古物古蹟辦事處，為安全起見將調景嶺茅湖山觀測台圍封，作為過渡措施，以待當局定出計劃，予以善用。