莫康時
莫康時（1908年12月25號—1969年4月15號）又叫做莫奇，廣西藤縣人，香港編劇名導演。
莫康時喺廣州通志小學讀書，著名電影人李應源係佢小學同學，亦都係佢後來嘅長期編導合作拍檔。佢後來喺上海滬江大學法律系畢業，早年加入上海大長城影片公司寫劇本。1935年來香港幫鳳凰影業公司做導演，之後喺南京做過劇院經理，又幫荷里活影片公司做過翻譯，重加入過國民政府中宣部。
1939年，莫康時來香港，幫李應源做編劇，第二年執導仍第一部粵語片－《大地回春》。香港淪陷後，莫康時走返內地。1946年，佢移居香港，香港戰後嘅第一部電影《情燄》就係佢導演。
嚮1960年代，莫康時同黃岱、珠璣、龍圖、胡鵬、馮志剛、李鐵、吳回、黃鶴聲、盧雨岐九個香港電影導演結義，合資成立十兄弟電影企業公司，重聯手導演創業作《錦繡天堂》，成為一時熱話。莫康時以喜劇見稱，拍過一百六十幾部粵語片同國語片，最後一部導演嘅戲係《多情高竇貓》。
莫康時第一任太太係粵劇花旦陸小仙，第二任太太淑子亦都係粵語片明星，佢個仔莫家倫亦都做過童星。
莫康時喺1969年過身，《成家立室》就係九位結拜導演為咗紀念佢而合作拍攝。