跛豪
《跛豪》（To Be Number One）係一部由麥當雄擔任出品人及編劇，蕭若元擔任監製及編劇、潘文傑導演嘅港產片，喺1991年4月上映，以香港1960年代、1970年代嘅大毒梟跛豪（吳錫豪）嘅傳奇生平為題，由呂良偉、鄭則士、葉童主演。
| 跛豪 To Be Number One | |
|---|---|
| 資料明細 | |
| 導演 | 潘文傑 |
| 監製 | 蕭若元 麥當雄 |
| 編劇 | 蕭若元 麥當雄 |
| 主演 | 呂良偉 鄭則士 葉 童 |
| 配樂作曲 | 陳永良 |
| 攝影 | 鮑起鳴 |
| 剪輯 | 潘 雄 |
| 製片商 | 嘉禾電影 (香港) 有限公司 出品 麥當雄製作有限公司 出品及攝製 |
| 產地 | .svg){kind=small} 英屬香港 |
| 話 | 粵語、國語 |
| 上畫同發行 | |
| 上畫日期 |  1991年4月5號 |
呢套戲透過描述跛豪五十年代尾由中國大陸到香港，發跡成為大毒梟，同收規差佬稱兄道弟；至七十年代廉政公署成立後被捕；交織寫出當年香港嘅地下秩序同埋某層面嘅社會百態。
電影中跛豪係潮州人，喺片內成日講潮州話粗口「浦你阿摩」；而其他唔同籍貫嘅黑道人物亦大講佢哋方言嘅粗口；不過電影上映時並無因此而被定為三級。
跛豪片長超過兩個鐘頭，喺當時嘅港產片中屬少見嘅長片。上映時票房超過3800萬，係當年全年第三。呢套戲亦開創傳記片熱潮，之後跟風開拍嘅類似電影有《五億探長雷洛傳》、《賭城大亨》等等。
呢套戲拍攝之前，麥當雄曾專程請示吳錫豪，希望得到佢許可，但吳錫豪並未同意，所以喺片頭處可以睇到一段短小嘅致歉信，內容如下：「本片攝製時，未經吳錫豪先生同意。如片中有模仿影射情節，實屬巧合。並為可能引起不便之處，向吳先生致歉意。」
故事大綱
編輯1962年，毛澤東嘅大躍進失敗後，中國各地出現大饑荒，一個隨難民潮逃到香港嘅汕頭青年吳國豪，不甘俾黑幫蝦，投靠黑幫大佬肥波。喺幾場血戰後，吳國豪獲肥波信任，並且確立咗佢喺黑幫中嘅地位。吳國豪勢力日大，肥波漸感威脅，就設局令吳國豪俾毒梟大哥江追殺，吳國豪雖倖免，但已成跛豪。為咗報仇，吳國豪設美人藏毒計，誣陷肥波藏毒，終於令肥波坐花廳。吳國豪又藉總華探長奪位，接管肥波嘅事業，成為港九四大家族之一。1973年，香港成立廉政公署，貪污者紛紛走佬，總華探長雷覺天被迫退休。呂樂臨行前勸佢收手，但吳國豪因位高狂妄自大，終致眾叛親離，更被手下出賣。吳國豪終於坐監，喺鐵窗渡過佢下半生。
主要人物
編輯- 吳國豪，綽號茅躉豪（跛豪，呂良偉飾）：五十年代末中國大陸大飢荒時逃亡香港，後從事販毒，漸成黑幫阿頭，六十年代起同貪污警察探長雷老虎（即現實中嘅呂樂）同謀合污，七十年代初控制大部分香港毒品入口。至七十年代中廉政公署成立後被捕。呂良偉為咗做呢個角色，喺拍攝其間一度增肥幾十磅。
- 吳國豪妻（葉童飾）
- 陳大文（李子雄飾）：跛豪手下。
- 阿明（吳啟華飾）：跛豪手下，後來做證人指證跛豪。
- 啞七（徐錦江飾）：原金牙炳手下，後來係跛豪手下，對跛豪忠心耿耿。
- 肥波（鄭則士飾）：雷老虎手下，原本係跛豪老大，後成為對手之一，老謀深算。
- 楣楣（葉子楣飾）：本來係肥波情婦，但同阿明有染。
- 雷覺天總華探長（曾江飾）：貪污探長，肥波嘅靠山，最後同跛豪同流合污。
- 大聲雄探長（黃光亮飾）：貪污探長，爛賭成性，係跛豪手下，最後出賣咗跛豪。
- 金牙炳（吳孟達飾）：客家黑幫大佬，响石硤尾賣白粉，响一次打鬥被跛豪隊冧咗。
