薑山

薑山（Keung Shan），香港一山，俗字寫做羗山同羌山。山喺大嶼山西南，大澳同石壁之間。頂高四百五十九米。行政上歸離島區，附近範圍，都劃入南大嶼郊野公園。山來講，薑山係大嶼山西脈。筏可寫大嶼山志講，由大嶼山主山起，西面一支有昂坪山、百丈嶺、鹿湖山、薑山、靈蝠山、象山、鳳山、獅山、虎山。

薑山本來就係兩個峯，睇落似嚿薑，依家南面高啲仍叫薑山，北面低啲叫觀音山，兩山北腰有薑山觀音寺，為大嶼山名勝。

薑山亦有薑山瀑布為勝景。由石壁去大澳，有馬路叫羗山道，兜過觀音山、薑山，駁去大澳道。

觀音寺

薑山觀音寺，大澳人叫觀音廟，皆因以前為先天道場所，叫蓬瀛古洞，奉觀音菩薩，宣統二年開山。原本門額兼有門聯，「蓬島擁祇園、座鎮薑山開法界。瀛洲昭勝蹟、恩施化兩濟民生。」可見薑山由來已久。後尾由筏可化入佛門，後來修輯成今日佛寺，是為薑山名勝。

觀音山、薑山以北，大風坳以西，有個大谷。向西行，就到鹿湖。再向西行，有薑山村，又分出上薑山同下薑山，下薑山近獅山嗰頭。

谷內有好多佛寺，如延慶寺、靈隱寺。