薯仔

薯仔（粵拼：syu4 zai2；學名：Solanum tuberosum），係茄科茄屬一種多年生嘅草本植物。原產地喺祕魯同玻利維亞嘅安第斯山脈，而家喺全球各地都可以搵到。佢既係安第斯文化嘅一部份，又有「萬能作物」同「第三麵包」嘅名。

How to read a taxobox

薯仔

物種分類

Solanum tuberosum
L.

名

薯仔有好多個名，除咗粵語常用嘅「薯仔」之外，中華地方常用嘅名包括「馬鈴薯」、「洋芋」、「土豆」等等。

薯仔原本產自南美洲，係響16世紀由歐洲人將佢哋帶返歐洲。幾百年嚟薯仔係歐洲人嘅主要糧食。19世紀喺愛爾蘭薯仔田大失收，就餓死咗好多人。

薯仔大概響17世紀先至傳入中國，一般都係響內陸地區培植。薯仔響中國主要係做餸，唔當係主糧。

呢種植物嘅莖係帶三角形嘅有毛品種；地下塊莖有圓形、卵形和橢圓形；外皮有紅色、黃色、白色同紫色；樹葉係互生、奇數羽狀複葉；花有白、紫、粉紅、紅等色。

呢種植物鍾意喺比較凍同乾燥嘅天氣嗰度生，但佢唔禁強光同高溫天氣。

薯仔含有大量嘅碳水化合物，同時重含有蛋白質、礦物質、維他命等等，而營養價值係胡蘿蔔嘅2倍、大白菜嘅3倍，番茄嘅4倍，尤其係維他命C比較多。既可以當做主糧，又可以當做蔬菜食用。但人通常食嘅係塊莖，而唔係佢嘅根。另外，薯仔重可以用嚟整澱粉、酒精、糊精、葡萄糖；甚至可以整橡膠、電影菲林、人造絲、香水等好多種工業品。