蘭花螳螂

蘭花螳螂（粵音：laan4 faa1 tong4 long4；英文：orchid mantis；學名：Hymenopus coronatus）係螳螂目下嘅一種物種，源自東南亞嗰頭嘅森林，廣泛噉分佈响泰國、馬來西亞、菲律賓同印尼等多地。

How to read a taxobox 蘭花螳螂
2008 年影到嘅一隻蘭花螳螂
物種分類
界 動物界 Animalia 門 節足動物門 Arthropoda 綱 昆蟲綱 Insecta 目 螳螂目 Mantodea 科 花螳螂科 Hymenopodidae 屬 花螳螂屬 Hymenopus 種 蘭花螳螂 H. coronatus

蘭花螳螂係種花螳螂。佢哋最出名嘅嘢係望落好似朵蘭花噉，而佢哋嘅外形同時起到攻擊同防守嘅作用－蘭花螳螂嘅擬態能力令到啲獵物冇咁易睇到佢哋，蘭花螳螂可以利用呢點嚟更加有效噉偷襲獵物，而喺防守方面，呢種能力又會令蘭花螳螂冇咁易畀佢哋啲天敵（多種嘅雀鳥）睇到。

型態

睇埋：螳螂

蘭花螳螂型態大致同一般嘅螳螂物種相似：佢哋有六條肢體（昆蟲都有嘅特徵），身體呈粉紅同白噉嘅色水，後面用嚟企嗰四隻腳進化到望落好似蘭花嘅花瓣噉款，而（同一般嘅螳螂一樣）佢哋最前嗰兩條肢體就會用嚟捉獵物；平時佢哋會將兩條前肢縮埋，同時匿喺草叢入面，等自己望落好似一朵蘭花噉。

除此之外，蘭花螳螂仲有幾顯著嘅兩性異形：一隻乸嘅蘭花螳螂成蟲可以生到去成 8 cm 咁長，而一隻公嘅蘭花螳螂成蟲就頂嗮攏得嗰 2 至 3 cm 咁長－啲乸嘅體形大隻過啲公成倍有多；順帶一提，呢點據講有助啲公飛行，等佢哋可以輕易噉飛嚟飛去搵乸交配，同時啲乸比較少郁動，傾向靜靜哋等公嚟向佢哋求愛。

蘭花螳螂同所有螳螂一樣，係行唔完全變態嘅，所以啲若蟲除咗細隻啲之外望落同成蟲冇乜大分別。

行為

睇埋：攻擊型擬態同埋伏式捕食

蘭花螳螂係攻擊型擬態（aggressive mimicry）嘅一個出名例子：攻擊型擬態係指捕食者扮成（由獵物嘅角度睇）無害嘅嘢，藉此引啲獵物放低戒備；蘭花螳螂會爬上去啲植物嘅枝葉嗰度，尤其會搵啲有花嘅植物，然後佢就會用佢後面嗰兩對腳捉實樖植物，再係噉咦左右擺動，令自己望落更加似一朵喺風入面擺動嘅花；通常等吓等吓就會有啲細隻昆蟲，尤其係蜜蜂同各種蝴蝶等會採花蜜維生嘅蟲仔，會飛近佢度，最後隻螳螂就會一嘢伸出佢最前嗰兩隻肢體，將隻獵物捉住，再監生食咗隻獵物佢。

食乜

蘭花螳螂同第啲螳螂一樣係食肉嘅，任何佢哋捉得住嘅昆蟲，佢哋都會照樣食，尤其係最鍾意食蝴蝶同飛蛾呢啲鱗翅目。

蘭花螳螂亦有同類相食嘅行為，大隻嘅蘭花螳螂有陣時會捉細隻啲嘅同類嚟食。

靚相

• 
• 
• 
• 
• 
• 
• 

睇埋

• 花螳螂

拎

• 維基同享中有關蘭花螳螂嘅資源類
• Deadly Disguised Orchids | World's Deadliest，《國家地理雜誌》擺上 YouTube 嘅一段片，講蘭花螳螂嘅。