西沙路

西沙路（Sai Sha Road），原本叫泥涌路（Nai Chung Access Road），曾經叫過西沙公路，係香港新界一條公路，駁往西貢同沙田以北馬鞍山。佢東起西貢大網仔路麥邊回旋處，北行途經企嶺下、十四鄉、烏溪沙，轉西南經馬鞍山市中心，到錦泰苑恆德街為止。早期只係到頌安邨恆康街，其後先伸長。西沙路馬鞍山一段，有港鐵馬鞍山綫架空路軌，由烏溪沙站去到恆安站。

西沙路唔斜，但有多彎位。

1970年代末期，就開始起西沙路，早期只由大網仔路伸到泥涌，叫泥涌路。喺1986年先改名西沙公路。隨住沙田新市鎮向東北擴展到馬鞍山，到烏溪沙為止，香港政府將馬鞍山路由恆安邨同耀安邨向東伸展，同直達泥涌嘅西沙公路駁埋，令西沙公路延長，並喺1988年通車^[1]。馬鞍山市中心一段已預留中央空間起馬鐵（今港鐵馬鞍山綫）。