西貢南邊圍旅遊巴失事

西貢南邊圍旅遊巴失事係宗嚴重交通意外，2008年5月1號喺香港西貢區南邊圍發生，造成19死43傷，做香港第二多人死之車禍。

出事旅遊巴

出事經過

2008年5月1號朝早8點半，兩架載有幾十名日本神慈秀明會香港分會教友嘅旅遊巴準備由慈雲山分會前往西貢市竹洋路教會香港總部參加每月例行崇拜，至到朝早9點02分，其中一架載有61名乘客，由伍氏兄弟旅運公司擁有，配新亞車身嘅Isuzu LT132P旅遊巴（車牌JZ6686）駛到西貢公路南邊圍時，懷疑車速太快及煞車皮磨損，喺斜路落斜轉入迴旋處時失平衡，全車翻側喺隔音屏障旁，車頂隨即壓向乘客，導致大量乘客被困喺車頂同座椅之間，而司機受輕傷而可以自行爬出車廂，不過隨後俾警方以危險駕駛導致他人死亡罪名拘捕。另一架同行旅遊巴就安全抵達目的地。

救援

香港消防處喺意外後9分鐘趕抵現場，14人當場証實死亡，另外4人送去醫院後証實不治。由於死者眾多，當局自2003年屯門公路雙層巴士失事後首次喺大型意外現場設置臨時停屍間充氣帳篷。所有死者都係29至83歲女性，而傷者年齡就介乎2至85歲，有傷者話事發前車速太快。警方及消防出動300幾人，政府飛行服務隊亦協助運送傷者，最後一名傷者喺意外發生大概3個鐘後被救出。傷者被送去8間醫院救治，醫院管理局啟動緊急應變，而行政長官曾蔭權就到接收最多傷者嘅將軍澳醫院探望，然後亦到車禍現場視察，視察期間走到臨時停屍間為死難者祈禱，佢表現哀傷並形容今次意外係香港近年最嚴重車禍，又要求有關部門徹查意外原因並為死傷者家屬提供適切援助。

意外發生後，警方設立3條熱線畀市民查詢交通意外嘅死傷者資料，民政事務總署喺將軍澳醫院、聯合醫院、廣華醫院、伊利沙伯醫院及沙田威爾斯親王醫院設立5個援助站為市民提供協助同埋畀市民查詢。

事故中一名45歲女傷者留醫4日，延至5月5號不治，令死亡人數升至19人。

後續、審訊及判決

為免同類事故再發生，路政署事發後喺事發路段髹上黃線，提示駕駛者減速。

出事司機孔令國事後被控「危險駕駛引致他人死亡」罪名，並承認控罪。2009年6月19號，孔令國喺區域法院判刑；法官指出，由於案發時危駕致死嘅刑罰並未提高（相關罪行嘅最高刑罰喺2008年7月4號，即事發後兩個月提高至監禁10年），因此以5年監禁作量刑起點，但由於佢認罪，所以判入獄3年4個月，另停牌3年。律政司及後不滿被告停牌期太輕，提出覆核。上訴庭喺2010年4月15號裁定律政司上訴得直，被告停牌期由3年加到6年。